Aeuin Toropwe seni
Petrus
Kapas akom
I. Chon makkei ei toropwe: Ewe soukünö Petrus.
II. A mak ngeni iö: Ngeni ekewe souläng mi toropasfeil lon Asia Kisikis.
III. Itelapemongen ei toropwe: Än souläng pwora lon riaföü.
IV. Kapas aüchean ei toropwe: Souläng repwe amoleer, pwe repwe eäni ewe sokun ekiek Kraist a eäni lupwen a küna riaföü.
V. Masouen ei toropwe: Iei ewe aeuin toropwe seni Petrus a mak ngeni ekewe souläng, ra pwal iteni “nöün Kot aramas mi fil”, ir chokewe mi toropasfeil efengin ewe kinikinin Asia Kisikis. Aüchean masouen ei toropwe pwe epwe apöchöküla ekewe souläng mi aleani, ra tolong lon ninni me riaföü fänäsengesin ar lükü Jesus. Petrus a achema ngeni ekewe souläng ewe Pworausen Manau usun Jesus Kraist, usun an mäla me manausefäl, pwal usun an pwon pwe epwe liwinsefälito. Iei met repwe apilükülük ngeni. Iei popun repwe likitü lon ar riaföü, pwe epwe pwä enletin ar lükülük, repwe pwal angei liwiniir lon “ewe Rän lupwen Jesus Kraist epwe pwä.”
Me lükün an kei kapasen apöchökül lon fansoun riaföü, Petrus a pwal pese ngeni ekewe souläng, pwe repwe manaueni eu sokun manau mi fich ngeni nöün Kraist aramas.
VI. Tettelin masouen ei toropwe:
Kapas akom 1.1-2
Kapas achem usun än Kot angangen amanaua aramas 1.3-12
Kapasen fön pwe repwe manaueni eu manau mi pin 1.13–2.10
Met souläng repwe föri lon fansoun riaföü 2.11–4.19
Än souläng tipetekison me ar angang 5.1-11
Kapasen lesopolan 5.12-14
1
Kapong
1.1-2
1 Ngang Petrus nöün Jesus Kraist we soukünö, üa kapong ngeni nöün Kot kewe aramas mi fil, ir choisä mi toropasfeil lon ekewe fanü Pontus, Kalatia, Kapatosia, Asia me Petinia. 2 Ämi oua fil me ren Samach Kot, pun iei usun letipan, Ngünmifel a apinikemi pwe oupwe aleasochisi Jesus Kraist o küna limöch ren chaan. Ümöümöch me kinamwe epwe chomongola remi.
Eu apilükülük mi manau
1.3-12
3 Ousipwe mwareiti Kot ewe Semen ach Samol Jesus Kraist! Pun lon an tong mi lapalap a aupusefälikich ren än Jesus Kraist manausefäl seni mäla. Ei a aurakich ren eu apilükülük mi manau, 4 pwe sipwe feiöchüni och feiöch esap morola, esap tikipwül, esap pwal aiolol, a iseis lon läng fänäsengesimi. 5 Ekei feiöch ra fän itemi. Ren ämi lükülük oua küna tümwün ren än Kot manaman tori oupwe küna ewe manau mi molotä pwe epwe pwäla lon fansoun sopolan.
6 Oupwe fokun pwapwa ren ekei feiöch, inamwo ika oua küna letipeta iei lon fansoun mochomoch chök pokiten chomong sokun sosot oua riaföü ren. 7 Popun ämi tolong lon sosot, pwe epwe pwä enletin ämi lükülük. Kolt mi tongeni tala, nge a ketel lon ekkei pwe epwe pwä ewe enletin kolt. Iei usun ämi lükülük mi aüchea seni kolt epwe fokun küna sosot, pwe epwe nükücharala. Mürin oupwe küna iteüöch me ling me itetekia lon ewe Rän lupwen Jesus Kraist epwe pwä. 8 Ämi oua echeni Jesus, inamwo ika ousap fen küna i, oua lükü i, inamwo ika ousap küna i iei. Iei mine oua fokun pwapwa, ren sokun pwapwa esap naf lon ach kapas ach sipwe pwärätä, pun pwapwa mi ling, 9 pun oupwe küna sopolan ämi lükülük, iei manauen ngünümi.
