1 Iwe, lon ekana rän ekewe chon Filistia ra achufengeni nöür mwichen sounfiu, pwe repwe maun ngeni chon Israel. Nge Akis a üreni Tafit, “Kopwe silei pwe ämi me noum kewe aramas oupwe etiei le feila maun.” 2 Iwe, Tafit a üreni Akis, “A men fokun öch, ngang noum chon angang, kopwe püsin küna mine üa tongeni föri.” Nge Akis a üreni Tafit, “Men fokun öch. Üpwe awisok pwe kopwe nei chon tümwünüei lon unusen manauom.”

3 Lon ewe fansoun Samuel a mäla, chon Israel meinisin ra kechüeiti o peiaseni lon Rama püsin telinimwan. Iwe, Saul a asüela ekewe watawa me sourong seni ewe fanü. ✡1.Sam 25.1; Lif 20.27; Tut 18.10-11 4 Iwe, ekewe sounfiun Filistia ra mwichefengen, ra feila o nom lon Sunem. Nge Saul a achufengeni sounfiun Israel meinisin o nom won ewe chuk Kilpoa. 5 Lupwen Saul a küna ewe mwichen sounfiun Filistia, a niuokus o fokun chechech fän mwärin. 6 Iei mine Saul a aisini ewe Samol mi Lapalap mine epwe föri, nge ewe Samol mi Lapalap esap pälüeni ren tan ika ren Urim *Wewen Urim eu minen asisil ra aea le asisilla letipen Kot. ika ren soufos. ✡Num 27.21 7 Mürin, Saul a üreni nöün kewe chon angang, “Oupwe kütta fän itei eman watawa fefin pwe üpwe feila ren o aisini.” Nge nöün chon angang ra üreni, “Mi wor eman watawa fefin lon Entor.”

8 Iwe, Saul a asokala lapalapan o siwili üfan. A feila ren ewe fefin lepwin, nge ruoman mwän ra eti. Saul a üreni ewe fefin, “Kopwe angei öüröürei seni eman ngün. Kopwe fokun awarato fän itei ewe ngün üpwe föüni ngonuk itan.” 9 Iwe, ewe fefin a üreni, “Ka fokun silei mine Saul a föri, pwe a ärawu seni ewe fanü ekewe watawa me sourong. Pwota ka anomu och lenien likatup fän iten manauei, pwe kopwe awarato ai mäla?” 10 Nge Saul a pwon fän akapel iten ewe Samol mi Lapalap ngeni ewe fefin, “Mwo manauen ewe Samol mi Lapalap, esap wor feiengau epwe toruk ren ei föför.” 11 Mürin, ewe fefin a aisini, “Ngünün iö üpwe awarato fän itom?” Saul a pälüeni, “Kopwe awarato ngünün Samuel.” 12 Lupwen ewe fefin a küna ngünün Samuel, a leüömong le puchör o üreni Saul, “Pwota ka atupuei? En king Saul.” 13 Nge ewe king a üreni neminewe, “Kosap niuokus. Met ka küna?” Ewe fefin a üreni Saul, “Üa küna lapalapen eman ngün a tötä seni fän pwül.” 14 Iwe, Saul a aisini, “Ifa usun lapalapan?” Nge neminewe a pälüeni, “Ngünün eman chinlap mwän a feitä, nge a üföüf echö owokot.” Mürin, Saul a mefi pwe iei i ngünün Samuel, a chapetiu lepwül o asamolu.

15 Mürin, Samuel a aisini Saul, “Pwota ka aosukosukaei ren om awaraeito?” Nge Saul a üra, “Ngang üa nom lon riaföü watte. Pun ekewe chon Filistia ra maun ngeniei, nge Kot a kul seniei, esap pwal chüen pälüeniei ren ekewe soufos ika ren tan. Iei mine üa köruketo pwe kopwe üreniei mine üpwe föri.” 16 Iwe, Samuel a üra, “Pwota ka aisiniei, nge ewe Samol mi Lapalap a kul senuk o wiliti chon oputom? 17 Ewe Samol mi Lapalap a föri ngonuk usun mine a fen kapas me rei. Pun a angei senuk ewe mwü o ngeni chon arum Tafit. ✡1.Sam 15.28 18 Pokiten kosap aleasochisi alon ewe Samol mi Lapalap, kosap pwal fokun arosala ekewe chon Amalek, iei mine ewe Samol mi Lapalap a föri ei föför ngonuk ikenai. ✡1.Sam 15.3-9 19 Pwal ei epwe fis. Ewe Samol mi Lapalap epwe atolongok me ekewe chon Israel fän nemenien ekewe chon Filistia. Iwe, lesor ämi me noum kewe mwän oupwe nom rei. Nge ewe Samol mi Lapalap epwe pwal atolonga ewe mwichen sounfiun Israel fän nemenien ekewe chon Filistia.”

20 Lon ewe chök otun Saul a turuwenewenela lepwül o fokun niuokus ren mine Samuel a apasa. Esap wor an pöchökül, pun esap mongö lon unusen ewe rän me ewe pwin. 21 Iwe, lupwen ewe fefin a feito ren Saul, a küna pwe a fokun niuokus. A üreni, “Ngang noum chon angang fefin üa aleasochis ngonuk. Üa püsin fang manauei o aüselinga mine ka üreniei. 22 Kose mochen kopwe aüselinga aloi ngang noum chon angang fefin. Üpwe uwato reöm ekis mongö. Kopwe mongö pwe kopwe pöchökül, lupwen kopwe liwinla ngeni leniom.” 23 Iwe, Saul a apasa, “Üsap fokun mochen mongö.” Nge ekewe mwän mi eti me ewe fefin ra pesei pwe epwe mongö. Iwe, a aüselinga alor, a ütä me lepwül o mot won ewe peet. 24 Nge a wor ren ewe fefin eman nienifön kow mi aümanau. Iwe, a müttir niela, a pwal angei pilawa mi amas, a öüwa o umuni pilawa esap wor iis lon. 25 Mürin a iseis ewe mongö fän mesen Saul me ekewe mwän mi eti. Iwe, ra mongö. Mürin, ra ütä o feila lon ewe pwinin.