2
Ashiriya, na kamanchintspa yuwaatsshat Ann shambatku, yaseerangu*Lukasa 1.46-55 anumashtam tsiyatkiya, yuwash Mariy, Isus wanir tsiyatarangu anshu. anootsi
1 Ann Apanllee ungirtaaku,
Apaa, shiyamun na mangi kischa.
Shiyamari kizpureerush, nuwaam istarangush, nuw mangi kissha taakina.
Na nimun tputs nuwaa natsaksin starangana anoo,
Natunaa nuwaa starishpa, tátshaparina.
Watam shiysha Apaa, nuwaam kapung istarangshawa.
Ashirucha, na mangi kisshita.
2 Shiyamaricha Apaa, kizpur wanasirimshish taakish.
Min tputs ashim wanindaja.
Shiyamari Apaa, taarasheetsini ksutamapan taaksha.
¿Chakaja shiyapa tputs tatsamooch?
3 Ashiriya, tputs mangu tamasingaru, Nuw wanasirtana, tsiyatkusin tárusinapa.
Watam shiyamari kurakish Apaa, ichingaroo tputs natstayarush,
yuwaa tputs wanasir taakana anootsim ipuseerush wayakshawa.
4 Mishat, yuwaatstaa tputs kizpureew pachampan taakana anootstaa, Apaa,
shaana zandkush, wizpuree tsapush wayaksha.
Yuwaatsshat tputs nda waritarangu, anootsshat arang wizpureem panaksha.
5 Yuwshat tputs kapung katungku taataru, anshat na mariz kayatkusin,
tputsishshat pakchimanda katungats katungpani atusin, tarawaztakanaya.
Itaru, yuwshat tputs sirú marizimun kiyung kachiytaru,
anshat na kisshat katungkusin, tazazarsin taakanaya.
Kizshat yuw mipish taarangu,
anshat na wip zapansha iparinarangiya.
Itaru, yuwshat kiz sirú zapan wipaam iparinarangu,
anshat na ndushat iparinaku, kuk zamashat taakiya.
6 Apanll iyaam taarasheemani panakiya.
Itaru, waana zandku, taarasheetsich itutskachu, tsapush wantsush taatchi.
Sheeru, yusur chiyaa ituyamayaru, yamachiya.
7 Apanll waana zandku, tputsee kurkirpaneem wayakiya.
Nduniya ashiru, pukireem wayaktamta.
Kurkirpaneetsshat waana zandku, pukireemshat wayakiya.
Pukireetssha waana zandku, arang wayakiya.
8 Mishat, yuwaatstaa tputs kizpur pukir taaku,
kapeetshiship katungku taataru anootstaa,
Apanll waana zandku, kurakaam ínakchu,
tputsee tushaneeyaru, kurakawtamsin kukoo mazinakanaya.
Watam Apanll waamari kizpureeru, tsapurunasee ashchiri amuytaru taakuwa.
Waana tsapurunasee ashchiri tinarangu, wayarangiya.
9 Tputs Apanllee kuk mangoonkana, anoo Apanll kis ksutkiya.
Itaru, yuwaatsshat tputs Apanllee nda chinakana, anootsshat tsipakchu, tapish wayachiya.
¿Tamamaja tputs waanamuntari wizpuririni waanaatsi tapachindach?
10 Uru Apanll nuwaam kundarari kanindamand kariyaa tsapush zanganchiya, izuuru tpachingamaama.
Apanll tsapurunasshuchee tputs ichingaroo taarash yasariya.
Watam Apanll tsapurunasshuchee waana zandku, kurakaam ínakchu,
uwshat tiptsiree ksutkachu, aranginashat kizpureem taakiya,
Ann Apanllee ungirtaku ántar ashirangiya.
11 Wazaranllshat Elkan wizanllee, Pza, pangipani kanapeeni, tárangu, Ramap kanapuranganaya. Itaru, nllursha anshuri taarangiya. Apanllee chinarangu, Elíyaa kuku payurangiya.
Ashiriya, na kamaneena yuwaa Annarini kizpur mang' ksaku, yasiyastar ashirangu anootsi.