10 Ekewe soufos ra achocho le küttaöchü pwe repwe silei usun ei manau. Ra osuni usun ei lifang Kot epwe ngenikemi. 11 Ra küttafichi inet fansoun me lapalapen an epwe feito. Iei ewe fansoun ewe Ngünün Kraist mi nom lor a itini lupwen ra kapas usun ekewe riaföü Kraist epwe tolong lon, pwal usun ewe ling epwe tori me mürin. 12 Kot a pwäri ngeni ekei soufos, pwe ar angang esap fän iten püsin ar feiöch, nge fän iten ämi feiöch, lupwen ar kapas usun ekewe mettoch oua rongorong iei seni ekewe chon künö mi aronga ngenikemi ewe Pworausen Manau ren manamanen Ngünmifel mi titito seni läng. Ikkei ekewe mettoch ekewe chon läng mwo nge ra mochen weweiti.
Kot a körikich ngeni eu manau mi pin
1.13-25
13 Iei mine oupwe amolätä ekiekimi ngeni ei angang. Oupwe püsin tümwünükemi o fokun anomu ämi lükülük won ewe feiöch epwe torikemi lupwen Jesus Kraist epwe pwäto. 14 Oupwe aleasochis ngeni Kot. Ousap mwüt ngeni manauemi epwe nom fän nemenien ekewe mocheniangau oua eäni me lom lupwen ousap mwo silei Kot. 15 Nge oupwe pin lon mettoch meinisin mine oua föri, usun chök Kot, ewe mi körikemi, a pin. 16 Pun a mak lon ekewe Toropwe mi Pin, “Oupwe pin, usun ngang üa pin.” ✡Lif 11.44-45; 19.2
17 Lupwen oua iotek ngeni Kot, oua aita ngeni i Samach, i ewe mi apwüngü aramas meinisin won ükükün mine eman me eman a föri, nge esap lifilifil. Iei mine lon fansoun ämi manau won ei fanüfan oupwe asamolu o meniniti i. 18 Pun oua silei pwe ousap mö ren mettoch mi morokai usun silifer ika kolt pwe oupwe ngas seni ewe manau mi lomotongau oua angei me ren ämi kewe lewo, 19 nge oua mö ren chaan Kraist mi aüchea, i eman lam esap wor terin are lapalapangauan. 20 Kraist a fen fil me ren Kot mwen esamwo fis fanüfan, nge a pwä lon fansoun sopolan fänäsengesimi. 21 Pokiten Kraist oua lükü Kot, ewe mi amanauasefäli i seni mäla o ngeni lingan. Iei mine ämi lükülük me ämi apilükülük a nom won Kot.
22 Iwe, pokiten oua alimöchükemi ren ämi aleasochisi mine a let o oua eäni tong enlet ngeni pwiimi kewe souläng, oupwe wesewesen echenifengenikemi ren unusen lelukemi. 23 Pun oua upsefäl ren Kapasen Kot mi manau o nonom tori feilfeilachök, usun nau nöün eman mi manau tori feilfeilachök, nge sap nöün eman mi mäla. 24 Pun iei usun mine a mak lon ekewe Toropwe mi Pin,
“Aramas meinisin ra wewe ngeni fetil,
nge linger meinisin ra wewe ngeni pön irä.
Ewe fetil a pwasala, nge ekewe pön irä ra mworotiu.
25 Nge än ewe Samol kewe kapas repwe nonom tori feilfeilachök.” Ei kapas iei ewe Pworausen Manau ra aronga ngenikemi. ✡Ais 40.6-8