23
1 Iwe, lupwen Tafit a chinlap o ieritam, a seikätä Salomon nöün we mwän pwe epwe kingen Israel. ✡1.King 1.1-40
Ekewe mwich lon ewe ainangen Lefi me ekewe mwichen souasor, pwal ar angang
23.2–24.31
2 Iwe, Tafit a amwichafengeni ekewe souemwenin Israel meinisin, pwal ekewe souasor me ekewe mwän seni ewe ainangen Lefi. 3 Tafit a angei iteiten ekewe mwän seni ewe ainangen Lefi mi ierini ilik feitä ükükün ilik me walungeröü. 4 Mürin, Tafit a üra, “Rüe me rüanüngeröü seni ätekei repwe wisen emweni angangen imwenfelin ewe Samol mi Lapalap, nge wonungeröü repwe nöüwis me soukapwüng. 5 Rüanüngeröü repwe wisen mamasa ekewe asamalap, pwal rüanüngeröü repwe wisen mwareiti ewe Samol mi Lapalap ren sokopaten pisekin ettik üa föri fän iten kölün mwareiti Kot.” 6 Iwe, Tafit a kiniretiu lon ülüngat mwich lon tettelin nöün Lefi kewe mwän: Kersom, Kohat me Merari.
7 Iwe, nöün Kersom kewe mwän: Latan me Simei. 8 Nge nöün Latan kewe ülüman mwän: Jehiel ewe mwänichi, Setam me Joel. 9 Nöün Simei kewe ülüman mwän: Selomot, Hasiel me Haran. Ätekei ir mwänirelan än semer kewe cho seni ekewe mwirimwirin Latan. 10 Nöün Simei kewe föman mwän: Jahat, Sisa, Jeus me Peria. 11 Jahat ewe mwänichi, Sisa ewe aruomanün. Nge esap wor chomong nöün Jeus me Peria mwän, iei mine ir ra eu chök cho mi angangfengen.
12 Iwe, nöün Kohat kewe föman mwän: Amram, Isar, Hepron me Usiel. 13 Nöün Amram kewe mwän: Aaron me Moses. Iwe, Aaron me mwirimwirin kewe ra imwüla tori feilfeilachök, pwe repwe wisen tümwünü ekewe pisek mi unusen pin, repwe keni apach mi pwokus lupwen ar fel ngeni ewe Samol mi Lapalap, repwe pwal angang ngeni o afeiöchü ekewe aramas fän itan tori feilfeilachök. ✡Eks 28.1 14 Nge nöün Moses kewe mwän ewe aramasen Kot ra alealong lon ewe ainangen Lefi. 15 Nöün Moses kewe mwän: Kersom me Elieser. 16 Nge ewe samolun nöün Kersom kewe mwän Sepuel. 17 Iwe, mi wor eman chök nöün Elieser mwän itan Rehapia i samol. Nge mi wor chomong nöün Rehapia mwän. 18 Nöün Isar we mwän Selomit i samol. 19 Nöün Hepron kewe mwän: Jeria ewe mwänichi, Amaria ewe aruomanün, Jahasiel ewe aülümanün me Jekameam ewe afömanün. 20 Nöün Usiel kewe mwän: Mika ewe mwänichi me Isia ewe aruomanün.
21 Iwe, nöün Merari kewe mwän: Mali me Musi. Nge nöün Mali kewe mwän: Eleasar me Kis. 22 Eleasar a mäla, nge esap wor nöün mwän, pwe a chök wor nöün fefin. Iwe, märärir kewe nöün Kis kewe mwän ra pwülüeniir. 23 Nöün Musi kewe ülüman mwän: Mali, Eter me Jeremot.
24 Ätekei ir ekewe mwirimwirin Lefi lon tettelin ar kewe famili, ir mwänirelan än semer kewe cho, usun ra makelong lon ewe iteit ren en me püsin itan seni ier rüe feitä. Ir ra wisen föri angangen imwenfelin ewe Samol mi Lapalap. 25 Pun Tafit a apasa, “Pokiten ewe Samol mi Lapalap ewe Koten Israel a fang ngeni nöün aramas kinamwe o imweimw lon Jerusalem tori feilfeilachök, 26 iei mine ekewe mwän seni ewe ainangen Lefi resap chüen wisen mwärei ewe imwenfel seni mangaku ika och pisek ra aea le angang lon.” ✡Tut 10.8 27 Pokiten än Tafit kewe kapasen öüröür a eäni lesopolan, ra angei iteiten ekewe mwän seni ewe ainangen Lefi seni ier rüe feitä. 28 Iei ar angang, pwe repwe alisi ekewe souasor ir mwirimwirin Aaron ren angangen imwenfelin ewe Samol mi Lapalap. Ra wisen tümwünü ekewe leni lükün ewe imwenfel me ekewe rum mi nom lepekin, ra pwal wisen limeti ekewe pisek meinisin mi pin o föri sokopaten angangen lon. 29 Ra pwal wisen amolätä ekewe pilawa mi pin, ewe pilawa mi amas fän iten ewe asoren mongö, ekewe nokop seni pilawa esap wor iis lon, ewe asor mi furain, ewe asor mi nofitfengen me apüra, repwe pwal eäni ewe angangen kilo me aükük. 30 Iwe, repwe kilisou ngeni ewe Samol mi Lapalap o kölün mwareiti iteiten lesosor me iteiten lekuniol, 31 repwe pwal föri ar angang iteiten fansoun, lupwen a fis asoren kek ngeni ewe Samol mi Lapalap lon ekewe ränin sapat, fansoun popun maram, pwal lupwen ekewe ränin chulap. Repwe wisen angang ngeni ewe Samol mi Lapalap fansoun meinisin lon ar kewe mwich, pwal lon pwüngün ar angang a fen akot fän iter.
32 Iei usun ra wisen tümwünü ewe imw mangaku ia aramas ra churi Kot ie me ewe leni mi pin, repwe pwal alisi pwiir kewe ekewe mwirimwirin Aaron ren angangen imwenfelin ewe Samol mi Lapalap.” ✡Num 3.5-9