20
Ashiriya, na kamanchintspa yuwaa Apanll Israelchichee kamachtamarinee minam chung kamachtarangu anootsi
1 Ashiri Apanll tárangiya Israelchicheetsi tputsi.
2 Nuw waatatana Taarashipani; siyaam Israelchichis Apanlliris. Siysa Ijiptosh tsap kiyung kachiykus taakus, nuwsha siyaa nayaniranguri tashitungarangi; nuw antana.
3 Ashiriya, siysa ngutis maacheetsi apanllireemis ínayarus; Anoo, In watacha Apanlli, tárintspa.
4 Mishat, ngutis maacheetsi tinayarus, anoo ungirtarintspa. Maachee kanindush taaku anoom ngutis ungirtarintspa. Maachee tsapush taaku anootstam ngutis ungirtarintspa. Mishat, maachee kungoo imurish taaku anoo ngutis ungirtarintspa. Anoo maachee ngutis tinarinllpa. 5 Mishat, anoo ngutis tutunlltayarus ungirtarintspa. Pakchiyam chinarintspa. Nuwaatsimari ungirtangtsa. Watam nuw Taarashipani Apanlli watsiynurinawa. Tputs nuwaa ngatkana anoo nuwsha waneekina. Wipaatstam wanichina; misha wachinllinootstam wanichima. 6 Itaru, yuw tputs nuwaa chinakana anootssha nuwsha kizpur chinachina; misha istachina. Siyachchee nlluranuri urutamari istachima. Itaru, yuw tputs nuwaa chinakana anootsimtiya.
7 Mishat, nuwaa Taarashipaneetsi, siy Apanllireetsis, ngutis ngicheerus, tamasingarus tsiyatintspa. Amb ashkachus, nuwsha siyaa wanichintspa yuwamand siy nuwaa ngicheerus tsiyatkis anumanda.
8 Ashiri misha, sabadu zari nuwaa Taarashipaneetsi, siy Apanllireetsis, chinamaam mbizarintspa. 9 Ashiri minamtash siman tarawaztakus, minam matayaru zari tarawaztangsa. 10 Itaru, zar tsimbun mataykachu anush kanusangtsa. Kanuskus, nuwaa ungirtangtsa; misha anush zar pakchiyam tarawaztarintspa. Mishat, ipartamtish kamuz, misha iparish kiz tarawaztarusinapa. Mishat, m'chachiritamtish kamuz, misha m'chachirish kiz tarawaztarusinapa. Mishat, chinllinitamtis, misha yuw tputs nllitari shiyapa taakana antamsin tarawaztarusinapa. 11 Watam nuw, Taarashipani maacheetsi tinaranguri, minam matayaru zar yuwaparanginawa, kanindaatsi, misha tsapootsi, misha maree kung kapungootsi yuw na ichinguru taakana anootsi. Ashiri nuw kanusirangina tsimbunush matayaru zari, Ashirucha, anoo zar nuw kanusisheem wayarangina. Ashiriya, anush zari siysa nuwaa ungirtangtsa.
12 Ashiri misha siyaa tina; Apareetsis wanasir ksutangtsa. Kuk payungtsa. Aneereetstamtish wanasir ksutangtsa; kukoo payungtamtsa.* Yuwaa nish átu anootstam Matiwa 15.4, misha Márkosa 7.10, misha Lukasa 18.20, misha Ipísshucheema 6.2-3 tayusima kamankiya. Ashkinaareesa ashiru, wambari siyamari wachinaru taatssa yuwash nuw, Taarashipani, siyaam tsapuneemis panakchi anshuya.
13 Ashiri ngutis tputsee pcharintspa.
14 Izanlleetsimaritish ksutangtsa. Minpa kiz imbangartarintspa.
15 Maacheetsi shuchirintspa.
16 Tputsee mantsir tsiyatintspa. Tputsee ngichintspa.* Yuwaa nish átu anootstam Matiwa 19.18-19, misha Márkosa 10.19, misha Romshucheema 13.9 tayusima kamankiya.
