Apanlli Kuku Daniela 7

Ashiri na kamanchintspa yuwaa Apanll nuwaa Danielaatsi yuwaa ashtachu anoo wasina kamanirangu anootsi

1 Yuwash Belsasar Babiloniyashcheem urkar kaneeschiri kinayaru, anush nuw Danieli maaranlluri pamasarangina. Támaranguri, yuwaatssha pamasirangi anoo kirakamun yandarangina.

2 Nuw mirinish pamaskuri, kambusur piyam kusku piyam kusku ashirangu, washunand ipunpunar tamapari ashiru kizpur pantsatarangu, mar kapungumash warastarangiya.

3 Anoo naparuri, yap nda chinari amb maachi kaniz ashiru, ipunpunar kizpur kapunguwa, nllitaritaw nllitaritaw ashiru maarish kung shitungaranganaya.*

4 Ichtaru manginshuch tumuz tamapari ashiru shitungarangiya. Itaru, wazitpungachsha yungan wazitpungach tamapari ashiru parangina. Ashiri naparuri, wazitpungach kxuyaru, tputs tamapari ashisha kinarangu, tumuzeetssha ichiyzarangiya. Mishat, mangsha tputs chínash tamaparee ashiritam chinarangiya.

5 Tsimbunurinsha, kungush shitungarangu, an, makin tamapari ashiru, Xiyaytar ashirangiya. Tuchip maachi watandaram kukush kapoo ashirangiya. Anootssha naparuri, k'kuzee mazinarangina; Chiyzayarush, naayarush, wanuts zapan ktungangcha. Sheerush, tazazangcha, tárangiya.

6 Tuchparinsha tumuztam kapungumash kungush shitungarangu, ansha ipunpunar wazitpungach ushimun taarangiya. Mishat, much ipunpunartam taarangitamta. An wizpur kapung tputsee ichingaru kasimaam waritarangiya.*

7 Anumunsha ipunpunarinsha, kázamshee parangitamana. Kizpur yutarit napuxtamashi. Wizpur kapung kasiru taarangiya. Wanassha wazuraneewa ngusambawaa mbamawmuna. Anpa tputsee zayaru, katsupambayaru, katungeeru, yuwaa katuchkachu anoo kátimbayaru, kasarangiya. Yuw tuchip parangi anumand nllitarisha parangina. Muchushsha wits minam chung taarangiya.*

8 Nuwsha witsee napanapaw ashiranguri, misha wits pakichsha muchush shitungarangiya. Wits pakchitaa, tachtaru wits kapung taarangu anoo tuchip itusheeru, kapeeteeru, anush wits pakchimashsha kxoonarangiya. An wits wach chiy tputsich kachich tamapari ashiru taarangiya. Kuktam taarangiya. Tputsee natsaku, waanaatstamarisha chinaku kapung tsiyatarangiya.*

9 Ashiri nuw wandari napanapaw ashiranguri,

kuxinshish zapan yakarangu anootssha parangina.*

Anumunsha Apanll Taarashipan kuxinarangiya.

Wamarsha kizpur mburshimuna. Muchsha kizpuritam mburshimuna.*

Apanll uxinash turikchimash taarangiya.

Sumas tamapari ashiru kizpur kurakurtar ashirangiya.

10 Anushsha kuxinshishish kung ashiru sumas shtungatar ashirangiya.

Apanll muchchur zapaniri milo Apanllee ksutaranganaya.

Mishat, tputs minllunaritam xiyarutarusin Apanllee ungirtaranganaya.

Yuwsha Apanll waana tputsee natstamapaneem ipusarangu anshitisin kuxinartayarusin,

kirakachsha yandama natstamaam tawataranganaya.*

11 Nuwsha, yusur kázamshee napanapaw ashiranguri, yuw wits pakich shitungarangu an mantsir tsiyatarangu anoo, mazinaranguri kapung punirustarangina. Ashiritaa napanapaw ashiranguri, tputssha kázamshee putayarusin, pachayarusin, isisingambeersin izuuru sumasush muchimaam pshtaranganaya.

12 Minootssha kázamshee ichingaru wizpur itutseersin, kasaranganaya. Nda pacharanganaya. Natumasam waani taachpa. Yuwash zar tatsamkachu anush pachapani, atusin kasaranganaya.

13 Nuw aranginasha pamazukuri, nllitarisha parangina.

Tputs ashiru psasish karuwatanu anoo parangina.*

Kusarangu, yapsha Taarashipan taaru ambsha naakchu,

Apanllsha wasundurur amb machtaranganaya.

14 Ashiri Apanllsha tsiyatku; Shiy na urutamari shiyamari kasirush taachsha.

Tputsee ichingaru shiyamari ksutaksha. Ichingarusin shiyaa chinachinllinaya.

Shiyaa kukish uru payuchinllinaya.

Tputs ichingaru tsapurunas yuwatamsin kukuwaatsiri tsiyatkana antamsin shiyaa kukish payuchinllinaya.*

Shiy urutamari kasirush tputsee ksutachsha.

Ayamamtiyam shiyaa kasichazinllinaja, ndambaree,

Apanll tárangiya.

15 Nuw Danieli, anoo ichingaru paranguri, mangishi kapung xararanguri punirangina. ¿Mayaama ashiru pakeeri? aturi, mangoonamaam xapookuri, 16 Apanll muchchur shaneerana annung káyamaranguri, yuwaa pamasirangi anoo kamanpanda aturi, masharangina. Ashiri Apanllee muchchur masharanguri, uwsha nuwaa kamanku tárangiya.

