1 Ashiri Taarashipansha Móysisee tárangiya; Ashiri na shiysha tputsiriptish Kanaanap tsap naangcha. Yuwapat shaana tputsireetsish Ijiptosh tsap tashitungarangish anpat naangcha. Watam nuw sirútama Aprahamarinee, mishat Isaakarinee mishat Akoparinee; Siyaam tsapuneemis panachintspa, táranginawa. Ashiri siysa amb naangtsa, Taarashipani tárangiya. 2 Ashiri nuw nuwaanaatsi sundaruri siyaa machinaam zanganchima. Mishat, nuwsha Kanaanshucheetsi tputs ichingurootssin tuzanganichima; misha Amorrewshuchee, misha Hititshuchee, misha Feresewshuchee, Hebewshuchee, Jebusewshuchee ashiru ichingurusin ashpari tashitungachima; watam nuw sirúta shiyachchee panachintspa, táranginawa, Taarashipan tárangiya. 3 Ashiri siysa Kanaanap tsap izuuru naatssa, yap katungats ichinguru zapan taaru ambi, tárangiya. Itaru, nuw siyap Kanaanap tsap naacheezi, ndambari. Nuw siyap naakchinaareena ashiru, ipusirishapari ngootsush siyaa tpachingayaruri kasachina, watam siy nuwaa kuki nda pakchiyam payumaam zandaksawa, Taarashipan Móysisee tárangiya.

4 Ashiri Móysissha machip karuweeru Taarashipanee kuk tputsee kamanirangiya. Tputssha Taarashipanee kuk mazinayarusin, yuwaa Taarashipan; siyap naacheezi, ndambari, tárangu anu, mazinayarusin, punirustarangana. Kapung mang' mantsarangusin, tanuranganaya. Izuurusin wayarangashee wayaranganaya. 5 Watam Taarashipan Móysisee tárangitamta; Tputsee nuwaa kuki kamaningcha; Siy Israelchichis kizpur yutarittischa, tángcha. Nuw siyash anshurtanaari taaruri, ¡maya! siyaa ichingurupari tpachingachina mikeeruya. Ashiri siysa kamareetsis wanasirimsheewa, mishat yarangasheetstamtis ashpari ichingurus wayangtsa. Ashiri nuwaana nuw siyaa yasachima, átcha Taarashipani siyaatsi tángcha, Taarashipan Móysisee tárangiya. 6 Ashirucha, anuritam zar, yuwapur Israelchich tsap Orebush taarangana anpur, Apanllee puniksin, tputs wayarangashee wayayarusin, ndusha yartaranaya.

Ashiri na kamaneena yuwaa Taarashipan Móysisee; Tputsiriptish tsap Kanaanap naangcha, tárangu anootsi.

7 Ashiri Móysisi minam pangus, Apanlleem pangu pakich arapinlltam waanitam panguyaru kasarangiya. Anoo pangus Taarashipanpat tsiyatamaam átu, wayarangiya. Ashiri tputssha Apanllpa tsiyatpi átu, waanshu pang' shitungeeru, Apanllish pang' pshtuyarusin, Apanllpat Taarashipanpat tsiyataranganaya. 8 Ashiri Móysisi uru Apanllip pang' naamachu, ichingurusin tputssha pangumandarisha washitungash xiyeertayarusin, napatarach Móysisee ashtaranaya. 9 Móysissha Apanllush pang' pshtukchu, psassha kanindap káyashinu karuwataranllu, Apanllee pang' puputaran izuuru yambutatara ashtariya. Sheeru, Taarashipansha Móysispa tsiyatstar ashtariya. 10 Sheeru, tputssha msasee Apanllee pang' yambutaru anoo pakeersin, uwshtisin uru pangumandari washitungashinungiri ichingurusin tutunlltayarusin, Taarashipanee ungirtataranaya. 11 Ashiri Taarashipansha wandari tsiyatstar Móysispata ashirangiya. Tputs tamatarpari wamkurpa tsiyataru ashiritam Taarashipan Móysispat uru tsiyatstar ashtariya. Tsiyatamaam iwatspayaru, Móysissha waptamta pangup kanapurangiya. Itaru, wipunashsha kanungas Josuey, Nomarini wipa, Apanllee pang' ksutku, anshuri taarangiya.

