1 Iwe, lon ewe fansoun Apia nöün Jeropoam we ät a samau. 2 Jeropoam a üreni pwülüan, “Etto, kopwe asokala üfom, pwe esap wor eman a tongeni sillenuk pwe en pwülüei. Iwe, kopwe feila Silo ia Ahia ewe soufos a nom ie, ätewe mi apasa pwe üpwe kingen Israel. 3 Kopwe angei engol fochun pilawa, ekoch nokop me eu rumen chönün chunen, pwe kopwe uweela ren Ahia. Iwe, epwe ürenuk mine epwe fis ngeni ewe semirit.”

4 Iwe, pwülüen Jeropoam a föri iei usun. A feila Silo o tori imwen Ahia. Nge Ahia esap tongeni küna mwan, pun mesan ra toputop pokiten a chinlap. 5 Nge ewe Samol mi Lapalap a fen üreni Ahia, “Pwülüen Jeropoam epwe feito pwe epwe aisinuk usun nöün we ät, pun a samau. Ien me ien mine kopwe üreni.” Lupwen neminewe a feito, a pwomweni pwe itä i esap pwülüen Jeropoam we.

6 Iwe, lupwen Ahia a rong püngüpüngün pechen neminewe, lupwen a feito ren ewe asam, a üra, “Kopwe tolong pwülüen Jeropoam. Pwota ka pwomweni pwe itä en kosap pwülüen Jeropoam? Mi wor ai pworaus pöchökül fän itom. 7 Kopwe feila o üreni Jeropoam, ‘Iei alon ewe Samol mi Lapalap ewe Koten Israel: Üa atekiokotä seni lein ekewe aramas o awisok pwe kopwe emweni nei aramasen Israel. 8 Üa angei ewe mwü seni chon leimwen Tafit o ngonuk. Nge en kosap usun nei we chon angang Tafit mi apwönüetä ai kewe allük o aleasochisiei ren unusen lelukan, pun a föri mine a pwüng me fän mesei. 9 En ka föri mine a ngau lap seni chokewe meinisin ra akom mwom. Ka föri fän itom pwal ekoch kot me uluulun anü seni piras, ka pwal kulu sökürum ngeniei. Ren ei ka asongaei. 10 Iei mine üpwe aworato feiengau womw, üpwe ärala noum mwän meinisin seni ekewe kükün tori watte. Üpwe fokun arosala chon leimwom meinisin, usun eman aramas a pirumweela mettoch mi limengau, tori esap chüen wor och lusun. ✡1.King 15.29 11 Iwe, iteiten eman me eman me lein chon leimwom mi mäla me lon ewe telinimw kolak repwe ochei. Nge iteiten eman me eman mi mäla lemäl machang repwe ochei, pun ngang ewe Samol mi Lapalap üa kapas.’ 12 Nge en pwülüen Jeropoam kopwe liwiniti imwom. Lon ewe otun kopwe tolong lon asamen ewe telinimw, ewe semirit epwe mäla. 13 Iwe, chon Israel meinisin repwe kechüeiti o peiaseni. I chök me lein chon leimwen Jeropoam epwe peias, pokiten a wor och me won, mine ewe Samol mi Lapalap ewe Koten Israel a efich. 14 Iwe, ewe Samol mi Lapalap epwe pwal seikätä eman king epwe nemeni Israel. Ätei epwe ärala chon leimwen Jeropoam lon ewe rän. 15 Ewe Samol mi Lapalap epwe apwüngü Israel pwe epwe mwaukuk usun efoch wowo a mänükünük lon koluk. Epwe üttätä chon Israel seni lon ewe fanü mi mürina a ngeni ar kewe lewo, epwe pwal atoropasafeiliir pekilan ewe chanpupu Oifrat, pun ra asonga ewe Samol mi Lapalap ren ar föri uluulun ewe anüfefin Asera. 16 Iwe, epwe asechala chon Israel pokiten än Jeropoam tipis a föri, pwal pokiten an emweni chon Israel ngeni tipis.”

17 Mürin, pwülüen Jeropoam a ütä o liwinsefäliti Tirsa. Nge lupwen a ipwelong lon asamen imwan, ewe semirit a mäla. 18 Iwe, chon Israel meinisin ra kechüeiti o peiaseni, usun ewe soufos Ahia nöün ewe Samol mi Lapalap we chon angang a apasa fän alon. 19 Iwe, lusun pworausen än Jeropoam föför meinisin, ekewe maun a eäni me an nemenem, a mak lon puken uruwon ekewe kingen Israel. 20 Iwe, Jeropoam a nemenem lon ükükün rüe me ruu ier. Mürin a mäla, nge Natap nöün we mwän a siwili lon wisan wisen king.

21 Iwe, Rehopoam nöün Salomon we mwän a ierini faik me eu, lupwen a tolong lon wisan wisen king o nemenem lon Juta. A nemenem lon ükükün engol me fisu ier me lon Jerusalem ewe telinimw ewe Samol mi Lapalap a filätä me lein telinimwen ekewe ainangen Israel meinisin, pwe aramas repwe fel ngeni ie. Iten inan Nama, eman fin Amon. 22 Nge chon Juta ra föri mine a ngau me fän mesen ewe Samol mi Lapalap o asonga ren ar tipis ra föri lap seni mine ar kewe lewo ra föri. 23 Ra aüetä fän iter lenien fel won ekewe leni mi tekia, ra pwal aüetä ekewe ür me uluulun ewe anüfefin Asera won iteiten chuk pwal fän iteiten irä mi muresires pwe repwe fel ngeniir. ✡2.King 17.9-10 24 Nge a pwal wor mwän me lon ewe fanü, ra fangala inisir fän iten lisowu lon ekewe lenien fel ngeni anümwäl. Iwe, chon Israel ra föri ekewe föför mi anioput usun chök chon ekewe mwü ewe Samol mi Lapalap a asürela me mwer. ✡Tut 23.17

25 Iwe, lon alimuen ierin mwün ewe king Rehopoam, Sisak ewe kingen Isip a feito o maun ngeni Jerusalem. ✡2.Kron 12.2-8 26 A angei ekewe pisek mi aüchea me lon imwen ewe Samol mi Lapalap, pwal ekewe pisek mi aüchea me lon imwen ewe king o uweerela meinisin. A pwal uweala ekewe tittin maun seni kolt meinisin Salomon a föriir. ✡1.King 10.16-17; 2.Kron 9.15-16 27 Iwe, ewe king Rehopoam a föri tittin maun seni piras akasiwilin ekewe tittin maun seni kolt o ngeni ekewe meilapen chon mas mi mamasa asamalapen imwen ewe king, pwe repwe tümwünü. 28 Iteiten fansoun, lupwen ewe king a feila lon imwen ewe Samol mi Lapalap, ekewe chon mas ra eti o uwei ekewe tittin maun, mürin ra aliwinirela ngeni ewe rumwen chon mas.

29 Iwe, lusun pworausen än Rehopoam föför meinisin a mak lon puken uruwon ekewe kingen Juta. 30 Lon ei fansoun a chök fifis maun lefilen Rehopoam me Jeropoam. 31 Iwe, Rehopoam a mäla, nge ra peiaseni ren an kewe lewo lon ewe telinimwen Tafit. Nge Apia nöün we mwän a siwili lon wisan wisen king.