1 Iwe, Tafit a feila seni Kat o süla lon ewe föimw mi nom asen ewe telinimw Atulam. Nge lupwen pwin kewe me chon leimwen saman meinisin ra rong usun, ra feila ren ikenan. ✡Kölf 57; 142 2 Pwal chokewe meinisin mi nom lon riaföü, meinisin mi wor ar liwinimang me meinisin mi kinamwengau ra chufengen ren, nge Tafit a nöür souemwen. Iwe, iteiten chokewe mi nom ren ina epwe ükükün föpükü mwän.

3 Seni ikenan Tafit a feila Mispa lon Moap o üreni ewe kingen Moap, “Kose mochen kopwe mwüt ngeni semei me inei pwe repwe nom reöm, tori üpwe silei mine Kot epwe föri fän itei.” 4 Iwe, a likitiir ren ewe kingen Moap, nge ir ra nom ren lon unusen ewe fansoun Tafit a nom lon ewe lenien op mi pöchökül. 5 Mürin, ewe soufos itan Kat a feito ren Tafit o üreni, “Kosap chök nom lon ewe lenien op mi pöchökül. Kopwe feila lon ewe fanü Juta.” Iei mine Tafit a feil seni ikenan o feila lon ewe wöllapen Heret.

6 Iwe, Saul a rong pwe Tafit me ekewe mwän mi eti ra pwä. Saul a nom Kipea o mot fän efoch irä itan tamarisk won ewe pal, a kamwöch wokun siles, nge nöün kewe meilap meinisin ra ütä ünükün. 7 Iwe, Saul a üreni nöün kewe meilap mi ütä ünükün, “Oupwe rongorong, ämi re Peniamin. Ifa usun, Tafit epwe ngeni eman me eman leimi fanü me tanipin wain? Ifa usun, epwe atolongakemi lon wisen meilapen sounfiu won ngeröü me pükü? 8 Iei popun pwe ämi meinisin oua rawangauaei? Esap wor eman me leimi a pwäri ngeniei pwe nei mwän a föri eu pwonen atipeeu ngeni Tafit. Esap wor eman me leimi a chüngüei ika pwäri ngeniei pwe nei mwän a etipetipa Tafit nei we chon angang, pwe epwe ü ngeniei o opooperiei, usun a fis ikenai.” 9 Mürin, Toek ewe re Etom mi ütä lein nöün Saul kewe meilap a pälüeni, “Üa küna Tafit, lupwen a feito Nop ren Ahimelek nöün Ahitup we mwän. 10 Iwe, Ahimelek a angei öüröür seni ewe Samol mi Lapalap fän iten Tafit, a ngeni amötün, a pwal ngeni ewe ketilas nöün Koliat ewe re Filistia.” ✡1.Sam 21.7-9; Kölf 52

11 Mürin, ewe king a titi ewe souasor Ahimelek me chon leimwen saman meinisin, ir ekewe souasor mi nom Nop. Ir meinisin ra feila ren ewe king. 12 Iwe, Saul a üra, “Kopwe aüseling, Ahimelek.” Nge Ahimelek a apasa, “Ewer, ai samol.” 13 Iwe, Saul a üreni, “Pwota oua rawangauaei, en me Tafit? Pwota ka mwüt ngeni pilawa me efoch ketilas, ka pwal angei öüröür seni Kot fän itan? Iei mine a ü ngeniei o opooperiei usun a fis ikenai.” 14 Mürin, Ahimelek a pälüeni ewe king, “Ai king, iö me lein noum chon angang a allükülük usun Tafit? A pwülüeni noum we föpwül, a pwal meilapen ewe mwichen sounfiu mi tümwünuk o iteüöch me lein chon leimwom. 15 Ifa usun, epwe kärän ikenai ai üpwe angei öüröür seni Kot fän itan? Apwi! Üa tüngor pwe en ai king kosap tip ngeniei ngang noum chon angang och ika ngeni chon leimwen semei meinisin. Pun ngang noum chon angang üsap fokun silei och usun ei pworaus.” 16 Nge ewe king a üra, “Ahimelek, ämi me chon leimwen semom meinisin oupwe fokun mäla.” 17 Mürin, ewe king a üreni ekewe sounfiu chon mas mi ütä ünükün, “Oupwe kul o niela nöün ewe Samol mi Lapalap kewe souasor, pun ra peni Tafit. Ra silei pwe Tafit a sü, nge resap pwäri ngeniei.” Nge nöün ewe king kewe nöüwis resap mochen angatä won nöün ewe Samol mi Lapalap kewe souasor, pwe repwe nirela. 18 Mürin, ewe king a üreni Toek, “En kopwe kul o niela ekewe souasor.” Iei mine Toek a kul o nirela. Lon ena rän a niela ükükün walik me limman souasor mi üföüf ewe üf itan efot. 19 Iwe, Saul a pwal niela meinisin mine a nom lon Nop ewe telinimwen souasor. A niela mwän me fefin, semirit me ekewe mönükol pwal kow, aas me sip.

20 Nge eman lein nöün Ahimelek kewe mwän itan Apiatar a süla o feila ren Tafit. 21 Apiatar a apworausa ngeni Tafit pwe Saul a niela nöün ewe Samol mi Lapalap kewe souasor. 22 Iwe, Tafit a üreni Apiatar, “Lupwen Toek ewe re Etom a nom ikenan lon ewe ränin, üa silei pwe epwe asile ngeni Saul pwe üa nom Nop. Ngang popun pwe aramasen chon leimwen semom meinisin ra mäla. 23 Kopwe nom rei, nge kosap niuokus. Pun ätewe mi mochen niikela a pwal mochen nieila. Kopwe chök nom rei pwe kopwe manau.”