1-2 Apanll Taarashipan Móysisee tárangiya, Shiysha Israelchichee tputsee nuwaa kuki kamaningcha. Nuw waatatana siy Apanlliris Taarashipani. Nuwamari wanasiriri taakina; nda mantsir chinamaam yasarina. Siysa ichingurus nuwaa kuki payungtsa; wanasir taangtsa.*Matiwa 5.48 tsiyatsis nipta tatsamooru taaritamta. Itaru, Yuwaa nish átu anootstam 1 Pitoru 1.16 tayusima kamankiya. 3 Siyaa táchintspa; Siy aneereetsis chinangtsa; apareetstamtis chinangtamtsa. Mishat, siy ichingurus urutari kanusisush kanuskus taangtsa.

4 Mishat, yashingoo chinarintspa. Apanllputsimun mangis tatintspa. Ayamamtiyam apanllputsee tinayarus, anoo ungirtarintspa. Nuwamari waatatana Apanlli Taarashipani.

5 Mishat, shiyaa táchintspa, Tputs nuwapa tatsuyamaam zandkusin, mangiptis opeejareetsis karupana pachayarus, nuwaam muchingtsa. Ashkachus, nuwsha siyaa kis napchintsa. 6 Opeejaa karupana pachayarus, anumunsha wanutsee ktungangtsa. Wandaya wanutsee katuchkachus, putam zari katungamaam wayangtsa. Itaru, anoo tuchparini zar katuchkachus, ashiriya, anootsina muchingtsa. 7 Itaru, tputs tuchpash zar wanutsee katungkachu, nuwsha nda siyaa yutaritshishireetsis tachingchina, atina. Anoo tputs tsachikchuri, ndusha chinachina. 8 Tputs tuchpash zar katungkachinaari, waanamandari chayarini kiyung kachiychiya. Siysa anoo tputs tsapunshis izuuru tshitungangtsa. Anoo tputs izuuru ayamta naynirintspa, watam nuwaa Apanlleetsi k'keetsi kapeeteenlluwa, siyaa atashina.

Na kamaneena yuwaa Apanll Móysisee, Wanasir taangtsa, tárangu anootsi.

9 Tirikureetsis pusamaam zar tatsamkachu, mzarshis chapung wayandapsheewa ngutaritis ksangtsa; yuw tsapush paratungtaru anoo tapuyarintspa; waani taachpa. 10 Kizarunaatssha pusakus, tsapush pantsatamawaa tapuyarintspa. Izuuru ksangtsa. Pukirireew, tunareewtam tputs waani tapuychinllinpa. Nuw waatatana Apanlli Taarashipani siyaa atashina.

11 Mishat, siyaa tina; Shuchirintspa. Mishat, nllitaritawaa tputsi ngichintspa. Ngutis nllitaritaa tputs tamapingarintspa. 12 Ngutis tputsee, nuw Apanllimun zureerutana áti, ngichzee ngichpi átus, tárintspa. Nuw waatatana tsinsampantana. Ashiri siy ngutis nuwaa yutaritaam ínarispa, siyaa atashina. 13 Mishat, tputspatatis waratintspa. Mangishis chinakus, Nuwamari kasiyaruri, maachiritaa itutsichima, tárintspa. Mishat, siy tputsiris tarawaztampan taarinaari, tuwapamaam zaree zapshtarintspa.

14 Mishat, tputsee mitsshartaa mantsir tsiyatintspa. Tputs wach pchusaa pantsap átus, yasin ngootsush wayarintspa. Wanasir napangtsa, watam uwin nuwaa Apanlleetsi chinaktamnawa. Nuw waatatana Apanlli Taarashipani. Ashiri siysa nuwaa kuki payungandama, siyaa atashina.

15 Mishat, tputs tsiyatssee yaramaam zandku, kurakaa yaramapanee kuruzku, ¿mayaamaja kuraksha minootsimsha tputs chinayaru, minootssha niyrach? Tatsamooru k'kuzee yarachpa. Pukiriya tputs yutarit ashirangu, uru pukiree wanichtampa. Tputs putitaatiya yutariteechu, ¿mayaamaja anoo tputs puniku punich? Shiy yutarit ashirangsha; ashiriya shiyaa wanichinllpa, itsinsaru táchpa. Shiy watam kurakshawa. Ashiri mangiptish itsinsaru tsiyatangcha.

16 Tputsee mantsir tsiyat, tsiyat shirintspa. Mishat, tputsee pachamaam mantsir tuchinarinllpa, siyaa atashina. Nuw waatatana Apanlli Taarashipani.

17 Mishat, tputs yutarit chinaku, siysa anoo mapiyrintspa. Tputsee mangu p'tseengtsa; chinampatari waneengcha. Ndunnaa waneekus shaanaatstatam tayutaritchiya. 18 Ashiri tputsee natsarintspa. Tistamaam chinarintspa. Saanpatatis tsiyanpatis taarintspa. Shiyaa tputs natsaktaa, anoo ashtaa chinangcha, watam shaana tamapari ashiritamshawa.*Yuwaa nish átu anootstam Matiwa 19.19, 22.39 tayusima kamankiya. Tputsireetsish chinamari chinangcha. Nuw waatatana Apanlli Taarashipani. Ashirucha, nuw siyaa atashina.

Ashiri na kamaneena yuwaa Apanll tputsee istangtsa tárangu anootsi.

