1 Apanll nuwaa kamachtaku, tárangiya. 2 Israelshuchish tsiyatsis uru taariya. Wapar wachin kapzee katungkachu, wipsha wanas kapzimun chtay ashchiya, atanaya. ¿Mayaamsha Israelchich anoo tsiyatsis tayus tayus ashkanaya? 3 Nuw Taarashipaneeruri siyaa atina. Nuwaanamuni suri zurampatari atina. Ayamtaati siysa anoo yusur tsiyatcheezis. 4 Yuw tputs yutaritshishee chinakana, anootsiri waneekchuri, tsipachinllinaya. ¿Antaati nuw waparimand yutaritshishiri wipaa wanicheezi? nda. Nuw tputsee ichingaru amuytakina. Ashirucha, itsinsaru natstayaruri, amuyaatsiri waneekina.

5 Tputs wanasirimash taarash watacha wanasir taatarasha. 6 An tputs apanllputsip machip íwar kárkachu, anush nda apanllputseem shambatshisheem pshtukiya. Mishat, nduntam ngichzimun apanllputsimun Israelchichimun mang' tatkiya. Mishat, nduntam wamkuree wizanll itutskitamta. Ashiritam, wizanll yuwash kurasee mantsaru anush nda ipunkiya. 7 Mishat, minamtiyam tputsee nda kiyung yachakiya. Wandtaati tputseem urkirpa istarangu, Arangiri suwatpa, átu, maachiritaa púnlluree yarangu, anoo yusur kachizpazsha púnlluree tuwanpukiya. Mishat, minamtiyam nda tputsee maachiri shuchikiya. Tputsee nayaniku, mariz kayatku anoom katungtsee istakiya. Yuwaatssha tputs zapeeku anoomtam wamareem panakiya.*Matiwa 25.35-40 tsiyatsis nipta tatsamooru taaritamta. 8 Urkirpa tputseem istaku, nda anumand, Arangeem tuwapangandama, atiya. Mishat, tputs waanpatatin tsiyatssee yaramaam zandkusin, ichingaru mazinayaru, itsinsaru yasayaru, yuwaatsiri yutarit tsiyatarangu anootsiri waneeku, tputsee wanasirimsheetssha kis napkiya. 9 Yuw nuwaana kamachtarangi anoo tatsamaru, wanasir waanaatsi yámandaku, taarash wanasiriri taaku, kamachtamareetsi payuku, an tputs zurumarpataricha tsinsa. An urutamari taaratartachiya. Nuwsha Apanlleeruri anumashee tputs kis napchima, Apanll tárangiya.

10 Itaru, insha tputs wip tayutaritamapan pachampan xarashee wayampaniri taaku, 11 itaru waparsha anumashee nda chinarangu, wipamarisha mantsir taaku, apanllputsip machip íwar kárkachu, anush apanllputsish shambatshishush pshtuku, kis apanllputseem tínarana anumun mang' tatku, misha wamkureetstaa wizanll itutseeru yamaku, 12 tputsee pukiri kiyung yachaku, misha tputseetssha maachiree shuchikitam, misha urkiree tputseem istaku, anumand maachiritaa yaku, itaru ayamtaa anoo nda tuwanpuku, ashiritam apanllputsimun mang' tatku, ngichzimunari apanllputsimun yuwaa nuw kizpur tsiyantakuri, ksimun musáki, anoo kis chinaku, 13 tputseem kurikee nayanikina, mangu átu, itaru yusursha tamundaku, arangitamanasha kurikirish tuwanpungandama táta, táta ashku, anumash tputs zapan masach taacheeja. Ichinguru ashpari yuw mantsir ashkana anoo, nuw kizpur tsiyantakina. Nuwsha waneekchuri, izuuru watstamamari watsipunpatari pastachiya. Waanamand yutaritshishirini tsipachiya.

14 Mishat, apaz wapar yutaritshishush tachitku, itaru wipsha nda mantsirimshee chinaku, 15 misha apanllputsip machip íwar kárkachu, anush nda apanllputseem shambatshisheem pshtuku, misha nduntam ngichzimun apanllputsimun Israelchichimun mang' tatku, misha nduntam tputsee wamkuree wizanll itutsku, 16 nduntam minamtiyam tputsee kiyung yachaku, misha nda tamundaku, yuwaa kachiz tushiykchu anush maachiritaa yusur tuwanpuku, misha nduntam minamtiyam tputsee maachiri shuchiku, yuw tputs mariz kayatku anoom katungtsee istaku, yuw tputs zapeeku anoom wamareem panaku, 17 nda tputsee natsaku, mantsir tayutaritku, urkirpa tputsee istaku, ndusha, Arangeem tuwapangandama, átu, misha tputs waanpatatin tsiyatssee yaramaam zandkusin, ichingaru mazinayaru, itsinsaru yasayaru, yuwaatsiri yutarit taarangu anootsiri waneeku, wanasirimsheetssha tputs kis napku, misha nuwaanaa kamachtarangi anootsiritam tatsamku, wanasir waanaatsi yámandaku, an tputs waparimand yutaritshishirini nda tsipachiya. Itaru, zurampatari kis taachiya.

