18
Ashiriya, na kamanchintspa yuwaa yaktaa Samariya kapeetarangana anootsi
9 Yuwash Esikiyas ipunpunar masach Utaáchcheem kurak kinaru taachu, anush Asiriyashuchsha kurak Salmanasarsha, Pachani atusin, Samariyash yakat kusarangsin, taturpiranganaya. Yuwapuritam kurak Israelshuch Ela wip Osiyas, tsimbun matayaru masach urutari kurakaam kinaru taaru anpur Samariyaa taturpiranganaya. 10 Taturpirangusin, tuchip masach anshuri kachingaranganaya. Ashirangsin, undarar Salmanasar Samariyshuchee izuuru kasiranganaya. Yuwapur Esikiyas 6 mashach kurakaam taarangu anpuru, misha yuwapurtatam Osiyas 9 masach kurakaam kinaru taarangu, anpuritam Samariyshuchee yaktarini kasiranganaya. 11 Ashiriya, kurak Asiriyashuch Israelchichee wamaritssin kasirangusin, Israelshuchee tputs putayarandsin, Asiriyapsha tsap machtaranganaya. Jalajash tsap Jaborumun kung wing wayaranganaya, Ngusanumunatam wingu Medosshuchish tsapu. 12 Ashirangana an nda mangutari ashiranganaya. Yuwamand Israelchich Apanllee wamachtash kapeetarangsin, apanllputsingazimarisha zandarangsin, Apanllee kuk Móysisarini yandarangu anoo nda payurangana, anumand Apanllsha waneerangu, kiyung kachiykusin taaranganaya.
Ashiriya, na kamaneena yuwaa yakat Samariya tputssha watsapuneem amuytarangu anootsi.
Ashiriya, na kamanchintspa yuwaa Asiriyashuch kurak tsiyatssee Utaáchcheem kamanirangana anootsi
13 Esikiyas 14 masach kurakaam kinaru taachu, anush Asiriyashush kurak Sinakirip sur Utaáshchee pacharangusin, yakat kámanamaatstaa, wamaritin kasiranganaya. 14 Esikiysha Utaáchich kurak tsiyatssee Lakisap yakat Sinakiripaam Asiriyshcheem kurak zanganirangiya. Nuw mantsiri chinaranguri, shiyaa kapeetamaam zandarangina. Itaru, nuw shiyaa wanasir tuwapchinllpa. Ashiriya, na in shiy nuwaa tsapuni kasayarush shtungangcha. ¿Wanipamasaja zandaksha yuwamand shitungachish anumandaya? Ashiriya, nuwsha ashparitam tuwapachinllpa, tárangiya. Ashiriya, Asiriyashuch kurak anoo mazinarangu, mangutarisha arang tuwapapanda átu, kamachtarangiya.
9,900 kilo kurik mburshimash, anumunsha
oroonandari 990 kilo aship
nuwaam panangandama, tárangiya.
15 Kuraksha Esikiyas ashparitam tatsamooru panarangiya. Ashiriya, anoom tuwapamaam kurikee Apanllish pang' yarangu, misha kurikee pshtashishtam yáyaru, ashpari panarangiya. 16 Mishat, Apanlleem pang' wach shtandashee yusheeru, oroo taparama ktazeeyaru, kurakaamsha panarangiya. Yuwaa waana shitungasheem wanasir orpa wayarangu anoo panarangiya. 17 Ashirangu, kurak Asiriyashuch Sinakirip waanaatsi wipunashee Utaáchchip kurak zanganirangiya. Mishat, sundarutam kizpureew sundarpatatin pachamaam zanganirangtamta. Ashirangsin, tsap Lakisash shaniyarangsin, Irusarinapsha yakat naataranganaya. Ashiriya, Irusarinash kusarangsin, mus tashtap taaru annung ngoots chirikoo káchampaneem wayarangana, annungiri ashpartin shaniyaranganaya. 18 Sheersin, Esikiyasaa Utaáchchee kurak, Eliyakimaatstam Hilkiyasa wipa kurakaa pang' ksutamapanee, Sebnaatstam kirakaa yandampanee, Jowaatstam Asafa wipa kurak wipunashi kuruzeeru, uwshtisin tsiyatamaam yaktamun watandpunu kárirangana, watam anin kurakawanandari taaranganawa. Itaru, Esikiyasanaa pangshuri kutarangiya. 19 Tandapunizimun káreersin, nap ashkusin, Asiriyashuchsha kurak wipunash tsiyatarangiya. Tsiyatssee kizpur tpuxtamashee tsiyatarangiya. Uwshat, Ashiriya, kurakaa Esikiya kamaningtsa, yuw nuw kurakari kizpur Asiriyashuch kamachtarangu anootsi. ¿Tamasha mangishish táchakush, nuw ichingaroo maachi nuwamari kasimaam waritatana átsha? 20 Na mangish chinangcha. ¿Antaati yuw tputs wanasiritaatsiri tsiyatku, an wamari tapazpa kasimaam waritatar? Ashiriya, ¿chakamunsha mangis tatkus, iyaa kapeetamaam zandaksha? 21 Siy Ijiptoshchimun tputs mangis tatuksa. Itaru, an tamapingampancha. Chinganamun pátangammun chaana katkuch, chiyaatssha kapchiya. ¿Chakaja anumun mang' tatuch? Ijiptoshuch tputs ashikpaz ashiriya, anumun mangis tatintspa. 22 Mishat, siy tsiyatkus, iy Apanllimuncha mangini tatkini atinaareesa, itaru ¿wanip Esikiyas Apanllee ungirtamaam kapeetaranga? Anoo ungirtamaam watsta. Itaru, Irusarinush ungirtakana anootsimari ungirtangtsa, táranguwa. 23 Amb ashirangus, siy na wizpuriris ndunarshita.
