Salmo 11
Ang awit alang sa maestro sa mga mag-aawit. Awit ni David.
1 Sa Ginoo ako nangayo ug panalipod.
Busa nganong moingon man kamo kanako,
“Lupad ngadto sa mga bukid sama sa langgam,*Lupad ngadto…langgam: mao kini sa Septuagint ug sa Syriac; apan sa Hebreo, Pahilayo sa inyong mga bukid, langgam.
2 kay gibinat na sa mga daotan ang ilang mga pana diha sa mangitngit nga dapit
aron panaon ang mga nagkinabuhi ug matarong.
3 Unsay mahimo sa mga matarong
kon wala nay kahusay ug kalinaw ang lungsod?”
4 Anaa ang Ginoo sa iyang balaan nga templo;
naghari siya gikan sa iyang trono didto sa langit.
Ginatan-aw niya ug ginasusi ang tanang mga tawo.
5 Ginasusi niya ang mga matarong ug ang mga daotan.
Ginakapungtan niya ang mga bangis.
6 Paulanan niyag nagdilaab nga mga baga ug asupre ang mga daotan;
ug silotan niya sila pinaagi sa init nga hangin nga makapaso.
7 Kay matarong ang Ginoo
ug malipay siya sa mga buhat nga matarong.
Busa ang nagkinabuhi nga matarong makaduol kaniya.†makaduol kaniya: sa literal, makakita sa iyang nawong.
*Salmo 11:1 Lupad ngadto…langgam: mao kini sa Septuagint ug sa Syriac; apan sa Hebreo, Pahilayo sa inyong mga bukid, langgam.
†Salmo 11:7 makaduol kaniya: sa literal, makakita sa iyang nawong.