22
Ashiriya, na kamanchintspa yuwaa Dapiyarini yaseeku tárangu anootsi
1 Dapiyarini Apanllee yaseeku, Apanll nuwaa tapachindarangu, Saularini nda pacharanganda, mishat kundartamti nda nuwaa pacharangiya, átu yaseeku tárangiya.
2 Apaa, shiyamari kizpureerush, nuwaa tapachindarangush,
nuw patumbchishpaz wach pshturanguri, ashiru shiyash kamungarangi.
3 Shiyash patumbich wach tamapari ashiru anush nuw kamungkina; nuwaa tapachindaksha.
Mishat, xanxapishpapaz kámanaku ashiru nuwaa wizpurirpatish kámanakush, nuwshat kamungkina.
Mishat, arang yuwarpaz kámanaru ashiru anush nuwaa pishuksha.
Ashkush, shiyamari wizpurirpatish nuwaa ksutkush taaraasheetsi tapachindaksha.
Nuwaa tputs kiyung yachamaam zandarangtaatssin, itaru shiyshat nuwaa tapachindarangsha.
4 Apaa, shiyaatsimaritcha wanasireem ínamaam waritaksha.
¿Nuw shiyaa wanipaja masharangi?
Nuwaam istanda táranguri, shiyshat nuwaa kundarari tapachindarangsha.
5 Nuw tsipamaam waritarangina.
Waraspaz ashiru nuwaa mangeetsi yambutarangu, nuwshat kapung punirustarangina.
6 Mishat, wanumbpapaz maachtaam tutsangtarich,
ashimashtaa nuwaam tsipamaam waritarangitaati, 7 nuwaa taxararangusin,
¿Tamayareezi kamungchi? táranguri,
Apaa, shiyaatsshat pangishish mashiranguri, kapung tanuranguri,
shiyshat k'keetsi mazinarangush,
8 shiyshat yuwamand tsipats kinarangi anumand kapung tsiyantarangush,
tsap kapung mundaztarangu, kanindpitam mundaztarangiya.
Shaana Apaa, wizpurirpatish ashirangsha.
9 Mishat, kizpur tsiyantarangush, shipishish msas ashiru kizpur shitungarangiya.
K'kishitish sumas ashiru shitungarangu, watsam ashiru kurakurtaru, ningeem zanganirangsha.
10 Kanindaa wach tawatakpaz ashirangush, msaseetsshat kizpur tuwap tsapush zanganirangsha.
11 Ashirangush, kambusur machimun pantsatarangu,
maacheetsi wazitpungach wanindawa tpurangarangu, kambusurush naatarangiya.
12 Kambusurshat kizpur tap ashirangu,
sinshat sinamaam zandarangu, anushshat shiy tapishurangsha.
13 Anushshat, kapung kariytarangu,
watsamshat sumas sin ashiru tsapush pantsatarangiya.
14 Ashirucha, Apanllimari kizpureeru, kariyaa zanganku,
kapung kariytakachu, kanindap kimakiya.
15 Ashirangu, kundarareetstamti mangoo tamamarpamaam wásaparinpa tiyanurangu,
mamaroo kayungarangu, kizpur mamartarangiya.
16 Tputsee wanimaam zandarangu,
kizpur maraa kung tapusirangu, tsapoo wanshuchee puzarangiya.
Tputsshitisin ichingarusin tsapoo wanshuchee paranganaya.
17 Apanllshat waana íwarimand uw paxayarangu, uwish nuwaa wayarangu,
nuwshat mar kapungootstaa kitarangina.
18 Amb ashiranguri, kundarari kizpureewtaatssin nda nuwaa pacharangusin,
nuwamaritam kamungarangina, nuwaa kapungtaa natsarangusina.
Uwshtisin tputs nuwamand kizpureew taaranganaya.
19 Yuwash nuw wizpuriri ndunareerangu anush, nuwaa pachamaam zandarangsin,
itaru Apanllsha nuwaa istarangu,
20 nuwaa tashitungarangiya.
Ashirangu, nuwshat kamungarangina.
Apanll nuwaa kapung chinaku ashirangiya.
21 Watam nuwshat wanasir taaranginawa.
Ashirucha, Apanllshat nuwaam wanasiritam istarangiya.
22 Watam nuw Apanllish kis tachitaranginawa.
Ashiranguri, ayamamtiyam nuw Apanllee nda kasachina.
23 Ichingaru yuwaa tsiyatarangu anootstam nuw payuranguri,
nda minumtiyam kukoo kapeetarangina.
24 Amb ashiranguri, wanasir taarangina;
nda yutaritshishush pshturangina;
yutaritshisheetsshat izuuru kasarangina.
25 Ashirucha yuwamand nuw kizpur wanasir tárangi anumandtam,
Apanllsha nuwaam wanasiritam istarangiya.
26 Apaa, shiyaa tputs k'keetsish payukana,
anoo shiyshat wanasiritam napaksha.
Mishat, nda yutaritshishush pshtukana, anootstam shiyshat chinaksha.
27 Zurampatari shiyaa chinakana, anoo shiyshat zurampatartatam chinaksha.
Itaru, tputs tamapingampaneetsshat, shiyshat zurampatari waneeksha.