Ashiriya, nuwapa kurakari, Asiriyashuchpa kurak yachayani. Nuwsha siyaam kapaach 2 mil panachintspa. ¿Kamaparee shiy ashparitam kapaachpanee tputs pangachsha? Itaru, pakchitaateesha, ¿antaati shiy Asiriyashuchee nlluraatstaa tusuwacheezis? Nda. ¿Antaati Ijiptoshuch siyaam kapaachoo istaku istacheeja? Nduni. 24 Mishat, ¿mayaamsha siy Ijiptoshcheem kutakus, Ijiptoshuchpari iyaam tapazpaneem kapaachoo panachinllinaya átus, anumunari mangis tatuksa? ¿Antaati anpataja iyashchee sundar puxtachis? ndambaree. 25 Mishat, ¿antaatiya iy msangareezi nish tsap siyaam pachakatuni kusarangee? Apanll waana iyaa kamachtarangiya, nee tsap kapeetamaama, tárangiya. 26 Kuraksha Esikiyas wipunash, Eliyakimsha, Na mazinanganlla. Shiy Aramewshuch k'kuz tsiyatangasindama. Hebrewshuchinaa kuk watsta, watam siy Hebrewshuchish k'kuz tsiyatkachush, tputs ichingarusin tandapunuzimun xiyarsin, siyaa mazinakanawa, tárangiya. 27 Sundarshitisin urkar, Iyaana kurakari Asiriyashuch kamachtarangu, yuw tputs wishchip shaneerana anootstam ichingaroo kamaningcha, tárangiya. ¿Antaati nuw siyaatsimtaja kamankee? nduni. Ndunnaa nuwaa kuki mazinakus, siysa ichingarus marizimun kiyung kachiyatssa. Ashkachus, uru siy chkeetstamtis katungatssa. Mishat, sachitkus, kuseetstamtis waatssa, tárangiya. 28 Táyaru, Asiriyashuch sundar xiyeeru, Hebrewshuchish k'kuz tsiyatku, kapung tsiyatarangiya. Asiriyashuch kurak átu, anoo mazinangtsa. 29 Esikiyasaa kuk payurintspa. Siyaa tamapingayantspa. ¿Tamareeja nuwaa kasiyaru, siyaa tapachindayach? 30 Mangu ngichku, siyaa, Apanllimun mangini taateeni. Ashkachuch, uwsha iyaa tapachindachiya. Asiriyashuch kurak chiyaa ndusha kasichiya, kurak átcha. 31 Atitaatiya, itaru siysa anoo kuk payurintspa. Itaru, nuw tsiyatki anootsimari k'keetsi payungasindama. Nuwapa kurakari tatsuyayarus, uru kissha taatssa. Saantarisha kizarunaa tatsumeerus, misha kinduratam, mishat saamataritam waasheemis kungureemis payutssa. 32 Amb ashkachuri, siyaa ashparitaatssis iyaanpeesha macheeruri, nish tsap taakis ashimatam taatssa. Yuwash tirikutam, misha kizarunatam, olivotam zapan taaru, anush siyaa wayachintspa. Ashkachuri, siy ndushat kiyung kachiyatssa. Mishat, ndusha tsipatssa. Itaru, Esikiyasaa kuk payurintspa, yuwaa mangu siyaa ngichku, Apanllpari iyaa taarasheetsini tapachindachiya átu anootsi. 33 ¿Na tamarimta? Minpich apanllputsirimun mang' taturangsin, iyaa tapachindachpari, tárangusin, ¿apanllputsirini tapachindarang? ¿yuwaa iyashuch kurak Asiriyashuch waratarangana anootsee? 34 ¿Na yapeewamta apanllputs Hamat misha Arpad? Mishat, ¿yapinaaree apanllputs Sefarpayim, misha Jenása, misha Iba? Napangi, ¿an tamarangimsinaya? ¿Antaati waanaatsi yaktarini waanpata wizpurirni Samariya Asiriyashuch waratarangana anoo tapachindarang? 35 ¿Tamamsha nish apanllputs waanaatsi yaktarini tapachindaranga, watsapuneetsee yuwaa kurak Asiriyashuch waratarangana anootsee? ¿Mayaamsha mangutish mangishish chinakus, Irusarinaa yakat Apanllpari tapachindachiya átssa? tárangiya. 36 Ashiriya, tárangu anoo tputsshitisin Utaáchich ichingarusin nda tsiyatkusin, mazinarutar ashiranganaya. Nda minumtiyam tsiyatsis tsiyataranganaya. Watam kurak Utaáchich Esikiyas, Minumtiyam siy yuwaa tsiyatkachu anoo yámeerus tsiyatintspa, táranguwa. 37 Ashiriya, yuwaa tárangu anoo Eliyakim kurakaa Utaáchchee pang' ksutamapan, misha Sebnaa kirakaa yandampan, misha Jowas kurak wipunash anin mazinarangusin, kizpur mang' mantsaksin, wamaree izichiranganaya. Ashirangsin, kurakapsha Esikiyasap tsiyatssee kamankatssin naataranganaya. Anushsha kuseersin, ichingaru yuwaa mazinarangana, anoo kamaniranganaya.
Ashiriya, na kamaneena yuwaa kurak Asiriyashuch wasundururee zanganirangu, uwshtisin tsiyatssee Utaáchcheem kamanirangana anootsi.