9
Silotan sa Ginoo ang mga Kaaway nga Nasod sa Israel
1 Mao kini ang mensahe sa Ginoo:
Miingon ang Ginoo nga silotan niya ang mga siyudad sa Hadrac ug Damasco,*Hadrac ug Damasco: ang Hadrac usa ka siyudad sa amihan sa Damasco (ang kapital sa Siria) ug sa Hamat (tan-awa ang bersikulo 2).
tungod kay kinahanglan nga modangop sa Ginoo ang tanang katawhan
ug ilabina ang tanang mga tribo sa Israel.†tungod kay kinahanglan…Israel: o nagtan-aw ang Ginoo sa tanan nga katawhan, ug labi na sa mga tribo sa Israel.
2 Silotan usab sa Ginoo ang Hamat,
nga kasikbit nga siyudad sa Hadrac ug sa Damasco,
ug ang mga siyudad sa Tiro ug Sidon,
bisan pa ug adunay abilidad ang mga lumulupyo niini.
3 Nagpatindog ang mga lumulupyo sa Tiro ug paril,
ug nagtapok sila ug plata ug bulawan
nga daw sa nagtapok lang sila ug yuta.
4 Apan kuhaon sa Ginoo ang ilang mga kabtangan
ug ilabay niya ang ilang bahandi ngadto sa dagat.
Ug ang ilang siyudad lamyon sa kalayo.
5 Makita kini sa mga lumulupyo sa Ashkelon ug mahadlok sila.
Magluko sa kasakit ang mga lumulupyo sa Gaza,
ingon man ang mga lumulupyo sa Ekron
kay ang ilang ginasaligan mawala.
Mamatay ang hari sa Gaza,
ug ang Ashkelon dili na mapuy-an.
6 Ang Ashdod pagapuy-an sa mga tawong nagkalain-laing kaliwat.
Laglagon sa Ginoo ang gipasigarbo sa mga Filistihanon.
7 Dili na sila mokaon ug karne nga adunay dugo‡mokaon…dugo: o moinom ug dugo.
o sa mga pagkaon nga gidili.
Ang mahibilin kanila isipon sa atong Dios nga iyang katawhan,
ug mahimo na silang kabahin sa katawhan sa Juda.
Ang mga lumulupyo sa Ekron mahimong kabahin
sa katawhan sa Ginoo sama sa mga Jebusihanon.§Jebusihanon: ang lumad nga mga lumulupyo sa Jerusalem nga gisakop ni David human nila mailog ang siyudad (2 Sam. 5:6-10).
batok sa mga mosulong niini.
Wala nay modaog-daog sa iyang katawhan
kay karon gibantayan na niya sila.
Ang Umaabot nga Hari sa Zion
9 Miingon ang Ginoo, “Panghugyaw gayod kamo sa kalipay,
kamong mga lumulupyo sa Zion,†Zion: sa Hebreo makita ang pulong nga Zion, nga mao ang laing ngalan sa Jerusalem.
kay ang inyong hari moabot.
Matarong siya ug madaogon.
Mapainubsanon siya ug moabot nga
nagsakay sa nating asno.
10 Kuhaon ko ang mga karwahi ug mga kabayo
nga panggira gikan sa Israel ug sa Juda.‡sa Israel ug sa Juda: sa Hebreo, sa Efraim ug sa Jerusalem. Nagpasabot kini sa usa sa mga tribo sa Amihanang bahin sa Israel.
Ang mga pana nga gigamit sa gira balion.
Ang moabot nga hari magdala
ug kalinaw ngadto sa mga nasod.
Mohari siya gikan sa usa ka dagat
hangtod sa usa pa gayod ka dagat,§gikan…dagat: tingali ang buot ipasabot, gikan sa Patay nga Dagat hangtod sa Dagat sa Mediteraneo.
ug gikan sa Suba sa Eufrates
hangtod sa kinatumyan sa yuta sa Israel.*hangtod…Israel: nga mao ang disyerto sa Sinai. Ang Hebreo niini mahimong hubaron usab nga, hangtod sa kinatumyan sa kalibotan.”
Luwason sa Ginoo ang mga Israelinhon nga Nabihag
11 Miingon pa ang Ginoo, “Bahin kaninyo nga mga Israelinhon,
tungod sa akong kasabotan kaninyo nga gipalig-on pinaagi sa dugo,
hatagan ko ug kagawasan ang nangabihag
nga gihulog sa atabay nga walay tubig.
12 Kamong mga nabihag nga naglaom,
balik na kamo sa dapit diin
luwas kamo sa katalagman.
Karon sultihan ko kamo nga ibalik ko
nga doble ang nawala kaninyo.
13 Gamiton ko ang Juda ug ang Israel nga daw pana.
Himuon ko ang katawhan sa Zion nga daw espada sa sundalo,
ug laglagon nila ang katawhan sa Grecia.”
Ang Pagpakita sa Ginoo
14 Unya magpakita ang Ginoo ibabaw sa iyang katawhan.
Mokilab ang iyang pana sama sa kilat.
Patingogon sa Ginoong Dios ang budyong;
ug moabot siya uban sa bagyo nga gikan sa habagatan.
15 Panalipdan sa Ginoo nga Makagagahom ang iyang katawhan.
Tunob-tunoban lang nila ang mga bato
nga gilambuyog kanila sa ilang mga kaaway.
Mangaon sila ug moinom sa pagsaulog sa ilang kadaogan.
Manghugyaw sila nga murag mga hubog.
Mapuno ang ilang tiyan sa ilimnon
sama sa yahong nga puno sa dugo nga iwisik-wisik
sa tumoy sa mga eskina sa halaran.
16-17 Nianang adlawa luwason sila sa Ginoo
nga ilang Dios isip iyang mga karnero.
Pagkaanindot ug pagkatahom nilang
sud-ongon diha sa ilang yuta.
Sama sila sa mahalong mga bato
nga naggilak-gilak diha sa korona.
Ang ilang madagayaong abot makahatag
ug kusog sa ilang mga pamatan-on.
*9:1 Hadrac ug Damasco: ang Hadrac usa ka siyudad sa amihan sa Damasco (ang kapital sa Siria) ug sa Hamat (tan-awa ang bersikulo 2).
†9:1 tungod kay kinahanglan…Israel: o nagtan-aw ang Ginoo sa tanan nga katawhan, ug labi na sa mga tribo sa Israel.
‡9:7 mokaon…dugo: o moinom ug dugo.
§9:7 Jebusihanon: ang lumad nga mga lumulupyo sa Jerusalem nga gisakop ni David human nila mailog ang siyudad (2 Sam. 5:6-10).
*9:8 templo: o Jerusalem; o tibuok nasod sa Israel.
†9:9 Zion: sa Hebreo makita ang pulong nga Zion, nga mao ang laing ngalan sa Jerusalem.
‡9:10 sa Israel ug sa Juda: sa Hebreo, sa Efraim ug sa Jerusalem. Nagpasabot kini sa usa sa mga tribo sa Amihanang bahin sa Israel.
§9:10 gikan…dagat: tingali ang buot ipasabot, gikan sa Patay nga Dagat hangtod sa Dagat sa Mediteraneo.
*9:10 hangtod…Israel: nga mao ang disyerto sa Sinai. Ang Hebreo niini mahimong hubaron usab nga, hangtod sa kinatumyan sa kalibotan.