Ashiriya, na kamanchintspa yuwaa Elíy wip apanllpantaatssin, yutarittam chinarangana anootsi
12 Elíy wip tsimbun apanllpannand taarangsin, itaru zapish yutaritshat chinaranganaya. Apanllee kuk ndushat payumaam zandaranganaya. 13 Anpurshat zar Israelchich ungirtamaam zandkusin, chinoo putayandsin, Apanllish pang' pachamaam yushindaranaya. Apanllpaneew Apanlleem wanutseetsshat mbasamaam zandkatssin, wasapamash yáyarusin, 14 kpamash nda nap ashkusin, yuwari kayungachu anuri yáyarusin, katungkaranganaya. Anpur ichingarusin apanllpan ambiri sheersin, katungkaranganaya. Ashirucha, Israelchichshitisin Elíy wip anuritam chinarangusin, Apanllish pang' Silowash natumas ashirangtamsinaya. 15 Itaru, anumun zapish ndushat ashimaam zandaranganaya. Ndaturi tputs Apanlleem wayangunoo muchirusin, yuwaatsiri apanllpan muchchur kuskamchinllina anootsiri, Natu nuwaam wanuts kaneesari pananda. ¿Antaati apanllpan urkar na wanutsee músama zandakshitaja? Nuwaana ksiyaruri, katungchima, táranganaya. 16 Tputsshat, Nduni. Musápa. Ndaturi Apanlleem wayungunoo muchiranawa. Na yuwapachi, annaa mashkush, yuwaari zandkish anuritam panachinllpa, táranganaya. Itaru, uwshtisin anoo nda mazinamaam zandarangsin, Natu mikingcha. Papcha. Nduniya nuwaam musá panakush, uru putayarunll itutskachinllpa, táranganaya. 17 Amb ashirangsin, Elíy wip Apanlleem ungirtamaam nda wanasir wayarangusin, kizpur yutarit Apanllee michitaranganaya. Apanllshat anumand kapung tsiyantarangu, nda kis naparangiya.
18 Ashirucha, anumun zapish Samuel kanungeeru, ktun wanasirimashshat ktuntarangiya. Sheeru, uwshat apanllpaneem kinayaru, Apanlleem wanasir tarawaztarangiya. 19 Wanirshat wazaranllpat ichingaru masach chinoo putayanllu, Apanlleem pachakatssin, Apanllip pang' naataranaya. Wipaamshat watunir wanasirimash siriteenllu, ambiri panakatu naayanll ashtaranaya. 20 Elíyshat apanllpan urkar Elkanaam, mishat wizanlleemtam Apanllpat tsiyatarangiya. Yuwamand izanllish wipaa minumtaatstaa Apanlleem wayarangu anumand, Apanll izanlleemish kapung istakachu, wipaam zapan iparinachiya, tárangiya. Yuwaparamchusin, yusur waptam kanapuranganaya. 21 Apanllshat Annaam kapung istarangu, nlluraa mireerangshita. Amb ashirangu, Ann wipaam zapan iparinarangiya; kamuz tuchip, kizshat tsimbun ashiru taarangiya. Wipshat Samuel apanllpaneemari kanungarangiya.
22 Elíyshat kizpur wachinarangiya. Ashiritaa yuwaa wip Israelchichee kiz yutarit ashirangana anoo ichingaru yasarangiya. Watam wip Apanllee pang' ksutamapanee mantsir patataranganawa. 23 Ashirucha, uwshat wipaa, ¿Mayaamshat siy mantsir saanaatsi ashiksa? Saanamandari siyaa tputs ichingarusin yasaksin, mantsir tsiyatkana. 24 Mshee, siycha ashkatatssa. ¿Antaati an wanasireeja? Apanllchich tiptsir siyaa nda pakchiyam wanasir tsiyatkanaya. Yuwaatsimari yutarit ashkis anootsimari tsiyatkusin, zamamtangat ashkanaya. 25 ¿Tamasha nda mangoonaksa? Tputs waanpatatin natsakchu, Apanll anoom tapachindamaam waritakcha. Itaru, tputs Apanlleetsshat natsakchu, ¿chakaja arang waam tapachindayach? tárangiya. Itaru, wipshitisin waparee kuk nda pakchiyam mazinamaam zandaranganaya. Watam Apanll, Izuuru pachayaruri, kasachima, mangush táranguwa.
