1 Iwe, lupwen ekewe chon Filistia ra liapeni än Kot we pworofel, ra uwala seni Epineser tori Astot. 2 Mürin, ekewe chon Filistia ra angei än Kot we pworofel, ra uwalong lon imwen ar we uluulun anü Takon o iseis ünükün. 3 Iwe, lupwen ekewe aramasen Astot ra pwätä lesosorusichin sorotän ewe rän, ra küna pwe ar we uluulun anü Takon a chapala lepwül mwen än ewe Samol mi Lapalap we pworofel. Iwe, ra angei Takon o aüsefälietä won lenian. 4 Nge lupwen ra pwal pwätä lesosorusichin sorotän ewe rän, ra küna pwe ar we uluulun anü Takon a chapala lepwül mwen än ewe Samol mi Lapalap we pworofel. Iwe, möküran me pöün me ruofoch ra pöküla o nom won amwüchün fän ewe asamalap, inisin chök a nom. 5 Iei mine nöün Takon kewe souasor, pwal meinisin mi tolong lon imwen Takon lon Astot resap ipwetä won amwüchün fän asamalapen imwan tori ei fansoun. 6 Iwe, ewe Samol mi Lapalap a afeiengaua ekewe chon Astot me chon wisoposopun kewe. A ataela fanüer o ariaföüür ren pwo. 7 Nge lupwen ekewe aramasen Astot ra küna mine a fis, ra apasa, “Äm aisap mochen pwe än ewe Koten Israel we pworofel epwe nom rem, pun ar we Kot a afeiengauakem, pwal äm we kot Takon.” 8 Iei mine ra titi ekewe samolun chon Filistia meinisin o amwichafengeniir. Iwe, ra ais, “Met sipwe föri ngeni än ewe Koten Israel we pworofel?” Nge ir ra pälüeni, “Oupwe uwala än ewe Koten Israel we pworofel lon Kat.” Iei mine ra uwala lon Kat. 9 Nge mürin ar uwala ikenan, ewe Samol mi Lapalap a afeiengaua chon ewe telinimw o awarato wor niuokus watte. A ariaföüü aramasen ewe telinimw seni semirit tori chinlap, pwe pwo ra pwüküwu me wor. 10 Iei mine ra tinala Ekron än Kot we pworofel. Nge lupwen än Kot we pworofel a tori Ekron, ekewe aramasen Ekron ra puchöretä, “Ra uwato rech än ewe Koten Israel we pworofel, pwe epwe nikich meinisin.” 11 Iei mine ra titi ekewe samolun chon Filistia meinisin o amwichafengeniir. Iwe, ra üreniir, “Oupwe asü senikem än ewe Koten Israel ei pworofel pwe epwe liwiniti püsin lenian, nge esap nikem me nöüm aramas.” A wor mäla ren niuokus watte lemenen unusen ewe telinimw, pun Kot a fokun afeiengaueer. 12 Iwe, ekewe aramas resap mäla a üriir pwo, nge än chon ewe telinimw puchör a tori läng.