1 Ngang üa makkei ei ngenikemi, nei kana, pwe ousap tipis. Nge are eman a föri tipis, a wor eman mi penikich, Jesus Kraist ewe chon pwüng, a nom ren ewe Sam o a tütüngor fänäsengesich. 2 Püsin Kraist i ewe popun pwe ach tipis kana ra musala, nge sap ach tipis chök, pwe pwal tipisin aramas meinisin.

3 Are sia aleasochisi än Kot kewe allük, iwe, sia lükü pwe sia silei i. 4 Iwe, are eman a apasa pwe a silei i, nge esap aleasochisi an kewe allük, ei aramas i eman chon chofona, nge ewe let esap nom lon. 5 Nge are eman a aleasochisi an kapas, an echeni Kot a wesewesen unusöchüla. Iei met sia tongeni silei ren pwe sia nom lon Kot: 6 Iö a apasa pwe a nonom lon Kot epwe fokun föföri usun mine Jesus a föföri.

7 Ämi chiechiei mi achengicheng, ei allük üa makkei ngenikemi esap minefö, pwe eu allük minen lom. Iei ewe allük a nom remi seni chök me lepoputän. Ei allük minen lom, iei ewe kapas oua fen rongorong. ✡Joh 13.34 8 Nge iei üpwe makkei ngenikemi eu allük mi fö, pun a pwä letan lon Kraist pwal lon ämi. Pun rochopwak a wesila, nge ewe saram mi let a fen tin.

9 Iö a apasa pwe a nonom lon saram, nge a oput pwiin, a nom lon rochopwak tori ikenai. 10 Nge iö a echeni pwiin a nonom lon saram, iwe, esap wor och lon manauan mine epwe chepetek ren. 11 Nge iö a oput pwiin a nom lon rochopwak. A fetal lon rochopwak, nge esap silei ia epwe feila ie, pun rochopwak a achuna.

12 Ngang üa mak ngenikemi, nei kana, pun ämi tipis kana ra musala pokiten Kraist. 13 Üa mak ngenikemi samasam kana, pun oua silei ewe mi nonom seni me lepoputän. Üa mak ngenikemi alüal, pun oua akufu ewe Eman mi Ngau. 14 Üa mak ngenikemi nau kana, pokiten oua silei ewe Sam. Üa mak ngenikemi samasam kana, pokiten oua silei ewe mi nonom seni me lepoputän. Üa mak ngenikemi alüal kana, pokiten oua pöchökül, än Kot kapas a nonom lomi o oua akufu ewe Eman mi Ngau.

15 Ousap echeni fanüfan are mettochun lon fanüfan. Pun are oua echeni fanüfan, ousap echeni ewe Sam. 16 Pun mettochun lon fanüfan meinisin, mochenian fituk, mochenian lemas me lamalamtekian manauen aramas resap pop seni ewe Sam, nge ra pop seni ei fanüfan. 17 Iwe, fanüfan me mettochun lon aramas ra kon mochenia ngeni repwe morola, nge iö a föri letipen Kot epwe manau tori feilfeilachök.

18 Ämi nei kana, ewe fansoun sopolan a arapoto! Oua fen rongorong pwe ewe Pölüen Kraist epwe war. Nge iei chomong pölüen Kraist ra fen pwä, iei mine sia silei pwe ewe fansoun sopolan a arapoto. 19 Ekei aramas resap wesewesen chon ach mwich, ina popun ra likitikich. Pun are repwe chon ach mwich, repwe chök nonom rech. Nge ar likitikich a afatatä pwe ir resap wesewesen chon ach mwich.

20 Iwe, ewe mi Pin a fen tinatiu womi ewe Ngünmifel, iei mine ämi meinisin oua silei ewe let. 21 Üsap mak ngenikemi pokiten itä ousap silei ewe let. Nge pokiten oua silei, oua pwal silei pwe esap wor och chofona epwe pop seni ewe let.

22 Iwe, iö ewe chon chofona? Ätewe mi apasa pwe Jesus esap ewe Mesaia! Ei sokun aramas i ewe pölüen Kraist, a oput ewe Sam me ewe Nau. 23 Pun iö a oput ewe Nau a pwal oput ewe Sam, nge iö a etiwa ewe Nau a pwal etiwa ewe Sam. 24 Oupwe fokun tümwünüfichi ämi oupwe amwöchü lon letipemi ewe Kapasen Kot oua fen rong me lepoputän. Are oua amwöchü mine oua fen rong me lepoputän, oupwe nonom lon ewe Nau pwal ewe Sam fansoun meinisin. 25 Iwe, iei met Kraist a püsin pwon ngenikich: ewe manau esemüch.

26 Ngang üa makkei ei ngenikemi usun chokewe mi sotuni ar repwe atokakemi. 27 Nge ren ämi, Kraist a fen tinatiu womi Ngünün. Fansoun än Ngünün we epwe nonom lomi, ousap osupwangen än eman epwe aiti ngenikemi och. Pun Ngünün a aiti ngenikemi usun mettoch meinisin. Iwe, mine i a aiti ngenikemi a let, nge esap mwäl. Oupwe aleasochisi mine Ngünün we a aiti ngenikemi, iwe, oupwe nonom lon Kraist.

28 Ewer, nei kana, oupwe nonom lon Kraist, pun lupwen i epwe pwä, kich sipwe fokun tipepwora, nge sisap opola seni fän säw lon ewe Rän epwe wareto. 29 Ämi oua silei pwe Kraist a pwüng, mürin oupwe pwal silei pwe aramas meinisin mi föri mine a pwüng, ir ra up seni Kot.