4
Misulti si Elifaz
1 Unya mitubag si Elifaz nga taga-Teman,
2 “Masuko ka ba kon mosulti ako?
Dili mahimo nga magpakahilom lang ako.
3 Daghan ang mga tawo
nga imong gitudloan kaniadto nga mosalig sa Dios.
Gipalig-on mo kadtong mga nagmaluya.
4 Ang imong mga pulong nakapalig-on niadtong napandol
ug nawad-ag paglaom.
5 Apan karon nga ikaw nay nag-antos,
naglagot ka ug nawad-ag kadasig.
6 Dili ba nga kon adunay pagtahod ka sa Dios
ug matarong ang imong kinabuhi,
adunay pagsalig ka ug paglaom?
7 “Huna-hunaa ra gud. Aduna bay tawong matarong
o walay sala nga nalaglag?
8 Sumala sa akong naobserbahan,
ang magtanom ug daotan, ug magsabwag, ug kasamok,
kadaotan ug kasamok usab ang anihon.
9 Mangalaglag sila sa usa lang ka paghuyop sa Dios.
Sa iyang kasuko, mangapukan sila.
10 Bisan sama pa sila sa kusgan ug mabangis nga liyon,
pangpungilon gihapon sa Dios ang ilang mga ngipon.
11 Mahisama sila sa mga liyon nga nangamatay tungod
kay walay matukob,
ug ang ilang mga anak magkatibulaag.
12 “Adunay gisugilon kanako sa tago.
Gihunghong kini kanako
13 pinaagi sa usa ka damgo niadtong gabhiona
samtang nahinanok pag-ayo ang mga tawo.
14 Nahadlok ako ug nangurog
ang tibuok kong kalawasan.
15 Adunay espiritu nga milabay*espiritu nga milabay: o mihuyop ang hangin. sa akong nawong
ug nanindog ang akong mga balhibo.
16 Mihunong kini ug daw nagtindog, apan dili ko maklaro.
Unya nadungog ko ang hinay nga tingog nga miingon,
17 ‘Aduna bay tawong matarong atubangan sa Dios?
Aduna bay tawong hinlo atubangan sa iyang Magbubuhat?
18 Kon dili makasalig ang Dios sa mga anghel
nga iyang mga alagad,
ug makakita pa siya ug sayop diha kanila,
19 unsa pa kaha ang mga tawo nga hinimo lang gikan sa yuta,
ug sama ra kasayon dugmokon sama sa insekto!
20 Buhi sila sa buntag, apan pagkagabii patay na.
Dili na sila makita hangtod sa kahangtoran.
21 Nahisama sila sa nalumpag nga mga tolda.
Namatay sila nga kulang ug kaalam.’