49
Ashiriya, na kamanchintspa yuwaatssha Akoparini mutatanasha tsipachu wipawaa ashpari waneeyaru kasarangu anootsi
1 Akoparini wipaa ashpari kuruzeeru, Naanints. Nuwash kusangints. Siyaa wanasir taamaam wanichintspa. Nuw tsipaktaateena, saani tsapunshish tamayareezis ayam taachis anoo kamanchintspa.
2 Siysa nuwaa Israelaatsi k'keetsi mazinangtsa,
Nuw siyaa ipareetseeruri wanichintspa,
tárangu, wipaa putsisarinee tasaseeru,
3 Mshee Rubenaa, shiycha iwachiztamish,
watam shiyaatsima kanungastamasi iparinarangina.
Ashirucha, shiy putsisarush kurak tamapari ashirush zuwanlleetsish ashpartaa kasiksha.
4 Shiy kung tamapari ashishtish, yapiri zandkish ambiri naakush taachsha.
Nimunarisha ndusha wizpurirish iwachiztam ashirush taachsha.
¿Antaati nuw shiyachcheem nlluranur tsapoo wanasirimshee panacheezi?
Yuwamand shiy nuwaa kapung tayutaritarangush,
izanlleetsi mashingamaa mangishish mantsir chinarangish anumanda,
tárangiya.
5 Minootssha wip:
Mshee Simeóna, shiyshat zuwanllpatartish Leviypat yutaritamtischa.
Nduntam wanasir taamaam zandaksa.
Siy watseenurtischa; tputsee nda naynirangus, mchitpat pacharangsa.
6 Ashirucha, yuwamand ashkis anumand yuwash shaniyeerus tsiyatstangat ashkis,
anush nuw nda pakchiyam mazinamaam zandkashina.
Watam piyartach tputs siyamand yutaritshishiris nuwaa yutaritaam ínarangandanaya.
Nduntaa nuw kamachtaranguri, kizpur tsiyantarangus,
siysa tputsee zapan pacharangsa.
Mishat, mang' ndunarpaz ashirus, wakaraatstam wirkar tururangus, kiyungutam yacharangsa.
7 Ashiriya, yuwamand ashirangis anumand waana Apanll siyaa wanichapantsa.
Nuwshat siyachcheem nlluranur Kanaanaa tsap panacheezi.
Uru maachiritshuw watsapun washunand yanpatarsin, taachinllinaya,
tárangiya.
8 Shiyachcheetssha, mshee Utaá, ayam nllurnur yuwaa kizpur kurakaw taakana,
anumun maachiritshitisin mang' tatkusin,
wanasir napchinllinaya.
Undarareetstam ichingaru kasirsin taachinllinaya.
Amb ashkatssin, maachiritshitisin waatsimarisha kukoo payuchinllinaya.
9 Mishat, shiyachchimari kizpur tumuz manginshuch tamapari ashirusin taachinllinaya.
Napangi, tumuz manginshuch ndaturi kizpur wachinaru, maacheetsi izuuru zamari zayaru, katungeeru, tazazasha,
yusur taarshishtam mang' kissha maamawmach ashtaru,
shiyachichsha ambitam undararee ashtachinllinaya.
¿Chakaja tputs yuwaa tumuz maamawamchu anoo naateeru muntayach?
10 Ambtam ashikpaz ashkusin, shiyachchimari ichingaroo tputs kasirsin taachinllinaya.
Shiyachich kizpur kurak urutari pishtacheeja, ndambari.
Itaru, nimun zapish kurak shiyachcheetsimarisha nlluranur kasiru kizpur kurak kuschiya.
Anootsimari uru kurakawtamsin istanda táchinllinaya.
Ichingaru tsapurunas anootsimaritam kurakaa kuk payuchinllinaya.
11 Mishat, mshee Utaá, shiyachchimari nlluranur
watsapun kizpur wanasir maachi zapan yusiyku, pzapanichiya.
Mazarish maachi zapan yusiykchu,
anush burrurintamsin wippat mapiyrsin tazazarsin, maarutar ashtachiya.
Arang ndusha muntachiya.
Mishat, mazarish kizarun zapaneekchu,
kungpaz ashiru wakungur taakchu, anush tputs wamareetstaa káchamaam waritachiya.
12 Anuri ichingaru zar waksin,
wach chumbeepeewsha taachinllinaya.
Wakaraatstam mimir ichingaru zar waksin,
wanas mbursheewsha taachinllinaya.
Amb ashkusin, shamangarsin mang' kissha taachinllinaya,
tárangiya.
13 Shiyachichshat, mshee Sabulón;
ayam nlluranur mus kapungumashimun wing taachinllinaya.
Ashkatssin, anungaz tputs araanllash zapan mataychinllinaya.
Watsapuneemsha musamun wing pzingaru,
yakat Sidonamun ashchiri yachinllinaya,
tárangiya.
14 Ashiriya, mshee Isakaraa; shiyachichsha nlluranur kizpurinaa kizpureewtaatssin,
itaru burr tamapari ashirusin taachinllinaya.
Napangi, burr kizpuritaa kayak tuchipayaruch kanuspi átu, tsapush kuxineeru, kanusaramchu,
yusur chiyzapi átu, xapooptar ashtaru,
shiyachichsha nlluranur ashtachtamsinaya.
15 Natumasam watsapuneem yuwaa kizpur wanasiri anoo yachinllinaya.
Itaru, anumun zapish mishat tputs watsapunee itutschinllinaya.
Sheersin, waanaatstatam muchchureemsha wayakchusin,
kiyung kachiykusin taachinllinaya.
tárangiya.
