Ang Libro ni
Ezra
1
Gipabalik ni Haring Cyrus ang mga Judio sa Ilang Dapit
(2 Cron. 36:22-23)
1 Sa unang tuig sa paghari ni Cyrus sa Persia, gituman sa Ginoo ang iyang gisaad pinaagi kang Jeremias.*iyang gisaad pinaagi kang Jeremias: maluwas ang mga Israelinhon sa pagkabihag human sa 70 ka tuig. Tan-awa ang Jer. 25:11; 29:10. Gitandog sa Ginoo ang kasing-kasing ni Cyrus sa pagbuhat ug pahibalo aron imantala sa tibuok gingharian.
2 Mao kini ang pahibalo ni Cyrus nga hari sa Persia:
“Ang Ginoo, nga Dios sa langit†Dios sa langit: o Dios nga anaa sa langit; o Dios nga naghimo sa langit; o Dios nga labaw sa tanan. naghatag kanako sa tanang gingharian dinhi sa kalibotan, ug gihatagan niya ako sa responsibilidad sa pagpatukod ug templo alang kaniya didto sa Jerusalem nga sakop sa Juda. 3 Kamong tanang katawhan sa Dios, hinaut nga ubanan niya kamo. Balik kamo sa Jerusalem ug tukora ninyo pag-usab didto ang Templo sa Ginoo, nga Dios sa Israel, nga anaa niana nga siyudad. 4 Ang mga katawhan‡Ang mga katawhan: tingali ang buot ipasabot, ang mga dili Israelinhon; o ang mga Israelinhon nga buot magpabilin. sa mga dapit nga gipuy-an ninyo kinahanglan motabang kaninyo sa inyong paglakaw pinaagi sa paghatag ug pilak ug bulawan, mga kagamitan, mga hayop, ug kinabubut-on nga halad alang sa Templo sa Dios sa Jerusalem.”
5 Busa ang mga pangulo sa pamilya sa tribo ni Juda ug ni Benjamin, ang mga pari, mga Levita, ug ang mga Israelinhon nga gitangdog sa Ginoo ang ilang mga kasingkasing nangandam pag-adto sa Jerusalem aron pagtukod pag-usab sa balay sa Ginoo. 6 Ang uban nga mga katawhan§Tan-awa usab ang Ezra 1:4. mitabang kanila pinaagi sa paghatag sa mga butang nga hinimo sa pilak, mga bulawan, mga kagamitan, mga hayop, mga mahalon nga gasa, wala pay labot sa mga kinabubut-on nga halad alang sa Templo.
7 Giuli usab ni Haring Cyrus ang mga galamiton sa Templo sa Ginoo nga gipanguha ni Haring Nebucadnezar gikan sa Jerusalem ug gidala ngadto sa templo sa iyang mga dios. 8 Gitugyan kini ni Haring Cyrus kang Mitredat nga tresurero sa iyang gingharian. Giihap kini ni Mitredat ug gihatag ang lista kang Sheshbazar, ang gobernador sa Juda.
9 Mao kini ang mga galamiton nga gihatag ni Haring Cyrus:
Sudlanan nga mga bulawan 30
Sudlanan nga mga pilak 1,000
Mga kutsilyo 29
10 Yahong nga mga bulawan 30
Yahong nga mga pilak 410
Uban pang mga galamiton 1,000
11 Sa kinatibuk-an, adunay 5,400 ka mga galamiton nga bulawan ug pilak, ug gidala kini tanan ni Sheshbazar sa dihang mibalik siya sa Jerusalem kauban sa uban nga mga binihag gikan sa Babilonia.
*1:1 iyang gisaad pinaagi kang Jeremias: maluwas ang mga Israelinhon sa pagkabihag human sa 70 ka tuig. Tan-awa ang Jer. 25:11; 29:10.
†1:2 Dios sa langit: o Dios nga anaa sa langit; o Dios nga naghimo sa langit; o Dios nga labaw sa tanan.
‡1:4 Ang mga katawhan: tingali ang buot ipasabot, ang mga dili Israelinhon; o ang mga Israelinhon nga buot magpabilin.
§1:6 Tan-awa usab ang Ezra 1:4.