Sakáriyasarini kuku
Sakáriyasarinee kuk pakich kamanchintspa
¿Chakaja anoo yandarang?
Sakáriyarini waanaatsi kamankiya. Nuwtanda nee kiraka yandarangi. Yuwapur kurak Daríyo taarangu anpur yandamaam chtarangina, tárangiya.
¿Chakaama yandarang?
Sakáriyarin Utaáchchimuna tputsi. Irusarinash taarangiya. Waanpatatin Irusarinshuchpatatin wanimaam yandarangiya.
¿Mayaamaja yandarang?
Irusarinshuch tputs xarashish zapan taarangiya. Apanlleem pang' kaneesich pangoorangusin, nda kaapa kizpur wanasir pangooranganaya. Anumand mang' kapung mantsaranganaya. Urkar ndunnaarimuntaa, arapich tputs wandaritam undarar tputseetsi kiyung yacharanganaya. Ashirucha, nda kaapa kis taaranganaya.
¿Mayaatseeja kamanik?
Sakáriyarini kirakash zapan waneerangu, anumunsha zapan kamankiya yuwaa Apanll ipusamarini kuschu anootsi.
Kapitoro 1—8: Apanllee kuk kamanku, zapan waneerangiya yutaritshishee kasamaama.
Kapitoro 9—11: Apanll waana, Arapchee tputsi nuw kizpur wanichima. Mishat, Irusarinshuch ksutamapaneetstam nuw wanichima, watam nuwaa kuki nda payukanawa, tárangiya.
Kapitoro 12—14: Ayam Utaáchich tputs kis taachinllinaya, watam nuwaa tputsirtana, táranguwa.
Nish yandam pakich taariya. Anush Apanllee ipusamarini kamankiya. (9.9-17)
Nuw Sakáriyasi Apanllee kuku kamanchintspa
9
Ashiri kamanchintspa yuwaa zapshinaa Israelchich tputs mapiyrsin taachinllina anootsi
9 Yakat Siyonshuchis, mangis kapung ksangtsa. Ksatam yaseengtsa. Yakat Irusarinshuchis, siy kurakaris naachtamta. Tputsee mangoo zurampatari natstayaru, undararee izuuru kasiychu, chinampatarisha chinaku taachiya. Burroo wip yamayaru, anumun karupanamun ush kuxinaru kuschiya.*Yuwaa nish átu anootstam Matiwa 21.5; misha Wanga 12.15 tayusima kamankiya. 10 Sheeru, uwamari Efrayinshuchee tapazpan pshiyrshini kachingkeeru kasachiya. Irusarinshuchee kapaach tapazpanee, misha xanxapsheetstam tapazpanee izuuru kapeetchiya. Tsiyatssee yaramaam tsapurunashuchee tsiyatchiya. Uwamari ksutchiya. Aranginasha, aranginasha sheeru, yap tsap tspakatu ambtam, Eufratisshutam kung ksutchiya.
11 Apanll Taarashipan atimanda. Irusarinshucheetsis, nuw siyaa zurampatari atina. Sirútamasa siyaa amikurtaranguri, chineetsis ursiri tuchumiranguri, yuwaa táyanlli anoo na tuminchima.*Matiwa 26.28; Márkosa 14.24; Utaáshucheema 9.20 tsiyatsis nipta tatsamooru taaritamta. Yuw tputsiris k'tsimash kiyung kachiykusin taakana anoo nuwsha tashitungachima. 12 Itaru, siy tumanamash taarangtaatis, wandari kanapumaam zandaksa. Waptam pangipis yuwash taarangis ambtam kanapungtsa. Sambaytarintspa. Sirútama siy ¿waninll kiyung kachiykus taarangsawa? Natsha nuw siyaa aranginasha tapachindachintspa; kizpur wanasir istachintspa. 13 Itaru, Utaáchchis mazinangtsa: Siyaa xanxapish tamapari ashiru tapazeem istachintspa. Efrayinchichis mazinangtamtsa: Siyaa wasap tapazpan tamapari ashiru wayachintspa. Siyonshuchis mazinangtamtsa: Siy k'chirpung tamapari ashiru kizpur taatssa. Ichingarootsis atina. Siyapa iparis waratamaam tapazee ichiyzachima. Kiríkshuchpa tputs waratchinllinaya, Apanll tárangiya.
14 Ashiriya, nuw Sakáriyasi atina. Waanasha Apanll wakarash wits puu puu tákchu, tuwshumand Apanll kambusurush káyachu, waanaatsi tiptsir tapachindamaam kuschiya. Israelchichee undarar tapachindamaam wasapaa mamar tamatarpari ashiru tiyanchiya. 15 Ashkachu, Apanll waanaatsi tiptsir tapachindachiya. Patumbchee tputseem pachamaam payukana, anpatari izuuru kasachinlliniya. Sheersin, undararee kasiyarusin, mang' kizpur ksakchusin, tputs karusam amtarparee ashiru, Jay, jay táchinllinaya. Watsiyun kapung sitkatssin, undararee ursir tasunashpaz tatsikusina, sheersin Apanllish kajonarini izuuru pzachtakpaz ashtachinllinaya. 16 Amb ashkachu, Apanllsha waanaatsi tiptsir tapachindachiya, maacheetsi chinuzee kaapara, misha opeejaa tamatarpachi ashiruya. Ashkachu, waanshutam watsapun taakchusin, kizpur wanasir patumbich kambasirumich tamatarpari ashirusin taachinllinaya. Tútiyach kizpur ungireew taachinllinaya. 17 Ashiri kizpur wanasirsha yakat taachiya. Watsapunish maachi tatsumshish tirikoo, misha kizarunatam mazarish tatsumkusin, wanasir kxuneeru, tirik yusikchu, izuuru tatsitku, taachiya. Iparshitini kamuz, misha iparini kizatam anoo katungkusin, kapungsha wanasireew mikeersin kanungkusin taachinlliniya, nuw siyaa atina.
Ashiri na kamaneena yuwaa zapshinaa Israelchich tputs mapiyrsin taachinllina anootsi.
[Ashiri wappari. Watamaricha nuw Sakáriyasi kuki.]