1 Iwe, ikkei ir nöün Isakar kewe föman mwän: Tola, Pua, Jasup me Simron. 2 Nge nöün Tola kewe wonoman mwän: Usi, Refaia, Jeriel, Jamai, Ipsam me Semuel. Ir mwänirelan ar kewe famili lon än Tola we cho, ra sounfiu mi pwora me lein pilor kewe. Iwe, iteiten mwirimwirir lon mwün Tafit rüe me ruungeröü wonopükü mwän. 3 Iwe, nöün Usi we mwän Israia. Nge nöün Israia: Mikael, Opatia, Joel me Isia. Ekei limman mwän ir samol. 4 Ätekei a wor chomong pwülüer me nöür mwän, iei mine a wor ükükün ilik me wonungeröü sounfiu mi molotä ngeni maun seni mwirimwirir. 5 Nge märärir kewe seni ekewe familien Isakar meinisin ükükün walik me fisungeröü sounfiu mi pwora, usun a mak lon tettelin uruwor.

6 Iwe, ikkei ir nöün Peniamin kewe ülüman mwän: Pela, Peker me Jetiael. 7 Nge nöün Pela kewe limman mwän: Espon, Usi, Usiel, Jerimot me Airi. Ir mwänirelan ar kewe famili. Iteiter mi mak lon tettelin uruwon mwirimwirir ükükün rüe me ruu ngeröü ilik me föman sounfiu mi pwora. 8 Iwe, nöün Peker kewe tiuman mwän: Semira, Joas, Elieser, Eli-oenai, Omri, Jeremot, Apia, Anatot me Alemet. 9 Iteiter mi mak lon tettelin uruwon mwirimwirir kewe lon ar kewe famili ükükün rüengeröü rüepükü sounfiu mi pwora. 10 Iwe, nöün Jetiael we mwän Pilan. Nge nöün Pilan kewe: Jeus, Peniamin, Ehut, Chenana, Setan, Tarsis me Aisar. 11 Ekei mwän meinisin ir mwänirelan ar kewe famili lon än Jetiael we cho. Iteiter mi mak lon tettelin uruwon mwirimwirir ükükün engol me fisungeröü rüepükü sounfiu mi pwora o molotä ngeni maun. 12 Iwe, än Supim me Hupim kewe cho ir mwirimwirin Ir, nge än Husim we cho ir mwirimwirin Aher.

13 Iwe, ikkei ir nöün Naftali kewe mwän: Jasiel, Kuni, Jeser me Salum, ir mwirimwirin Pila.

14 Iwe, ikkei ir nöün Manasa kewe mwän: Asriel me Makir, a nöüni me won ülüpwülüan seni Aramäa. Iwe, Makir semen Kiliat. 15 Makir a angei eman pwülüen Hupim me eman pwülüen Supim, nge iten fefinan we Maka. Iwe, aruomanün nöün Makir Selofehat, nge Selofehat a chök wor nöün fefin. 16 Iwe, Maka pwülüen Makir a nöüni ruoman ät o aita ngeniir Peres me Seres. Peres a wor ruoman nöün mwän iter Ulam me Rakem. 17 Nge nöün Ulam we mwän Petan. Ätekei meinisin ir mwirimwirin Kiliat, nge Kiliat nöün Makir, nge Makir nöün Manasa. 18 Iwe, fefinen Kiliat itan Hamoleket a nöüni Isot, Apieser me Mala. 19 Nge nöün Semita kewe mwän: Ahian, Sekem, Liki me Aniam.

20 Iwe, ikkei ir ekewe mwirimwirin Efraim: Sutela, nöün Sutela Peret, nöün Peret Tahat, nöün Tahat Eliata, nöün Eliata Tahat, 21 nöün Tahat Sapat, nge nöün Sapat Sutela. A pwal wor ruoman nöün Efraim mwän lükün Sutela: Eser me Eleat. Nge ekewe re wiliposun ewe fanü Kat ra niela ätekei, lupwen ra feitiu pwe repwe soläni nöür man. 22 Iwe, Efraim semer we a kechüeitiir lon chomong rän, nge pwin kewe ra feito ren pwe repwe echipa. 23 Mürin, Efraim a kon ren pwülüan, nge neminewe a pwopwo o nöüni eman ät. Efraim a aita ngeni Peria *Ei it Peria a kan ngeni ewe kapas “feiengau” lon fosun Ipru, pokiten ewe feiengau a tori an famili. 24 Iwe, iten nöün Efraim we fefin Seera. Neminei a aüetä Pet-horon-fan me Pet-horon-asan, pwal Usen-seera. 25 A pwal wor nöün Efraim mwän itan Refa. Nge mwirimwirin Refa: Resef, nöün Resef Tela, nöün Tela Tahan, 26 nöün Tahan Latan, nöün Latan Amihut, nöün Amihut Elisama, 27 nöün Elisama Nun, nge nöün Nun Josua. 28 Iwe, fanüer kewe me ar kewe lenien wilipos Petel me ekewe telinimw ünükün, feila ngeni Naran mi nom peliötiu me Keser mi nom pelilotou, pwal ekewe telinimw mi nom ünükür, pwal Sekem me Aia me ekewe telinimw mi nom ünükür. 29 Nge ekewe mwirimwirin Manasa ra imweimw lon Pet-sean, Tanak, Mekito me Tor, pwal lon ekewe telinimw mi nom ünükür. Iwe, ikei ekewe telinimw ekewe mwirimwirin Josef nöün Israel we mwän ra imweimw lon.

30 Iwe, ikkei ir nöün Aser kewe mwän: Imna, Iswa, Iswi me Peria, nge iten fefiner we Sera. 31 Nge nöün Peria kewe mwän: Heper me Malkiel, i semelapen chon Pirsait. 32 Heper semen Jaflet, Somer me Hotam, nge iten fefiner we Sua. 33 Nge nöün Jaflet kewe mwän: Pasa, Pimal me Aswat. 34 Iwe, pwin Jaflet itan Somer a wor nöün mwän: Roka, Jehupa me Aram. 35 Nge pwin Jeflet itan Hotam a pwal wor nöün mwän: Sofa, Imna, Seles me Amal. 36 Iwe, nöün Sofa kewe mwän: Sua, Harnefer, Sual, Peri, Imra, 37 Peser, Hot, Sama, Silsa, Itran me Pera. 38 Nge nöün Jeter kewe mwän: Jefune, Pispa me Ara. 39 Iwe, nöün Ula kewe mwän: Ara, Haniel me Risia. 40 Ätekei meinisin ir mwirimwirin Aser. Ir mwänirelan ar kewe cho, sounfiu mi kefil o pwora, pwal ir samol mi lap. Iwe, iteiter meinisin mi mak lon tettelin uruwor ükükün rüe me wonungeröü sounfiu mi molotä ngeni maun.