17 Tputsingaz pangu tamararintspa. Siyamari kasiyarus, tputsee maachiri payuru anoo yamaam chinarintspa. Tputsingaz wizanll tamararintspa. Tputsingaz muchchur tamararintspa. Tputsingaz muchchur wizanur tamararintspa. Tputsingaz chin tamararintspa. Yuw tputs maachiri payukana anungaz tamararintspa.* Yuwaa nish átu anootstam Romshucheema 13.9 tayusima kamankiya. Izuuru mapiyngtsa, Taarashipan Israelchichee kamachtaku tárangiya.
Ashiriya, na kamaneena yuwaa Apanll minam chung kamachtamarinee Israelchichee kamachtarangu anootsi.
Ashiriya, na kamanchintspa yuwaa Israelchich Apanllee kapung punirangana anootsi
18 Ashiriya, Israelchichsha kariyaa, misha wakaraa wits mazinayarusin, misha mamarootstam, misha psaseetstam parangusin yuwaa machee yambutarangu anoo parangusin, kizpurinasha puniranganaya. Arapeetarisha shaneersin, napatarach ashiranganaya. 19 Ashiri Móysisee tsiyatkatssin; Na wapaya Apanll tsiyatamaamaya. Waritayanllcha. Ashiri shiyaa kukish payuchshapariniya. Mishat, Apanlleetstam kuk tuminchitampariniya. Itaru, nimun Apanll yusur tsiyatkachinaari ashiru tsipachshapariniya, tputs Apanllee puniksin táranganaya. 20 Ashiri Móysissha; Punirintspa. Apanll siyaa yachaku ashkiya. Nuwaa kuki mazinayarusin, puniksin, izuuru nuwaa kuki payupana, átu, siyaa kamanirangiya. Mishat, punirsin, nda yutaritshishee chinapana, átu ashkiya, Móysisi Israelchichee tárangiya.
21 Itaru, Israelchichsha ashiritaa puniksin, arapinlltamari machee shaniyarsin, napatarach ashiranganaya. Itaru, Móysissha kayumarangiya yuwash psas tapeeru mzeetaru anshu, yuwash Apanll tsiyatstaru annungi.
Ashiriya, na kamaneena yuwaa Israelchich Apanllee kapung punirangana anootsi.
(Kapitoro 21-23) [Ashiri Móysissha machish Taarashipanpat tsiyatku kapung zaptarangiya. Machish taarangu anush Taarashipansha yusur arangeem Israelchicheem kamachtarangiya: Tputs waanpatatin wanasiri taamaam kamachtarangiya. Mishat, tputs nda kizapa yutarit taamaam kamachtarangitamta. Pukiree tputs, mishat mashindootstam, mishat m'chachuwaatstam, misha muchchureetstam nda kiyung yachamaam kamachtarangiya. Yuwaam tputsirish shiyaam tarawaztakana anoom, wanasiri tatsamooru tuwapangtsa, Apanll tárangiya. Mishat, tputs waanpatatin istamaam kamachtarangitamta. Mishat, tputs yutarit taaku anoo wanimaamtam kamachtarangitamta. Sheeru, zapan kamachtayaru, anumunsha; Ashiriya shiysha na karuwangcha. Karuweerush tputsee, nuwaa kamachtamari kamaningcha, tárangiya. Kamaneerush ichingurus nuwaa ungirtangtsa. Sheerush shiysha yusur ningeem káringcha, Apanll tárangiya.]
*20:12 Yuwaa nish átu anootstam Matiwa 15.4, misha Márkosa 7.10, misha Lukasa 18.20, misha Ipísshucheema 6.2-3 tayusima kamankiya.
*20:16 Yuwaa nish átu anootstam Matiwa 19.18-19, misha Márkosa 10.19, misha Romshucheema 13.9 tayusima kamankiya.
*20:17 Yuwaa nish átu anootstam Romshucheema 13.9 tayusima kamankiya.