Ang Libro ni
Obadias
1
1 Mao kini ang gipadayag sa Ginoong Dios kang Obadias mahitungod sa yuta sa Edom.
Silotan sa Ginoo ang Edom
Nadungog nato nga mga Israelinhon ang balita gikan sa Ginoo,
nga nagpadala siya ug mensahero ngadto sa mga nasod
sa pag-aghat kanila sa pakig-gubat batok sa Edom.
2 Kay miingon ang Ginoo ngadto sa mga taga-Edom, “Paminaw!
Himuon ko kamong pinakaubos sa mga nasod,
ug tamayon gayod nila kamo.
3 Nag-ingon kamo nga walay makalaglag kaninyo
tungod kay nagpuyo kamo sa batoon
ug habog nga pangpang.
Apan nianang inyong pagpasigarbo
gilimbongan ninyo ang inyong kaugalingon.
4 Kay bisan pag sama sa salag sa agila kahabog ang inyong gipuy-an,
o ibutang pa ninyo kini taliwala sa mga bitoon,*Kay bisan…mga bitoon: sa literal, Kay bisan pag molupad kamog labihan kataas sama sa agila, o magsalag taliwala sa mga bitoon.
laglagon ko gihapon kamo.
Ako, ang Ginoo, ang nag-ingon niini.
5 “Dili ba nga kon mangawat ang mga kawatan sa panahon sa kagabhion,
kuhaon ra man nila ang ilang magustohan?
Ug dili ba nga ang mga tigpamupo ug ubas magbilin man
Apan kamo, hutdon gayod ug laglag sa inyong mga kaaway!
6 Pangitaon nila ug kuhaon ang mga bahandi
ninyong mga kaliwat ni Esau.
7 Limbongan kamo sa inyong kaabin nga mga nasod,
ug abugon gikan sa inyong dapit.
Sila nga nakig-uban kaninyo sa pagpangaon
maoy magbutang ug laang alang kaninyo,
ug dili kamo makamatikod niini.
8 “Ako, ang Ginoo, nag-ingon nga sa panahon nga silotan ko na kamo,
laglagon ko ang inyong maalamon nga mga tawo,
ug wagtangon ko ang mga maalamon sa Bukid ni Esau.‡Bukid ni Esau: ang Edom ginatawag usahay ug Bukid ni Esau subay sa ngalan sa katigulangan sa mga lumulupyo niining lugara.
9 Mangurog sa kahadlok ang inyong mga sundalo sa lungsod sa Teman,
busa mangamatay kamong tanan nga anaa sa Bukid ni Esau.
Ang Sala sa mga Taga-Edom
10 “Tungod sa inyong kabangis ngadto sa mga kaliwat ni Jacob,
nga inyong kadugo, maulawan kamo
ug laglagon sa hingpit.
11 Wala man lang kamo magtagad sa dihang gisulong
ang Jerusalem sa mga langyaw.
Gipasagdan lang ninyo nga kuhaon nila ang mga bahandi sa Jerusalem
ug bahin-bahinon pinaagi sa hulbot-hulbot.
Nahisama lang kamo kanila nga mga kaaway sa Israel.
12 Wala unta ninyo ikalipay ang katalagman nga nahiagoman
sa katawhan sa Juda, nga inyong kadugo.
Wala unta kamo magmaya sa panahon sa ilang kalaglagan.
Ug wala unta kamo manghambog sa panahon sa ilang kalisod.
13 Wala unta kamo mosulod sa siyudad sa akong katawhan
sa panahon sa ilang kalaglagan,
ug manguha sa ilang bahandi.
Ug wala unta kamo maglipay sa panahon sa ilang pag-antos.
14 Wala unta kamo mag-atang sa gisang-an sa mga dalan
sa pagpamatay sa mga nangikyas gikan sa Jerusalem.
Ug wala unta ninyo sila itugyan
sa mga kaaway sa panahon sa ilang kalisod.
Silotan sa Dios ang mga Nasod
15 “Wala unta ninyo kadto himoa sa Jerusalem
tungod kay hapit na ang adlaw nga hukman ko ang tanang nasod.
Ug kon unsa ang inyong gibuhat sa uban,
mao usab kana ang buhaton kaninyo.
Kon unsa ang inyong pagtagad sa uban,
mao usab kana ang ibalos kaninyo.
16 Maingon nga gisilotan ang akong mga katawhan§ang akong mga katawhan: sa Hebreo, kamo.
didto sa akong balaan nga bukid,*balaan nga bukid: o Bukid sa Zion.
silotan usab ang tanang nasod.
Silotan ko gayod sila sa hilabihan
hangtod nga mangahanaw sila.
Magmadaogon ang Israel
17 “Apan adunay makaikyas nga mga Israelinhon ngadto sa Bukid sa Zion,
ug mahimo na usab kining balaang dapit.
Maangkon pag-usab sa mga kaliwat ni Jacob
ang mga yuta nga ilang gipanag-iyahan kaniadto.
18 Ang mga kaliwat ni Jacob ug Jose†kaliwat ni Jacob ug ni Jose: si Jacob nagrepresentar sa katawhan sa Juda, ug si Jose nagrepresentar sa katawhan sa Israel. mahisama sa kalayo.
Maingon nga lamoyon sa kalayo ang dagami,
laglagon usab sa hingpit sa kaliwat ni Jacob
ug ni Jose ang kaliwat ni Esau ug wala gayoy mabilin niini.
Mahitabo gayod kini, kay ako,
ang Ginoo, ang nag-ingon niini.
19 “Sakopon sa mga Israelinhon nga taga-Negev‡Negev: ang habagatan sa Juda. ang Bukid ni Esau,
ug sakopon sa mga Israelinhon nga nagpuyo
sa kabungtoran sa kasadpan§kabungtoran sa kasadpan: sa Hebreo, Shefela. ang yuta sa mga Filistihanon.
Sakopon sa mga Israelinhon ang yuta sa Efraim ug Samaria.
Ug sakopon tribo ni Benjamin ang Gilead.
20 Sakopon sa daghang mga Israelinhon
nga gikan sa pagkabihag ang yuta sa
mga Canaanhon hangtod sa Sarefat,
ug sakopon sa mga taga-Jerusalem nga gikan sa pagkabihag
sa Sefarad ang mga lungsod sa Negev.
21 Motungas ang mga tigpanalipod sa Israel sa Bukid sa Zion,
sa pagdumala sa mga katawhan sa Bukid ni Esau.
Ug ako, ang Ginoo, mao ang maghari.”
*1:4 Kay bisan…mga bitoon: sa literal, Kay bisan pag molupad kamog labihan kataas sama sa agila, o magsalag taliwala sa mga bitoon.
†1:5 Nabatasan sa mga Israelinhon nga sa panahon sa ting-ani, magbilin sila ug mahagdaw sa mga kabos. Tan-awa ang Lev. 19:10; Deut. 24:21. Posible nga mao usab kini ang batasan sa mga taga-Edom.
‡1:8 Bukid ni Esau: ang Edom ginatawag usahay ug Bukid ni Esau subay sa ngalan sa katigulangan sa mga lumulupyo niining lugara.
§1:16 ang akong mga katawhan: sa Hebreo, kamo.
*1:16 balaan nga bukid: o Bukid sa Zion.
†1:18 kaliwat ni Jacob ug ni Jose: si Jacob nagrepresentar sa katawhan sa Juda, ug si Jose nagrepresentar sa katawhan sa Israel.
‡1:19 Negev: ang habagatan sa Juda.
§1:19 kabungtoran sa kasadpan: sa Hebreo, Shefela.