1 Iwe, Saul a ierini faik *ese fat ekewe ier lon Paipelin Ipru, lupwen a tolong lon wisan wisen king. Nge lupwen a nemenem lon Israel lon ükükün ruu ier, 2 Saul a filätä ülüngeröü mwän seni Israel. Iwe, rüengeröü ra nom ren Saul lon Mikmas pwal lon chukuchukutän ewe fanü Petel, nge engeröü ra nom ren Jonatan lon Kipea lon ewe fanü Peniamin. Nge ekewe lusun aramas a tinirela lon en me lenian. 3 Iwe, Jonatan a niela ewe mwichen sounfiun Filistia mi nom lon Kepa. Nge ekewe chon Filistia ra rong usun. Mürin Saul a tinala chon künö lemenen unusen ewe fanü, pwe repwe ettiki rappwa o asilefeili pwe ekewe chon Ipru repwe feito ngeni maun. 4 Iwe, chon Israel meinisin ra rong pwe Saul a niela eu mwichen sounfiun Filistia, ra pwal rong pwe chon Filistia ra oputeer. Iei mine ekewe aramas ra kökköto pwe repwe eti Saul le maun lon Kilkal.

5 Iwe, ekewe chon Filistia ra amwichafengeniir pwe repwe maun ngeni chon Israel ükükür ilik ngeröü woken me wonongeröü chon wawa oris, nge ükükün ekewe sounfiu usun föün pien aroset ren chomongur. Ra feitä Mikmas ötiuen Pet-awen o nonom ikenan. 6 Nge lupwen ekewe sounfiun Israel ra küna pwe ra oleelim, pun ra fokun nom lechach, ra op lon föimw, lon pwang, fän achau, lon ekewe nas pwal lon ekewe chönüttu. 7 Ekoch me leir ra feila won ekewe petepeeten ewe chanpupu Jortan tori ewe fanü Kat me ewe fanü Kiliat. Iwe, Saul a chüen nom lon Kilkal, nge ekewe aramas meinisin mi nom ren ra chechech fän ar niuokus. 8 Saul a witiwiti Samuel lon ükükün fisu rän, ewe fansoun mi fil me ren Samuel. Nge Samuel esap feito Kilkal. Iei mine ekewe aramas ra toropasfeil seni Saul. ✡1.Sam 10.8

9 Mürin, Saul a apasa, “Oupwe uwato rei ewe asoren kek, pwal ewe asoren kinamwe.” Iwe, Saul a eäni ewe asoren kek. 10 Nge lon ewe otun a wes me eäni ewe asoren kek, Samuel a war. Iwe, Saul a feila pwe epwe churi o kapong ngeni. 11 Samuel a ais, “Met ka föri?” Saul a pälüeni, “Lupwen üa küna pwe ekewe aramas ra toropasfeil seniei, en kosap pwal war lon ewe fansoun ka pwonei, nge ekewe chon Filistia ra pwal mwichefengen lon Mikmas, 12 üa ekieki, ‘Iei ekewe chon Filistia repwe le feito o maun ngeniei me lon Kilkal, nge üsamwo tüngor ngeni ewe Samol mi Lapalap pwe epwe ümöümöch ngeniei.’ Iei mine üa ököpöchöü o eäni ewe asoren kek.” 13 Iwe, Samuel a üreni Saul, “Ka föri mine a umwes. Kosap aleasochisi än ewe Samol mi Lapalap om we Kot allük a allük ngonuk. Pun ika ka aleasochis, ewe Samol mi Lapalap epwe apöchöküla mwum lon Israel tori feilfeilachök. 14 Nge iei mwum esap chüen soposopola. Ewe Samol mi Lapalap a kütta eman mwän mi lelukeni lelukan o seikätä pwe epwe samol won nöün aramas, pun kosap aleasochis ngeni mine a allük ngonuk.” ✡Föf 13.22 15 Mürin, Samuel a feila seni Kilkal o feila Kipea lon ewe fanü Peniamin. Nge Saul a aleani iteiten ekewe aramas mi nom ren ina epwe ükükün wonopükü mwän.

16 Iwe, Saul me Jonatan nöün we mwän, pwal ekewe aramas mi nom rer ra nom Kepa lon ewe fanü Peniamin. Nge ekewe chon Filistia ra nom lon Mikmas. 17 Iwe, ekewe sounfiun Filistia mi kütta liaper ra towu seni lenier lon ülüngat mwich. Eu mwich a feila ngeni Ofra lon ewe fanü Sual, 18 eu mwich a feila ngeni Pet-horon, nge pwal eu mwich a feila ngeni ewe kiä mi sapetiu ngeni ewe lemolun Sepoim akawenewenen ewe fanüapö.

19 Lon ena fansoun esap wor eman chon angang ngeni mächä a nom lemenen unusen ewe fanü Israel, pun ekewe chon Filistia resap fokun mwüt ngeni ekewe chon Ipru pwe repwe föri ketilas me siles. 20 Nge eman me eman ekewe chon Israel a feitiu ren ekewe chon Filistia pwe epwe seimi an pisekin tuw pwül, an küwa, nöün kouk ika nöün kama. 21 Nge liwinin än eman seimi eu pisekin tuw pwül me efoch küwa ruoföü föün moni silifer, nge liwinin än eman seimi efoch kouk me efoch wichiwichin kow eföü kükün föün moni silifer. 22 Iei mine lon ewe ränin, lupwen ewe maun a poputä, esap wor efoch ketilas ika siles lepöün ekewe sounfiu meinisin mi eti Saul me Jonatan, chilon chök Saul me Jonatan nöün we mwän. 23 Iwe, eu mwichen sounfiun Filistia a feila pwe epwe somwei ewe al mi chökis ngeni Mikmas.