42
Anush Job Apanllee wizpur parangu, Apanll kizpurcha, wamari ichinguru kasiriya, tárangu anoo kamanchintspa
1-2 Jobsha, Apanllee kuk ichingaru mazinarangu, Apaa, na shiyaa yasakina. Shiy kizpurtishcha. Shiyaam minumtiyam xarashish wanindaja. Mayaatsimasa shaana ashimaam zandaksha, anoo chinayachush uru anoo shiyamari tatsamooksha.
Nuw shiyaa yuwaa yacharangish anoo, nda yasaranguri, kapung yutarit tsiyatarangina, watam pakchiyam yuwaa ashirangish anoo nda mangoonaranginawa.
Ashiriya, anush shiy nuwaa, Natu, nuwaa kuki mazinangcha. Minum k'kuz mashchinllpa. Shiysha kamaningandama, tárangush, nuwsha shiyaa nda kamanimaam waritarangina. Sirú shiyaa kukish mazinaranguri, mangoonamana mangoonarangina. Natta in yuwaatsimari tsiyatkish anootsimari yasakina. Itaru, natunaa shiyaa kchiptarti pakeena. Ashirucha, shiyaa na kapung paziki, yuwamand mantsir zapan tsiyatarangi anumanda. Na nimun ndusha arangeem mantsirimshee tsiyatkuri, puzachshurisha yamuyaruri kuxinxinaw ashkuri taachima, tárangiya.
Apanll yusur Jobaa urkirpaneemtam ínarangiya.
Apanll Jobaa tsiyatamaam iwatsparamchu, anumunsha Elifasaatssha tárangiya: Yuwamand nda wanasir nuwaa tsiyatarangish, anumand shiyaa, amikurpatartish kapung tsiyantakina. Siysa Jobaa, Shiy yutarittishcha. Anumandcha Apanll shiyaa waneeksha, tárangsa. Itaru, Jobanaa zurampatari wanasir tsiyatarangiya. Ashiriya, siysa na toroo 7, misha opeejaa wip sietitam putayarus, yap nuw tputsiri Job taaru anush yushindayarus, pachayarus, saama yutaritshishiris yaramaam muchintsa. Ashkachus, nuwsha tputsiri Job siyaam nuwaa mashkachu, nuwsha waa kuk mazinakchuri, siyaa wanimaam waritarangitaati, ndusha siyaa wanichina. Nduntaati siy nuwaa wanasir tsiyatarangus, itaru Jobamand wanasirimshirini ashchima, Apanll tárangiya.
Anoo mazinarangusin, Elifas, Bildad, misha Sofar ashparitin naataranganaya. Pangush kuseersin, chinootssha putayarusin, Jobap machtaranganaya. Anushsha kuseersin, pachayarusin, muchirangsin, Jobsha wamkureem yutaritshishirinee tachingamaam Apanllpat tsiyatarangiya. Apanllsha Jobaa kuk mazinarangiya.
10 Job Apanllpa tsiyatam iwaparamchu, anumunsha Apanll, Jobaa yusur sirútama wanasir taarangu ashimatam wayarangiya. Chinoomsha sirútama chinurangu, anoo kánurinasha panarangiya. Maachiritamta ichingaru, misha muchchureemtam kánurinasha panarangitamta.
11 Ashirucha, anoo mazinarangusin, zoonll, wizar, wamkurtam yuw ichingarusin waa natsatarana, anin pangani atusin, naataranganaya. Anushsha kuseersin, pangush Jobpa washunand katungaranganaya. Yuwaa Apanll kapung Jobaa kiyung yacharangu, anumand mang' mantsarangusin, tsiyatstar ashiranganaya. Tputs yuw naatana anin minumtawaritssin kurikee, anichootstam, misha orootstam Jobaam panaranganaya.
12 Apanll Jobaa yachamaam iwatsparamchu, kapung istarangiya. Sirútama taarangu anoo kánurishta istarangiya.
14 mil opeeja, mishat
6 mil kameechu,
1 mil toroo tsimbunaw kintanatanaru,
burrootssha miltam panarangiya.
13 Wipsha pchingarangtaa, anumun yusur iparinarangiya. Kamuz 14, kiz 3 ashiru iparinarangiya. 14 Kiz minu Jemimá ísamarangiya. Tsimbunarineetssha Kesiyá ísamarangiya. Tuchparineetssha Karenhapok ísamarangiya.
15 An Job wip kiz kizpur wanasirimuna. Nda minumtiyam tsapurunasish anpa tatsamooru wanindamuna. Job watsipun pakcheemsha pshataru, wipaam maachiritaa wayarangiya. Kizaamtam, kamuzpatatam tatsamooru wayarangiya.
16-17 Yuwamun Job kapung kiyung kachiyarangu, anumun iwaz arangeem 140 masach kis taarangiya. Kizpur wachinayaru tsiparangiya. Ndatuma tsiparu, wachinllinoo, mishat wachinllinootstam wip, mishat wachinllinootstam arangeem iparinarangu anoo parangitamta.
Ashiriya yuwaa Apanll Jobaa aranginasha istarangu anoo na kamaneena.
[Watamcha Jobarini kuku.]