1 Iwe, ewe king Salomon a sani chomong fin ekis. Lükün nöün Farao we föpwül a pwal pwülüeni fin Moap, fin Amon, fin Etom, fin Siton me fin Hit. ✡Tut 17.17 2 Ikkei ekewe mwü ewe Samol mi Lapalap a kapas ngeni ekewe aramasen Israel usun, pwe resap pwüpwülü ngeniir, nge ir resap pwal pwüpwülü ngeniir, pun repwe fokun akulu leluker ngeni ar kewe kot. Nge Salomon a chök fitipacheiti ekewe fefin o tongeer. ✡Eks 34.16; Tut 7.3-4 3 A pwülüeni ükükün füpükü finesamol, a pwal wor ükükün ülüpükü ülüpwülüan me lükür. Nge pwülüan kewe ra akunala lelukan seni Kot. 4 Pun lupwen Salomon a chinlap, pwülüan kewe ra akulu lelukan pwe a fel ngeni ekewe koten ekis. Iwe, lelukan esap chüen unus ngeni ewe Samol mi Lapalap an we Kot epwe usun leluken Tafit saman we. 5 Pun Salomon a fel ngeni Astarot än chon Siton we anüfefin, pwal ngeni Molok än chon Amon we kot mi fokun anioput. 6 Iei usun Salomon a föri mine a ngau me fän mesen ewe Samol mi Lapalap, nge esap unusen allükülük ngeni ewe Samol mi Lapalap epwe usun Tafit saman we. 7 Salomon a aüetä me won ewe chuk ötiuen Jerusalem eu lenien fel ngeni Kemos än chon Moap kot mi fokun anioput, pwal ngeni Molok än chon Amon kot mi fokun anioput. 8 A pwal aüetä lenien fel fän iten pwülüan kewe ekewe fin ekis meinisin, pwe repwe tongeni keni apach mi pwokus o eäni asor ngeni ar kewe kot.

9 Iwe, ewe Samol mi Lapalap ewe Koten Israel a song ngeni Salomon, pun lelukan a kul seni. Inamwo an pwä ngeni fän ruu 10 o allük ngeni pwe esap fel ngeni pwal ekoch kot, nge Salomon esap aleasochisi mine ewe Samol mi Lapalap a allük ngeni. 11 Iei mine ewe Samol mi Lapalap a üreni Salomon, “Pokiten ka föri ei föför, pwe ka atai ai we pwon o aleasolap ngeni ai kewe pwüüng üa allük ngonuk, üpwe fokun angei senuk ewe mwü o ngeni eman lein noum kewe nöüwis. 12 Nge fän iten Tafit semom we, üsap föri ei lupwen ka chüen manau. Iwe, üpwe angei ewe mwü seni lepöün noum we mwän. 13 Üsap angei seni unusen ewe mwü, nge üpwe likiti ngeni eu chök ainang fän iten Tafit nei we chon angang, pwal fän iten Jerusalem ewe telinimw üa filätä.”

14 Iwe, ewe Samol mi Lapalap a pesei Hatat ewe re Etom, pwe epwe pälüeni o ü ngeni Salomon. Ätei eman mwirimwirin ewe kingen Etom. 15 Pun me lom, lupwen Tafit a maun ngeni Etom, Joap ewe meilapen sounfiu a feila ikenan, pwe epwe peiaseni ekewe mi ninnila. 16 Pun Joap me ekewe sounfiun Israel meinisin ra nom Etom lon ükükün wonu maram, nge lon ena fansoun ra ärala ekewe mwän meinisin lon Etom. 17 Nge Hatat a süla Isip fiti ekoch chon Etom nöün saman kewe chon angang. Lon ena fansoun Hatat a chüen eman chök kükün ät. 18 Iwe, ra sai seni Mitian o tori Paran, ra pwal nuki ekoch mwän seni Paran o feila Isip ren Farao ewe kingen Isip. Nge Farao a ngeni Hatat eu imw me eu fanü, a pwal ngeni anan mongö. 19 Hatat a fokun küna ümöümöch me ren Farao, pwe Farao a ngeni pwin Tapenes we pwe pwülüan. Tapenes pwülüen Farao i ewe kiwin. 20 Iwe, pwin Tapenes we a nöüni me won Hatat eman ät itan Kenupat. Tapenes a foleni ätei lon imwen Farao, nge Kenupat a nom ren nöün Farao kewe mwän. 21 Lupwen Hatat a rong me lon Isip pwe Tafit a mäla, pwal Joap ewe meilapen mwichen sounfiu, Hatat a üreni Farao, “Kose mochen mwüt ngeniei pwe üpwe liwiniti poputän fanüei.” 22 Nge Farao a aisini, “Ifa usun, üa tümwününgau ngonuk, pwe ka ekiekin liwiniti poputän fanüom?” Nge Hatat a üreni, “Apwi, kopwe chök mwüt ngeniei pwe üpwe le feila.”

