35
Unya miingon pa gayod si Elihu,
“Abi nimog husto ka sa imong pag-ingon
nga wala kay sala atubangan sa Dios?
Apan nag-ingon ka usab, ‘Unsa may akong makuha
kon dili ako magpakasala?’
 
“Tubagon ka nako
ug ang imong mga higala.
Hangad sa langit ug tan-awa
ang mga panganod ibabaw nimo.
Kon nakasala ka, dili kana makaapekto sa Dios,
bisan magsige ka pa ug pagpakasala.
Ug kon matarong ka,
unsay kaayohan nga ikahatag mo sa Dios?
Ang imong isigka-tawo lang ang maapektohan
sa imong maayo o daotan nga mga binuhatan.
 
“Nagpakitabang ang mga tawo tungod sa pagpangdaog-daog.
Naghangyo sila nga luwason gikan sa kamot
sa mga tawong gamhanan.
10 Apan wala sila mangita sa Dios nga maoy naghimo kanila
ug naghatag kanilag kusog sa panahon sa kalisod.*kusog sa panahon sa kalisod: sa literal, awit sa kagabhion.
11 Wala sila midangop sa Dios nga naghimo kanila
nga mas maalamon kaysa mga mananap ug mga langgam.
12 Ug kon manawag man sila, dili sila tubagon sa Dios
tungod kay garboso ug mga daotan sila.
13 Oo, dili pamation sa Makagagahom nga Dios
ang ilang pagpangayo ug tabang
nga walay kapuslanan.
14 Labi pa gayod nga dili niya pamation ang imong pagpanawag,
Job, kon moingon ka nga wala mo makita
nga giatiman niya ang imong kaso nga gidala ngadto kaniya,
ug nagsige ka lang ug hulat kaniya.
15 Nag-ingon ka pa nga dili mosilot ang Dios
bisan ug nasuko na siya, ug wala siya magtagad
sa kadaotan nga ginahimo sa tawo.
16 Job, walay kapuslanan ang imong gipanulti.
Klaro nga wala ka masayod sa imong gipanulti.”

*35:10 kusog sa panahon sa kalisod: sa literal, awit sa kagabhion.