1 Mao kini ang mensahe nga gipadayag sa Ginoo kang Oseas nga anak nga lalaki ni Beeri, sa mga panahon nga naghari sa Juda sila si Uzias, Jotam, Ahaz, ug Ezequias, ug sa panahon nga naghari sa Israel si Jeroboam nga anak nga lalaki ni Joas.

2 Mao kini ang unang gisulti sa Ginoo kang Oseas: “Pangasawa ug babayeng maluibon*maluibon: o nagbaligya sa iyang dungog., ug ang inyong mga anak isipon nga mga anak sa babayeng maluibon. Kay sama kaniya, ang akong mga katawhan daw nanapaw usab pinaagi sa ilang pagsalikway sa Ginoo ug sa pagsimba sa mga dios-dios.” 3 Busa gipangasawa ni Oseas si Gomer nga anak nga babaye ni Diblaim, ug nagmabdos si Gomer ug nanganak ug lalaki.

4 Miingon ang Ginoo kang Oseas, “Nganli ang bata ug Jezreel†Jezreel: niini nga bersikulo, kining ngalana nagkahulogan nga patibulaagon sa Dios ang mga Israelinhon tungod sa ilang kadaotan., kay sa dili madugay silotan ko ang hari sa Israel tungod sa mga pagpamatay nga gihimo sa iyang katigulangan nga si Jehu didto sa lungsod sa Jezreel. Ug wagtangon ko ang gingharian sa Israel. 5 Nianang panahona ipapildi ko ang mga sundalo sa Israel didto sa Walog sa Jezreel.”

6 Nagmabdos pag-usab si Gomer ug nanganak ug babaye. Miingon ang Ginoo kang Oseas, “Nganli ang bata ug Lo Ruhama‡Lo Ruhama: ang buot ipasabot, wala kaloy-i., kay dili ko na kaloy-an o pasayloon ang katawhan sa Israel. 7 Apan kaloy-an ko ang katawhan sa Juda. Ako, ang Ginoo nga ilang Dios, moluwas kanila pinaagi sa akong gahom ug dili pinaagi sa gira, sa pana, sa espada, sa mga kabayo o sa mga tigkabayo.”

8 Sa dihang nalutas na ni Gomer ang iyang anak nga si Lo Ruhama, nagmabdos siya pag-usab ug nanganak ug lalaki. 9 Miingon ang Ginoo kang Oseas, “Nganli ang bata ug Lo Ami§Lo Ami: ang buot ipasabot sa Hebreo, dili akong katawhan., kay kamong mga Israelinhon dili akong katawhan ug ako dili inyong Dios.

10 “Apan moabot ang panahon nga mahisama kamo kadaghan sa balas sa baybayon nga dili masukod o maihap. Sa dapit diin gitawag kamo nga, ‘Dili akong katawhan,’ pagatawgon unya kamo nga, ‘Mga anak sa buhi nga Dios.’ 11 Mahiusa pag-usab ang mga katawhan sa Juda ug sa Israel, ug magpili sila ug usa ka pangulo. Mouswag sila pag-usab sa ilang yuta. Pagkamalipayon gayod unya nianang panahona alang sa lungsod sa Jezreel.