23 Kot a pwal pesei Reson nöün Eliata we mwän, pwe epwe ü ngeni Salomon. Ätei Reson ewe mi sü seni an samol Hatateser ewe kingen Sopa. 24 Iwe, a amwichato ekoch aramas, nge i a wiliti souemwenin eu mwichen aramas mi küt liaper fän pöchökül. Ei a fis mürin Tafit a niela ekewe sounfiun Sopa. Iwe, Reson me an mwich ra feila Tamaskus o nonom ikenan. Ra seikätä Reson pwe epwe king lon Tamaskus. 25 Reson a ü ngeni chon Israel lon unusen ränin manauen Salomon o afeiengaueer usun chök Hatat. Iwe, lupwen a nemeni Siria, a oput chon Israel.

26 Pwal Jeropoam nöün Nepat we mwän eman re Efraim seni Sereta a ü ngeni ewe king, i eman nöün Salomon kewe nöüwis, iten inan Serua, eman fefin mi mä pwülüan. 27 Iei popun an ü ngeni ewe king. Salomon a amasoua ewe leni peliötiuen Jerusalem o pinela ewe pwang mi nom lon tittin ewe telinimwen Tafit saman we. 28 Iwe, ewe mwän Jeropoam a fokun lipwäköch. Nge lupwen Salomon a küna pwe ewe alüal a fokun achocho le angang, a awisa pwe epwe nemeni unusen ewe mwichen chon angangen kinroosi lon fanüen ekewe ainangen Manasa me Efraim. 29 Lon eu rän, lupwen Jeropoam a feila seni Jerusalem, ewe soufos Ahia seni Silo a churi me won al, lon eu fanü mi amassawa, nge ra chök ruomanüla. Iwe, Ahia a üföüf echö üf mi fö. 30 Mürin, Ahia a amwöchü püsin üfan mi fö a üföüf o kamwekisietiu lon engol me ruu kinikin. 31 Iwe, a üreni Jeropoam, “Kopwe angei fän itom engol kinikin. Pun iei alon ewe Samol mi Lapalap ewe Koten Israel: Nengeni, üpwe le angei seni Salomon ewe mwü o ngonuk engol ainang. 32 Nge Salomon epwe chök nemeni eu ainang fän iten nei chon angang Tafit, pwal fän iten Jerusalem, ewe telinimw üa filätä me lein telinimwen ekewe ainangen Israel meinisin. 33 Pun Salomon a likitieila o fel ngeni Astarot nöün chon Siton anüfefin me Kemos ewe koten Moap, pwal Molok ewe koten Amon. Salomon esap aleasochisiei, esap pwal föri mine a pwüng me fän mesei o apwönüetä ai kewe pwüüng me allük usun Tafit saman we a föri. 34 Nge üsap angei seni unusen ewe mwü, pun üpwe mwüt ngeni pwe epwe nemenem lon unusen ränin manauan. Ei üpwe föri fän iten Tafit nei we chon angang üa filätä, ätewe mi aleasochisi ai kewe allük me pwüüng. 35 Iwe, üpwe angei ewe mwü seni nöün Salomon we mwän o ngonuk engol ainang. 36 Nge eu ainang üpwe ngeni nöün we mwän, pwe epwe wor eman mwirimwirin Tafit nei we chon angang epwe sopwela le nemenem lon Jerusalem, ewe telinimw üa filätä pwe üpwe imweimw lon. 37 Iwe, Jeropoam, üpwe awisok pwe kopwe king lon Israel o nemenem won ükükün om mochen. 38 Are kopwe aüselinga meinisin mine üa allük ngonuk, are kopwe pwal aleasochisiei o föri mine a pwüng me fän mesei ren om apwönüetä ai kewe pwüüng me allük, usun Tafit nei we chon angang a föri, ngang üpwe etuk, üpwe pwal awisa ngonuk ewe wisen king lon Israel o fokun awora mwirimwirum lon ewe wis, usun üa awora mwirimwirin Tafit. 39 Pokiten än Salomon tipis üpwe atekisonätiu mwirimwirin Tafit, nge sap tori feilfeilachök.” 40 Iwe, Salomon a ekiekin niela Jeropoam. Iei mine Jeropoam a süla ren Sisak ewe kingen Isip o nonom Isip tori Salomon a mäla.

41 Iwe, lusun pworausen än Salomon föför meinisin, an angang meinisin me an tipachem a mak lon ewe puken uruwon Salomon. 42 Salomon a king lon unusen Israel me lon Jerusalem lon ükükün faik ier. 43 Iwe, Salomon a mäla, nge ra peiaseni lon ewe telinimwen Tafit saman we. Nge Rehopoam nöün we mwän a siwili lon wisan wisen king.