Salmo 84
Ang awit alang sa maestro sa mga mag-aawit. Gamita ang instrumento nga “gittith.” Ang awit sa mga anak ni Kora.
1 Ginoo nga Makagagahom, pagkatahom sa imong Templo.
2 Gusto ko gayod nga moadto didto!
Gimingaw ako sa pagsulod sa imong Templo, O Ginoo.
Ang tibuok kong pagkatawo mag-awit sa kalipay kanimo,
O buhi nga Dios.
3 Bisan ang mga maya ug mga sayaw adunay mga salag duol sa halaran,
diin gibutang nila ang ilang mga piso.
O Ginoo nga Makagagahom, akong Hari ug Dios,
4 bulahan ang mga tawo nga nagpuyo sa imong Templo.
Kanunay silang nag-awit ug mga pagdayeg kanimo.
5 Bulahan ang mga tawo nga nakaangkon ug kusog gikan kanimo,
ug nangandoy gayod nga mobisita sa imong Templo.
6 Samtang nag-agi sila sa Mamalang Walog*Mamalang Walog: o Walog nga adunay Mga Kahoy nga Balsam; o Walog nga adunay Panaghilak.,
gibati nila nga daw adunay mga tuboran didto,
nga daw sa giulanan kini ug naglim-aw.
7 Nagkakusgan pa gayod sila samtang naglakaw sila,
hangtod nga ang matag-usa kanila motungha didto sa atubangan sa Dios sa Zion†Zion: mao usab ang Jerusalem..
8 Ginoong Dios nga Makagagahom, Dios ni Jacob,
pamatia ang akong pag-ampo!
9 Panalangini, O Dios, ang among tigpanalipod‡tigpanalipod: sa literal, taming.
nga mao ang among hari nga imong gipili.
10 Ang usa ka adlaw diha sa imong Templo
mas maayo pa kaysa 1,000 ka adlaw didto sa ubang dapit.
Palabihon ko pa nga magtindog sa pultahan sa balay sa akong Dios,
kaysa mopuyo sa balay sa mga daotan.
11 Kay ikaw, Ginoong Dios, sama sa adlaw nga naghatag ug kahayag,
ug sa taming nga nagpanalipod.
Naghatag ka ug panalangin ug kadungganan.
Wala kay gihikaw nga maayong butang sa mga tawo nga nagkinabuhi nga maligdong.
12 O Ginoo nga Makagagahom, bulahan ang nagsalig kanimo.
*Salmo 84:6 Mamalang Walog: o Walog nga adunay Mga Kahoy nga Balsam; o Walog nga adunay Panaghilak.
†Salmo 84:7 Zion: mao usab ang Jerusalem.
‡Salmo 84:9 tigpanalipod: sa literal, taming.