17 Yuw ipunpunar pamasirangish an watacha ipunpunartam tputs kurakaam kinakchusin tsapurunasee wamari kasichinllina anoom pamasarangsha.*

18 Itaru, anumun tsapurunasshuch kurak pastakchusin, Apanllsha tiptsir urutamari tsapurunasshuchee ksutkusin taachinllinaya. Ashkachu, Apanllimarisha kasiru taachiya,* Apanll muchchur nuwaa tárangiya.

19 Itaru, aranginasha yuwaa ipunpunar pamasirangi nllitaritawaa anootssha yasamaam zandarangitamana. Watam waamari kasiru mantsir, wanas ngusamb, wachizupsha ngusambawtam tputsee ichingaru zayaru, katungeeru, katuchimaatssha kátimbayaru, kasarangu anootstam yasamaam zandarangina.

20 Mishat, wits minam chung taarangu anoo yasamaam zandarangitamana. Anumunsha witstam pakich yuw wamari kasirangu, witsee tuchip yuxirangu, mishat wachtam, kuktam taaru, kapung yutarit tsiyatarangu anoo ashpari yasamaam zandarangina.

21 Ashiri yuwaatssha wits pakchimash parangi, Apanllpa tiptsir waratarangu, wamari kasimaam pakchim pishtarangu, 22 itaru, Apanllsha anush kusarangu, waanaatsee tiptsir tapachindarangu,* amb ashkachu, Apanll kuk tatsamoorangu, tiptsireem wizpur panarangu, urutamarishat tsapurunasshuchee ksutamaam wayarangu, anoo yasamaam zandarangitamana.

23 Ashiriya, Apanll wasundurur nuwaa tárangiya:

Kázamish ipunpunarurini pamasirangish an tputs ipunpunarurinsha kurakaam kinakchu,

tsapurunasshuchee kasiru taachiya. Watam uw nllitaritawa.

Tputsee ashpaatsiri tayutaritchiya.

Kátimbayaru, itsupambayaru kasachiya.

24 Minam chung wits parangish ansha tputs chungatam kurakaam tsipasaw kinachinllinaya.*

Itaru, anush minum kurakaam waanamuntari wizpur kinakchu, an nllitari ichingarumand kurak taachiya.

Ashkachu, ichtaru chung kurakaa kinaru taarana anchichee tuchip kapeetchiya.

25 Apanllee kizpureetstaa yutarit tsiyatkachu, tiptsireetstam zapan pachachinllinaya.

Tputsee kamachtakachu, Apanllee kamachtamarinee payurintspa.

Mishat, Apanlleem shambatamaam shaniyintspa, tákchu,

Apanllee tiptsir kasiyaru, kiyung yachachiya.

Tuchip masach chawip ashku taachiya.

26 Itaru, Apanll waana natstamapaneem ipusarangu anshtisin,

izuuru waneengcha, tákchusin,

uwsha anoo wizpur yanpukchu, izuuru pachayaru, watstamari kapeetchiya.

27 Ashkachu, Apanllsha tiptsireem wizpuree panakchu,

urutamarisha tsapurunasshuchee kurak ichingaru kasirsin taachinllinaya.*

Tputsee ztaru ksutchinllinaya.

Sheeru, tsapurunashuchsha tputs Apanlleetsimarisha chinakchusin,

kukoo izuuru payuchinllinaya,

Apanll muchchur nuwaa kamanku tárangiya.

28 In watacha tsiyatssi yuw pamasaranguri, nuw mangi kapung xararangi. Mishat, punikuri kaxiwatarangi. Itaru, nda minamtiyam tputsee pamasamareetsi kamanirangina. Anoo iwatspayana.

Ashiri na kamaneena yuwaa Apanll nuwaa Danielaatsi yuw ashtachu anoo wasina kamanirangu anootsi.

*7:3 Apanll wanichu anu 13.1; 17.8 tsiyatsis nipta tatsamooru taaritamta.

*7:6 Apanll wanichu anu 13.2 tsiyatsis nipta tatsamooru taaritamta.

*7:7 Apanll wanichu anu 12.3 tsiyatsis nipta tatsamooru taaritamta.

*7:8 Apanll wanichu anu 13.5-6 tsiyatsis nipta tatsamooru taaritamta.

*7:9 Apanll wanichu anu 20.4 tsiyatsis nipta tatsamooru taaritamta.

*7:9 Apanll wanichu anu 1.14 tsiyatsis nipta tatsamooru taaritamta.

*7:10 Apanll wanichu anu 20.12-13 tsiyatsis nipta tatsamooru taaritamta.

*7:13 Matiwa 24.30; 26.64; Márkosa 13.26; 14.62; Lukasa 21.27; Apanll wanichu anu 1.7; 14.14 tsiyatsis nipta tatsamooru taaritamta.

*7:14 Apanll wanichu anu 11.15 tsiyatsis nipta tatsamooru taaritamta.

*7:17 Apanll wanichu anu 7.1 tsiyatsis nipta tatsamooru taaritamta.

*7:18 Apanll wanichu anu 22.5 tsiyatsis nipta tatsamooru taaritamta.

*7:22 Apanll wanichu anu 20.4 tsiyatsis nipta tatsamooru taaritamta.

*7:24 Apanll wanichu anu 17.12 tsiyatsis nipta tatsamooru taaritamta.

*7:27 Apanll wanichu anu 20.4 tsiyatsis nipta tatsamooru taaritamta.