Ashiri na kamaneena yuwaa Móysis Apanlleem pang' taspat panguyaru, arapinlltam wayayaru, anush Taarashipanpat tsiyatarana anootsi.

12 Ashiri Móysis Apanllish pang' tsiyatku, Taarashipanee; Apaa, nuwaa nayaninda, tárangiya. Mazinangcha nuwaa kuki, watam shaana nuwaa; Tputsireetsish shaana machingcha Kanaanap tsapu, tárangshawa. Itaru Apaa, ¿chakaja nuwaam istamaam zanganchish? Anoo shiy nuwaa nda kamanirangshawa, tárangiya. Mishat, Apaa, shiy tárangitamsha nuwaatsi; Shiy wanasirtishcha; nuw shiyaa amikurtana, shaana nuwaa tárangshawa. 13 Itaru, Apaa, shiy zurampatari nuwaa chinakush, ashiri nuwaa nayaningcha; yuw shaana mangishish chinakish anoo nuwaa kamaningandama. Ashiri nuwsha yasayaruri, yuwari shiy chinakish anuritam tuminchima, tárangiya. Itaru, Apaa, mbizarinllpa, nee tputsi shaana tputsirishshawa, watam shaana tputsireemish ipusarangshawa. Ashiri tputsireetsish nayaningcha, Móysis Taarashipanee tsiyatku tárangiya. 14 Ashiri Taarashipansha; Ashiri nuwsha shiyapa ipunchima shiy mangish mapiymaama. Shiyaa istachima, Taarashipan tárangiya. 15 Itaru, Móysissha; Itaru, Apaa, shiy tputsiriptish ipunamaam ngatkeesha, ashiri iyaa arangeem zanganinllpa, tárangiya Móysisi. 16 Mishat, Apaa, shiy iyapa ichingurootsini ipunamaam ngatkush, antaati shiy iyaa tputsireezish, ndambaree. Nllitaritpazini tputsini ashiruparee taachiniya. Itaru, shiy iyaa ksutkachush, mishat iyapa ipunkachush, iysha shiyamunparee wizpurish taachiniya. Ndusha nllitaritpaz tputs ashiru taachiniya, Móysis tárangiya. 17 Ashiri Taarashipansha; Watam shiy nuwaa masharangshawa, ashiri yuwari shiy nuwaa mashirangish anuritam tuminchima. Siyapa ichinguruptis ipuneeruri naachima. Watam nuw shiyaa kapung chinakinawa, misha watam nuw shiyaa amikuritamanawa, Taarashipan Móysisee tárangiya.

18 Ashiri Móysissha; Apaa, nuw shiyaa izuuru pangasi átana; shiyaa wizpurish wanasirimshireetsish pangpi atina, tárangiya. 19 Itaru, Taarashipansha; Nuw nuwaantari shiyaa arangeem yamazaru naachima. Anumunsha nuwaanaatsi, Taarashipaneetsi suri shiyaa arangeem yasamaam, izuuru mangoonamaam, kamanchinllpa. Nuw Taarashipani; nuw tputsee, yuwaa nuwaana chinaki anoo nayanichima. Mishat, yuwaa tputsee nuwaana chinaki anoo yutaritshishirinee mbizachima.*Yuwaa nish átu anootstam Romshucheema 9.15 tayusima kamankiya. 20 Itaru, shiyaa nuw itsinsaru kamanchinllpa; tputs minamtiyam nuwaa kachi patareeja. Nuwaa pamaam pinascha. Nuwaa pakchu, tputs izuuru tsipachiya. 21 Itaru, mazinangcha; machush íwari patumbich kapungumash taarcha. Anush nuwaa watsiritkachush anshuri k'tangcha. 22 Sheeru, nuwsha anush shiyanung tushiychima. Tushiykchuri, shiyaa patumbchish kachutamash pshtachinllpa. Sheeru, kuwippati kámanachintspa. Ashiri anumun, shiy nuwaa yasachsha yuwaa nuw tushiyranlli anootsi. Mishat, nuwaa kuki mazinachsha; itaru, nuwaa nda pangachsha. 23 Sheeruri, yuwaa patumbchimun kuwipti patateeruri, kasata ashkachuri, anumun shiysha nuwaa kusheetsimariti pangachsha. Itaru, kcheetsti pangcheezish, ndambaree, Taarashipan Móysisee tárangiya.