16 Shiyachichshat, mshee Dan,
Israelchicheetstam nlluranur waanpatatamsin ksutchitampasinaya.
17 Napangi; maak ngootsish tsangayaru,
amb sundarsha kapaachumun kuxinaru iriptaranllu,
anoo wanashirish kapuxkachu,
kapaachsha sundaroo tsapush kapeetanganllu,
tpaw támach ashtaru ashtachinllinaya.
Amb ashkusin, waanaatsi tiptsiree tapachindachinllinaya,
tárangiya.
18 Tárangu, Apanlleetssha:
Apaa, nuwachchee nlluranur ksarinllpa;
tapachindangcha,
tárangu, anumun yusur minootssha wip tsiyatarangiya.
19 Shiyshat, mshee Gad; kizpurtishcha.
Shiyachcheengaz nlluranur tputs pachapani atusin, kuskitaatssin,
itaru waamarishtisin kasita, kasita ashkusin,
waanaatsi tapachindaksin taachinllinaya,
tárangiya.
20 Mshee Aseraa, shiyachichshat nlluranur tsap wanasirish taachinllinaya.
Wamaritssin katungats wanasirimshee zapan payuksin,
anungaz kurakawtamsin arapcheew kuseersin, mashchinllinaya,
tárangiya.
21 Mshee Neftaliy; shiyachichshat nlluranur manllanus tamatarpari ashirusin apusap taachinllinaya.
Napangi: manllanus machip mapiyru, wipaa machtat ashtaru,
uwshtisin ambitam ashkusin mapiyrsin taachinllinaya.
tárangiya.
22 Shiyshat, mshee Osiyaa; kizarun tamapari ashirush taaksha.
Napangi; kizarun kungunungiri wing tatsumeeruch, tandapunuzimun kuricheeru zapan pzeenaru,
wanus yusiyramchu, an ayamtaati pishtacheeja.
Shiyshat ambitam ashipaz ashtachsha.
23 Kundararish shiyaa natsarangitaatssin,
kiyungutaa yacharangusin, shiyaa pachamaam zandarangtaatssin,
24 itaru shiyshat nda sambaytarangush,
Apanllimun mangish taturangush,
Apanllsha shiyaa tapachindarangiya.
Apanll kizpureeru ashirangiya.
Watam nuwaa opeejpan tputs chinoo wanasir ksutaru ashiru ksutaranguwa.
Watam nuwaa patumbchishpaz wach tapshuku ashiru, nuwaa tapachindaranguwa.
25 Ashirucha, yuwamand nuwaa ksutarangu anumand Apanllsha shiyaatstam ksutkiya.
Apanll waana kizpureeru, Shiyaa uru istachshaparee.
Apanll shiyaa kis naparangu,
sinaatssha zanganirangu,
shiyash mzarish maachishsha zapan kxunachshaparee.
Mishat, tsapushumandsha kung kusarangiya.
Mishat, shiyachich wizanur uru mireechinllinaya.
Chineemtamtish zapantam pzapanichtamparee.
26 Nuwshat shiyachcheem Apanllee mashkuri,
Yuwaa tsap maachi ichingaru taaru anoo urutamari payuchinllinaya.
Uru katungats anush taachiya.
Nuw tsiyatki anoo shiyaam nlluranurish urutari istachiya.
Watam Apanll shiyaa zuwanlleemish ichingaroom ksutamaam ipusaranguwa,
tárangiya.
27 Mshee Benjaminaa, shiyachichshat nlluranur urutamari
maninung tamapari ashirusin,
undararee waamari kasichinllinaya.
Napangi: maninung puturi shitungeersin,
maacheetsi zamamari zayarusin, katungeersin,
pukamatsha wipaamsha anchichitam maritakanaya.
Ashiri siyachichshat nlluranur ambitam ashtachinllinaya,
tárangiya.
28 Ashiriya, Akoparini wipaa ichingaroo 12 tushaneeyaru, minoom tsiyata, minoom tsiyata sheeru, wipaam Apanllpa kapung masharangiya.
Ashiriya, na kamaneena yuwaa Akoparini wipaa ashparta waneeyaru, Apanllpa tsiyatarangu anootsi.
Ashiriya, na kamanchintspa yuwaatssha Akoparini tsiparangu anootsi
29-30 Minushsha zar Akoparini wipaatssha tsiyatarangu, Siyaa zurampatari táchintspa. Nuw kizpurshacha wachinayanlli: tsipachshaparina. Musásirishapari zitaminpat Apanllip ipunkamchuri, naachina. Ashiriya, tsipakchuri, siysa nuwaanpeetam tsapuni mapungasindama, yuwashutam zitaminarineewaa mapurangana anshutamta. Watam pachirini Aprahamarini anoo tsap Efronaa tputs Hititshuchee watsapun patumbchee wach mapshisheemari paxanxaranguwa. Ansha mapshish sur Makpela. Yakat Mamrenungiri watsiri taarangiya. 31 ¿Anush wanipaja zitaminarineetsini mapurangana? Aprahamarineetsi, Sararineetstam, aparneetstam Isaakarineetsi, aneerneetstam Rebekarineetsi, izanllineetstam Liyarineetsi ashpari anush tsap mapuranganaya. 32 Ashiriya, watam anoo tsap Aprahamarini izuurmamari mapshisheemari paxanxaranguwa. Ashiriya, siysa nuwaa anshutam mapungasindama, tárangiya.
33 Tárangu, wipaa ashpari waneeyaru, tsiyatam iwatsparamchu, anush tsipakchu, yuwash zitaminarini taakana anush Apanllip naatarangu, anshuri maamataraa ashirangiya.