28 Mishat, yuwaatsimari shiyaa kukish payukana anootsimari tapachindaksha.
Itaru, yuwaatsshat shiyaa kukish nda payuksin, waanaatstamari chinakana,
anootsshat shiyshat waneeksha.*Lukasa 1.51-53 tsiyatsis nipta tatsamooru taaritamta.
29 Apaa, shiyamari nuwaa tuwasineeksha.
Apaa, shiyaa nuwcha Apanlliri.
Ashirucha, nuw tapish taamaam waritaktaati,
itaru shiyshat nuwaa mangeetsi tuwasineeksha.
30 Shiy nuwaam istarangush, nuwamari kundarareetsi kasirangina.
Mishat, yakat tandapunumaatsta nuwamaritam pshturangina.
31 Ashirucha, Apanllimari wamachtash kizpur wanasiriya.
Mishat, Apanllimunari kuk chiy mangich tatukchi.
Tputs Apanllimunamari mang' tatku anoo uwshat ksutkiya.
32 ¿Tamamshat Apanllee kasiru min taaraa?
Mishat, ¿taamaam Apanll iyaa taarasheetsini kizpur wanasir ksutka?
33 Apanllimari kizpureeru, iyaa taarasheetsini tapachindakiya.
Mishat, yutaritshishireetsini tachingkiya.
34 Nuwaam istarangu, k'tseetsi murish wayarangu,
nuwshat manllanus ashiruri machpitaa káriranguri, nda pantsarangina.
35 Apanll tapazeemtam waratamaam nuwaa tuxapshingarangiya.
Ashirangu, nuwshat wizpuriri kapung taaranguri,
tsaktsakaa ngusambaatstaa tinamaa yáyaruri,
mbamaatstaa tsak ashirangina tputseem pachamaama.
36 Apaa, shiyamari nuwaa tapachindarangush, nuwshat kamungarangina.
Amb ashirangush, nuwamari kizpur taakina.
37 Nuwaa wanasirip ngoots tuyamandarangush,
nuwshat amb naataranguri, nda pakchiyam pantsarangina.
38 Ashirucha, kundarareetsi pacharanguri, nuwamari ashparitaa kachingaranguri,
yusur nuwamaritam kanapurangina.
39 Nuwamari kundarareetsi izuuru kachingeeri, zurampatari tpachingarangina.
Pantsarangusin, ayamtaati yusur chiyzachazinllinaja.
Nuwanungiri tum tum ashiranganaya.
40 Apanllsha nuwaa kapung wizpurireemi panarangiya tapazeem waratamaama.
Ashirangu, yuw tputs nuwaa natsamaam zandarangana,
anoo nuwamari kasiranguri, nuwanungeem timuchta ashiranganaya.
41 Itaru, nuwshat kundarari kizpur puniksin suwaranganaya.
Amb sheeruri, kundarareetsi nuwamari kasirangina.
42 Ashirangsin, tputseewaatstam istanda tárangitaatssin,
itaru tputsshitisin nda istaranganaya.
Apanllingaztam kuruzurangsin, Apanllshat nduntam mazinarangiya.
43 Izuuru kachingaranguri, tsapoo tachuwchayaruch, wasipureem ínatarich ashirangina.
Ashiranguri, tsiparimun kapcharanguri, sharamungash kapchatarich ashirangina.
44 Apaa, tputs iyaa natsarangana anoo shiyshat tpachingarush, nuwaa kurakaam ínarangsha.
Ashirangush, na tputs ichingarusin nduntaa nuwaa natstaksin, k'keetsi payukanaya.
45 Arapcheewtamsin nuwash kuseersin, nuwaa kis ungirtakanaya.
Yuwaatstam kamachtaki anootstam kis mazinayarusin, payukanaya.
46 Tputs arapcheew kuseersin, nuwaa nungtaksin,
tapishutusin, púnirpatari kuskanaya.
47 Ashiri Apaa, shiyamari urutamari taatsha. Shiyashumari nuw kamungkina.
Shiyaatsimari nuw wanasir tsiyatchima. Shiy nuwaa taaraasheetsi tapachindaksha.
48 Shiyshat Apanlleerush kurandarareetsini kisatarangish.
Tputsshitisin ichingaru na nuwaa ksutkanaya.
49 Apaa, nuwaa kundarari natsamaam zandarangtaatssin,
itaru shiyshat Apanlleerush, nuwaa kundarari kizpureewaatstaa,
ashtaa nuwaa tapachindarangsha.
50 Ashirucha, yuwamand ashirangish anumand
nuwshat ichingarupa tsapurunas shiyaa surish shambatkiniya.*Yuwaa nish átu anootstam Romshucheema 15.9 tayusima kamankiya.
51 Shiyamari kasirangush, nuwaatssha kurakaam ínarangsha.
Shiy kurakish kizpureerush, shaana nuwaa kurakaam ipusarangsha.
Shiy urutamari nuwaa, mishat chinllineetstamti kis napaksha,
Dapiy tárangiya.
Ashiriya, na kamaneena yuwaa Dapiyarini yaseeku tárangu anootsi.