26 Itaru, Samuelshat anpur kanungasshat taarangiya. Apanllee kis chinarangu, kizpur wanasir taarangiya. Apanllsha uwaa kis naparangiya, tputstamsin kis naparanganaya.
27 Anpurshat Apanll kamanipanee tputs, Elíyap zanganirangiya, waanaatsi kuk kamanimaama. Uwshat Elíyaa tsiyatarangu, Apanll shiyaa ateeja: Yuwapur sirútama siy zitaminaris Ijiptosh tsap parawaam muchchur taarangana anpur nuw wazareetsiri tsiyatarangina. 28 Israelchich zapantaa taarangsin, itaru nuwshat Aaronaatsim apanllpaneem urkar ipusarangina. Aaronchichee kamachtaranguri, Nuwash sumi maacheetsi muchimapanir taangtsa. Kzammasheetstam muchingcha. Ktuneetstam wanasirimshee nuwash pangi kamartangcha. Mishat, katungsheemtamtish yuwachich nuwaam muchkish anchich chawpitam yángcha, tárangina. 29 Itaru, ¿siysat mayaamsha nuwaa kuki nda payuksa? Nuwaam wanasir muchingtsa, tárangitaati, siysat nuwaa yutaritaam ínarangsa. Mishat, shiy Elíyaa, ipareetsimtish kapung chinakush, nuwaatsshat nda chinaksha. Yuwaatsim tputsiri, Israelchich nuwaam maacheetsi muchimaam yushindakana, anootsim iparpatish wanutsee wanasireewaa itutseerus, kis katungkus nutsimshitis kapunguksa, tárangiya.
30 Mishat, Taarashipan, Israelchich Apanllirini shiyaa táranlleeja: Nuw sirútama Aaronarineetsi: Shiyachich nlluranur urutamari nuwaam apanllpaneem taachinllinpa, tárangitaati, itaru natshat, Aaronarinchicheetsis izuuru watsta táyana. Watam nuwaa tputs izuuru niyrku, anoo nuwshat izuuritam niyrkinawa. Itaru, yuw tputs nuwaa kuki payukana, anootsshat nuw istachima, watam nuwaanashat Apanllinawa. 31 Uru musásiri siyachchee izuuru watstamamari kapeetchima. Ashkachuri, ayamtaati siyachich tputs nda wachinarsin taachinllinaya. 32 Na napantsa. Uru siyachich chinllinis kiyung kachiykusin taachinllinaya. Na Israelchicheemshat kapung istachima. Ashkachuri, siyachichshat chinllinis ayamtaati nda minumtiyam wachinarsin taachinllinaya. 33 Itaru, nuw ashkachtaateena, siyachchee chinllinis nuwash pangi patatamaam wayachtamma. Itaru ashtaa, mang' mantsaksin, taachinllinaya, ndaturi wachinarsin tsipachinllinaya. 34 Ashiri na wasina shiyaa kamanchinllpa. Uru nattamari zar iparish tsimbunari Jofni, mishat Fines ashirusin tsipachinllinaya. Ashkachuri anush, shiy mangoonatsha, Apanll zurkupa atiya, táchsha.
35 Sheeruri, anumun yuw nuwaana ipusarangi anootsshat apanllpaneem urkar wayachima. Uwshat yuwaa nuw chinakuri taaki anoo tuminchiya. Ashkachu, nuwaa kamachtamari ichingaru tatsamchiya. Anchichshat nlluranur ayamtaati pastacheeja. Urutamari nuwash pangi ksutkusin taachinllinaya. Sheeruri, urkareemshitisin wayakchuri, anoomtam urkareem istaku taachinllinaya. 36 Ashiriya, shiyshat chinllinish yuw wand kchit taarana an apanllpaningaz tsapush tutunlltayarusin, Nuwaam Apanllish pang' tarawaztamaam wayanda. Pakchitaa kurik putapi átana. Nduntaati ashiru pangataa pakich pananda, katungpi tina, táchinllinaya. Amb ashkusin, kiyung kachiykusin, taachinllinaya, átcha Apanlli shiyaatsi, Apanllee kuk kamanimapan Elíyaa tárangiya.
Ashiriya, na kamaneena yuwaa kamanimapan Elíyasash pang' kuseeru, Apanllee kuk kamanirangu anootsi.