1 Angraeng mah Noah khaeah, Nangmah hoi na imthung takoh boih palong thungah akun oh; nang loe ka hmaa ah vaihi dung ih kaminawk salakah kami katoeng ah kang hnuk. 2 Long nuiah taw ih moi atii anghmat ving han ai ah, atii kamghnong kaciim moi to amno hoi ampa sarihto, acaeng kanghmong kaciim ai moi doeh amno hoi ampa hnetto, 3 atii kanghmong van ih tavaa doeh amno hoi ampa sarihto ah la boih ah. 4 Vaihi hoi ni sarihto thungah, long ah ni qui palito hoi qum qui palito thung kho kang oihsak moe, long nuiah kaom ka sak ih kahing hmuennawk to kam rosak boih han, tiah a naa. 5 Angraeng mah thuih ih lok baktih toengah Noah mah sak boih.

6 Long to tui mah uem naah, Noah loe saning cumvai tarukto oh boeh. 7 Mathai 24.38,39; Luk 17.27.Tui len pongah, Noah mah a capanawk, a zu hoi a capanawk ih zu boih, palong thungah akun haih. 8 Kaciim hoi kaciim ai moinawk, tavaanawk hoi long ah kavak moinawk boih, 9 Sithaw mah Noah khaeah thuih ih lok baktih toengah, amno hoi ampa hnetto kacung ah, Noah hoi nawnto palong thungah akun o. 10 Ni sarihto pacoengah loe long nuiah tui uemhaih to phak.

11 2 Pt 3.6.Noah hinghaih saning cumvai tarukto koephaih saning, khrah hnetto haih, ni hatlai sarihto naah, kalen hoi kathuk long thung hoiah tui to puek moe, van thokbuemnawk to am-ongh. 12 Ni qui palito hoi qum qui palito long nuiah kho angzoh. 13 To na niah Noah loe a capa Shem, Ham hoi Japheth, a zu hoi a capa thumto ih zunawk, 14 Moi kasannawk, pacah ih moinawk boih, long ah kavak moi, pakhraeh tawn tavaanawk loe Noah hoi nawnto palong thungah akun o. 15 Hinghaih tawn, moinawk boih loe hnetto kacung ah, Noah khaeah caeh o moe, palong thungah akun o. 16 Sithaw mah Noah khaeah thuih ih lok baktih toengah, moinawk boih amno hoi ampa kacung ah, Noah khaeah palong thungah akun o; to pacoengah Angraeng mah anih to thok khah thuih khoep.

17 Long loe ni qui palito thung tui mah uem; kalen aep aep tui mah palong to long ranui ah atoengh tahang. 18 Tui loe len moe, long ranui bangah sang tahang aep aep; tui mah palong to long ranui ah atoengh tahang. 19 Long nuiah tui len parai pongah, van tlim ah kaom, maesangnawk to tui mah uem boih. 20 Mae ranuih dong hatlai panga karoek to tui mah uengh tahang. 21 Long ah kaom angtawt thaih moinawk, tavaanawk, pacah ih moinawk, taw ih moisannawk, long ah kavak moinawk hoi kaminawk to duek o boih. 22 Saoeng ah kaom, hnah hoi anghahaih takhi tawn moinawk to duek o boih. 23 Long nuiah kaom kahing hmuennawk, kami, pacah ih moi, long ah kavak moinawk, van ih tavaanawk to tamit boih; Noah angmah, anih hoi nawnto kaom kaminawk khue ni anghmat o. 24 Tui mah long to ni cumvai, qui pangato thung uem.