2
Ashiri Jonas kayupchish chik taaru, Apanllpa tsiyatarangiya.
 
Apaa, nuwaanamand yutaritshishiri shiyaa mashkina.
Itaru, shiysha Apaa, yuwaa nuw shiyaa mashki anoo mazinangcha.
Izuuru tsipamaam waritakuri, shiyaa mashkina.
Shiy imurish marush nuwaa kasarangsha.
Kungsha nuwaa waras purangiya. Nuwamunsha kung warastatar ashirangiya.
Itaru, nuwsha shiyaa wanasirimshirish tácharangina.
Ashiri nuwsha mangishi chinakuri, Apanllee pang' ndunpari pangchina, táranguri,
kungsha izuuru nuwaa purangiya. Imurish wantsush nuwaa tapshturangiya.
Mishat, tundunarputssha muchimunutamti izuuru kpatarangiya.
Nuw izuuru kungush wantsush yangarangina. Tsapumun tamoo ashirangina.
Yuwaa ashtachish anoo nuw urutari wasina waneeshee yasarangina.
Ashiritaa Apaa, shiy nuwaa tsipani tapachindarangsha.
Nuw, Tsipachparina, táranguri, anush shiyaa yusur chinarangina.
Apaa, pangimandish nuwaa kuki yuwaa mashki anoo mazinarangsha.
Itaru Apaa, yuw tputs apanllputsee chinakana,
anshitisin nda shiyaa wanasireem ínakanaya.
Itaru, ayamsha nuw zurampatari maachi wayayruri, shiyaam muchchima.
Watam shiy nuwaa tapachindakshawa,
 
Jonas kayupish tápun taaru, tárangiya.
10 Ashiri Apanll kayupchee kamachtarangu, kayupichsha Jonasaa tsapumun wanasirimun katarangiya.