1 Ikkei ekewe mwich mi mamasa ekewe asamalapen imwenfel: Seni än Kora cho: Meselemia nöün Kore we mwän seni ewe familien Asaf. 2 Nge mi wor füman nöün Meselemia mwän: Sekaria ewe mwänichi, Jetiael, Sepatia, Jatniel, 3 Elam, Jehoanan me Elieho-enai. 4 Iwe, Kot a afeiöchü Opet-etom, pwe mi wor waluman nöün mwän: Semaia ewe mwänichi, Jehosapat, Joa, Sakar, Netanel, 5 Amiel, Isakar me Peuletai. ✡2.Sam 6.11; 1.Kron 13.14 6 Nge Semaia nöün mwänichi we a pwal wor nöün mwän mi sounemenem lon än semer kewe cho, pun ir ra iteföüla lon ar tufich. 7 Iwe, nöün Semaia kewe mwän: Otni, Refael, Opet me Elsapat, pwal pwiir kewe Elihu me Semakia mi kon tufich. 8 Ir meinisin mwirimwirin Opet-etom. Ätekei pwal nöür kewe me märärir ra tufich ngeni ewe angang ükükür meinisin wone me ruoman. 9 Nge mi pwal wor nöün Meselemia kewe mwän pwal märärir kewe mi tufich ngeni ewe angang ükükür meinisin engol me waluman. 10 Iwe, Hosa seni än Merari cho a pwal wor nöün mwän: Simri i samol, inamwo ika sap i ewe mwänichi, nge saman a chök awisa ngeni ewe wisen samol, 11 pwal Hilkia ewe aruomanün, Tepalia ewe aülümanün me Sekaria ewe afömanün. Iwe, nöün Hosa kewe mwän me märärir kewe ükükür meinisin engol me ülüman.

12 Ekei mwich mi wisen mamasa ekewe asamalapen imwenfel fän emwenien ar kewe meilap, a wor ar angang lon imwen ewe Samol mi Lapalap usun chök märärir kewe chon ewe ainangen Lefi. 13 Iwe, iteiten eu me eu famili a üttüt won ekewe asamalap, ekewe alüal ra usun chök ekewe chinlap. 14 Iwe, Selemia a ütti ewe asamalap mi nom ötiu. Nge nöün we itan Sekaria, eman mwän mi tipachem le öüröür, a ütti ewe asamalap mi nom efeng. 15 Opet-etom a ütti ewe asamalap mi nom ör, nge nöün kewe mwän ra wisen tümwünü ekewe rumwen iseis pisek. 16 Iwe, Supim me Hosa ra ütti ewe asamalap mi nom lotou, pwal ewe asamalap Saleket mi nom won ewe aletä. Eu mwichen mamas a siwili eu mwichen mamas. 17 Me peliötiu a wor wonoman mwän seni ewe ainangen Lefi mi mamas iteiten rän, me peliefeng mi wor föman mi mamas iteiten rän, me peliör mi pwal wor föman mi mamas iteiten rän, nge ren ekewe rumwen iseis pisek a wor akaruoman ngeni iteiten rum. 18 Nge fän iten ewe uut mi nom pelilotou a wor föman mi nom ren ewe al, pwal ruoman mi nom ren ewe uut. 19 Ikkei ekewe mwich mi wisen mamasa ekewe asamalapen Imwenfel seni än Kora me än Merari kewe cho.

20 Iwe, chiener kewe seni ewe ainangen Lefi ra wisen tümwünü ewe lenien iseis pisek mi aüchea lon imwen Kot, pwal ekewe rumw ia ekewe pisek aramas ra fangala ngeni Kot ra nom ie. 21 Ekewe mwirimwirin Latan seni än Kerson we cho ir mwänirelan ar kewe famili mi lewoto seni Latan, ekei aramas ir aramasen Jehiel. 22 Iwe, nöün Jehiel kewe mwän Setam me Joel pwin we ra wisen tümwünü ewe lenien iseis pisek aüchea. 23 Nge seni lein än Amram, än Isar, än Hepron me än Usiel kewe cho a pwal wor aramas mi wor wiser. 24 Sepuel eman mwirimwirin Kersom, nge Kersom nöün Moses, i ewe meilap mi wisen tümwünü ewe lenien iseis pisek aüchea. 25 Iwe, Sepuel märärin Selomit mi lewoto seni Elieser pwin Kersom. Elieser semen Rehapia, Rehapia semen Jesaia, Jesaia semen Joram, Joram semen Sikri, nge Sikri semen Selomit. 26 Ei mwän Selomit me pwin kewe ra wisen tümwünü ekewe pisek aüchea ewe king Tafit me ekewe mwänirelan än semer kewe cho, ir meilap won ngeröü me pükü, pwal ekewe sounemenemen mwichen sounfiu ra fangala ngeni Kot. 27 Ra fangala ekei pisek seni liaper lon maun fän iten angangen tümwünün imwen ewe Samol mi Lapalap. 28 Iwe, Selomit me pwin kewe ra pwal wisen tümwünü meinisin mine ewe soufos Samuel me ewe king Saul, Apner nöün Ner we mwän me Joap nöün Seruia we mwän ra fangala ngeni Kot, pwal meinisin mine aramas ra fangala.

29 Iwe, seni me lein ekewe mwirimwirin Isar Chenania me nöün kewe mwän ra kefilitä, pwe repwe angang fän iten chon Israel lon pekin mwü lon wisen nöüwis me soukapwüng. 30 Iwe, seni me lein ekewe mwirimwirin Hepron Hasapia me märärin kewe iteiter meinisin engeröü füpükü mwän mi silelap ra wisen tümwünü ewe angang meinisin lon Israel me pelilotoun ewe chanpupu Jortan, ewe angang fän iten ewe Samol mi Lapalap, pwal ewe angang fän iten ewe king. 31 Jeria samolun ekewe mwirimwirin Hepron. Lon afaiken ierin mwün Tafit ra kütta sounfiu mi fokun pwora me lein ekewe mwirimwirin Hepron. Iwe, ra küneer pwe ra nom lon Jaser lon ewe fanü Kiliat. 32 Iwe, ewe king Tafit a filätä ükükün ruungeröü füpükü mwän mi silelap, ir mwänirelan än semer kewe cho seni märärin Jeria, pwe repwe tümwünü chon ewe ainangen Rupen me Kat, pwal esopun chon ewe ainangen Manasa lon ewe angang fän iten Kot, pwal ewe angang fän iten ewe king.