19 Apanll tárangiya; Ichingurus mazinangtsa nuwaa kuki. Nuw siyaa táchintspa; chineetsis minpat chinuz mantsir tuyangarintspa. Mishat, minamtash mzats washunand yapandaru wach nllitaritawpat ttsumintspa. K'tamaamsha zandkus, yapandaru irupat washunand ísiru minpat k'tarintspa. Amb ashiru, washunand k'tamaa kamartarintspa, Apanll tárangiya.

20 Minootssha táchintspa; Yuwaa tputs kurikpa kizaa muchchureem paxanxku anootsi. Kanungas anoo kiz kamasina yamapi atinaariya, upaturunarsha muchchuree ayu táranginaariya, itaru waantatamsha amuy anoo kiz yutarit patatkinaariya, uwsha kanungaseem kurik tuwapchiya yuwamand yutarit patatarangu anumanda. Itaru, pachamana pcharintspa, watam kizaa ndaturi izuuru yamaruwa. 21-22 Upaturunarsha nuwash pangi minam opeejaa karupan pachamaam yushindachpa. Shaniyshish pshtushinung opeejaa karupan wayachpa. Anush yutaritshishirinimand nuwaam muchchiya. Apanllpansha urkar yutaritshishee tachingamaam nuwaa mashchiya. Ashkachu, nuwsha upaturunaree yutaritshishirini yarchima. Nuw waatatana Apanll Taarashipani nuw siyaa atashina.

23 Ashiriya, siy Kanaanush tsap taakchus, wanusee tatsumingtsa. Waani yusiypana. Itaru tatsumareetsis tuchpatati masachi musá pizaa kturintspa. Mishat, wanusee ktungintspa. 24 Itaru, ipunpunarush masach wanusee nuwash pangi ichinguru yushindangandama nuwaam panamaama. Sheerus shambatkus, nuwaa wappari tángtsa. 25 Zameetarinsha masach annaaparee siysa wanusee katungatssa. Amb ashkus, ichinguru masach tatsumarshtis zapan yusiychiya. Nuw waatatana Apanll Taarashipani siyaa atashina. 26 Mishat, táchintspa; Maachta pachayarus, ursirpatari ayamamtiyam ktungintspa. Mishat, tputs wishun ashirusin tputseewa yasakana, anpaneem siysat pshturintspa. Tuwacheerus, yuwaa ayam ashtachu anoo tsiyatintspa. 27 Mishat, mucheetsis tatsamooru iripich ktireerintspa. Suseetstamtis yuwaa tsparatu anoo kturintspa 28 Mishat, maachiritis tsipaku, mangis mantsakus, nutseetsis chawarintspa. Mishat, nutsimunis maacheetsi urutamari kataru anumashpa yandarintspa. Watam nuw Apanlli Taarashipani siyaam tinaranginawa. 29 Mishat, ipareetsish kizaa yutaritam wayayarus, mshipaneem ínarintspa. Sheeruni, kurikee zapan putapani átus shirintspa. Amb ashkus mantsir ashiksa. Ashkachinaareesa, kizpur mantsir taatssa piyartach tputs tamakanaya siysat ashtachtamsa. 30 Mishat, yuwaa nuw zar sápatoo kanusissheem wayarangi anush zar siysat kanusangtamtsa. Mishat, nuwash pangi kuskachus, mangiptis napangtsa, nuw siyaa atashina, watam nuw Apanlli Taarashipanawa. 31 Mishat, wázuririp siy pshtukinaareesa, Nuwaa mangi natstanda, tárintspa. ¿Mayaamaja yashingoo chinachich? Apanlleemsha itsachtakpaz ashtachiya. Ashkachu, nuwsha siyaa tsachichina. Watam nuw Apanlli siyaam taakinawa. 32 Wachinash tputs napkinaareesa, siysat wachinaam kutakus istangtsa. Amb ashkus, saanaatsi wanasir nuwaa Apanlleetsi tuyamandaksa. Watam nuw Apanlli Taarashipanawa. 33 Mishat, arapich tputs tunar siyash taakinaariya, siysa wanasir napangtsa; kiyung yacharintspa. 34 Saanpata chinakis ambtam shingtsa. Tatsamooru chinangtsa, watam tputstamtawa. Sirútama, siy Ijipto tsap arapchitamtis taarangsa. Ijiptoshuch tputs siyaa kiyung yacharangana, siysat ambtam tputsee arapcheewaa shirintspa, nuw siyaa atashina. Waatatana nuw Taarashipani siy Apanllirisa. 35 Mishat, tupaxanxakus, nda shuchimaam tatsamooru táchintsa. Táchshisheem ningat metoroo mantsir wayarintspa. Baransaatssha kiloo táchimaam kayxukus, tatsamooritam tácheerus kayxungtsa. Aratash maacheetsi wayungunoo tatsamaru táchingtsa, nda yanuru shuchimaama. 36 Arangitam yanuru wayarintspa. Nuwaa kuki payungtsa, watam nuw siyaam istaranguri, Ijiptop tsap tashitungaranginawa. Waatatana nuw Taarashipani siy Apanllirisa. 37 Ashirucha, nuw siyaa atashina; Yuwaatsimari nuw siyaa kamachtarangi anootsimari payungtsa. Kitsis mazinangtsa, watam nuw siyaa Apanlliris taakinawa.

Ashiriya, na kamaneena yuwaa Apanll ichinguru tinamarineetsi piy shingtsa tárangu anootsi.