18 Itaru, waparsha mantsir taarangu, misha tputsee maachirita shuchirangitam, tputspatatin mantsirimash ashirangu; waanamandari yutaritshishirini waneeshimun tsipachparee.

19 Siy saanpatataa tsiyatkus, táchpasa, ¿Tamashtaja nda waparimand yutaritshishirini, wipsha nda tsipamaam waritak tuwapamaama? táchpasa. Itaru, nuwsha siyaa atina. Watam wipsha nda mantsir yutaritshishee patataranguwa. Tputspatatin wanasir chinarangiya. K'kuzee tuminurangiya. Nuwaa kamachtamari kapung mangoonarangiya. Ashirucha, amb ashirangu, zurumpatari kis taachiya. 20 Yuwamarisha mantsir tputs ashkana anumari tsipachinllinaya. Wipatam waparimand tumshir tuwapamaam pinasa, misha waparitam wipamand tumshir tuwapamaam pinasa. Tputs wanasirimash wanasirimsheetsimaritam taarash yachiya. Yutaritshishpansha tputs mantsirimsheetsiritam waneeshish pshtuchiya, Apanll tárangiya.

Ashiriya, na kamaneena yuwaa chaanaatsi ksutchich anootsi.

21 Apanll tárangiya; Yutaritshishpan tputs mantsirimshee kasakchinaareesinaya, nuwaatssha kuki payukchusin, wanasirsha taakchusin, tputsee wanasir tatsamooru chinakchusin, zurampatari an tputs tsipachazinllinaja. 22 Nuwsha yuwaa mantsir ashirangana anoo yusur ayamtaati chinacheezi. Yuwamand wanasirsha taakchinllina, anumand kisshaparee taachinllinaya. 23 Tputs mantsirimash msangaru tsipamaam nuw nda zandkina. Itaru, nuw tínatana; Taárashee mantsirimshee kasayarusin, wanasirsha taapana átana,*2 Pitoru 3.9 tsiyatsis nipta tatsamooru taaritamta. nuw Apanlli zurampatari atina.

24 Itaru, tputs wanasirimshee kasayarusin, mantsirimshishsha yusur pshtukchusin, yuwash tputs mantsirimish ashkana, anush ¿antaati an tputs arangiri taacheeja? nda. Ichtarima wanasir nuwash tachitarangsin, itaru anumunsha nuwaa kasakchusin, nuw anoo pakchiyam nayanikuri, tácheezi, ndambaree. Yutaritshishingaz chinarangusin, nuwaa kasaranganaya. Ashirucha, waanamandari chayarini waneekchuri, tsipachinllinaya, Apanll tárangiya. 25 Itaru, siy nuwaa; Apanll mangu tputsee waneekiya, táchpasa. Itaru, mazinangints, Israelchichis. Siy; ¿Mayaamsa anoo chinakus, nuwaa yutaritam ínaksa? Saantari sáricheeru mantsir chinaksa. Watam siy mantsir taarasheetsis yámandaksawa.

26 Tputs taarashish wanasirimshee kasayaru, mantsirimshishsha pshtukchu, tputsee nda tatsamooru chinaku, tsipatshaparee, yuwamand mantsir patatku anumandarita. 27 Itaru, tputs yutaritshishee izuuru kasayaru, wanasirsha taakchu, kamungachshaparee. 28 Waanaatsi mangoo p'tseeku, Xam; ¿nuw tamakuri ashkina? átu, ichingaru mantsir ashku anoo kapeetkachu, zurampatari an tputs zapan masach kis taachiya, atina; waneeshshee ndusha taachachiya.

29 Itaru, siy Israelchichis nuwaa; Apanll mangu tputsee waneekiya, átpasa. Siy; ¿Mayaamsa anoo chinakus, nuwaa yutaritam ínaksa? Saantari sáricheeru mantsir chinaksa. Nda itsinsaru mangoonaksa. 30 Nuw siyaa minamtawaatsiritis natstayaruri, Israelchicheetsis yuwamand mantsir ashirangis, anumand wanichintspa.*Matiwa 16.27; Romshucheema 2.6 tsiyatsis nipta tatsamooru taaritamta. Nuw Apanlleeruri atina; Nda ashishtamaam yutaritshisheetsis ksangints, zurampatari atina. 31 Yuw ichinguru yutaritshishee mantsir patatarangis anoo ksangtsa. Nuw ashkis anoo nda kis naparangina. Ksimun musárangina. Mangooz kaneesichsha chinangints, watam ndunnaa ashkus, Israelchichis uru tsipatssawa. 32 Nuw tina; Siyaa nda waani tsipapana, atina. Yutaritshishireetsis ksangtsa. Ashkachus, kis taachpasa, nuw Apanlli zurampatari atina, Apanll tárangiya.*2 Pitoru 3.9 tsiyatsis nipta tatsamooru taaritamta.

Ashiriya, kamaneena yuwaa Apanll, Yutaritshishee kasakchus, ndusha siyaa wanichintspa, tárangu anootsi.