1 Iwe, Salomon a föri eu rongen asor seni piras, langataman me chölapan ükükün ilik fiit, nge tekian ükükün engol me limu fiit. ✡Eks 27.1-2 2 Mürin a föri eu sepien koluk mi fokun watte seni piras. Iwe, ewe sepi a kumosumos, chölapan seni epek tori epek ükükün engol me limu fiit, alololun ükükün fisu esop fiit, nge pwelin won aaman ükükün faik me limu fiit. 3 Iwe, pwelin ünükün ewe sepien koluk me fän aaman a wor ruu telin uluulun pamkin mi förunusfengen me ewe sepien koluk. 4 Ewe sepien koluk a nom won engol me ruoman uluulun ätemwänin kow, ülüman ra sape ngeni efeng, ülüman ra sape ngeni lotou, ülüman ra sape ngeni ör, nge ülüman ra sape ngeni ötiu. Iwe, ewe sepien koluk a nom wor, nge wänükür meinisin ra sorolong fan. 5 Malülün ewe sepien koluk ükükün ülüngat inis, nge aaman a usun chök aamen eu kap, pwal usun chök epö pön kiop mi mas. Iwe, masouen ewe sepi ina epwe ükükün engol me limu ngeröü kalon koluk. 6 A pwal föri engol sepi fän iten töttöl o anomu limu peliörün ewe imwenfel, nge limu a anomu peliefeng. Lon ekei sepi repwe chiri ekewe mönün asor ra eäni fän iten asoren kek, nge ewe sepien koluk mi fokun watte ekewe souasor repwe tütü seni. ✡Eks 30.17-21

7 Iwe, a föri engol lenien atittin seni kolt lon pwüngün lapalaper o anomuur lon ewe rum mi pin me lon ewe imwenfel, limefoch a anomu peliör, nge limefoch a anomu peliefeng. ✡Eks 25.31-40 8 A pwal föri engol chepel o anomuur lon ewe rum mi pin me lon ewe imwenfel, limu a anomu peliör, nge limu a anomu peliefeng. Iwe, a pwal föri ipükü sepi seni kolt. ✡Eks 25.23-30 9 Iwe, a föri ewe leni mwen ewe imwenfel fän iten ekewe souasor, pwal ewe leni watte lükün ewe imwenfel me ekewe asamalap lefiler, a pwal apachatä piras won ekewe asamalap. 10 Nge ewe sepien koluk mi fokun watte a anomu lükün pwokukun ewe imwenfel me ötiuörün.

11 Iwe, Huram a pwal föri nape, söföl me sepi. Iei usun Huram a awesi ekewe angang meinisin a pwon ngeni ewe king Salomon pwe epwe föri fän iten ewe imwenfel. 12 Ikkei mine Huram a föri: Ruofoch ür, ruu leton mi usun chök lapalapen sepi mi nom asen ekewe ür, ekewe ruapa sein mi nut ra nom won ekewe ruu leton, 13 föpükü uluulun apel fän iten ekewe ruapa sein mi nut, ruu telin uluulun apel won epa sein mi nut, pwe repwe nom won ekewe ruu leton, 14 ekewe kuruma me ekewe sepi mi nom won ekewe kuruma, 15 ewe sepien koluk mi fokun watte me ekewe engol me ruoman uluulun ätemwänin kow mi nom fan, 16 pwal nape, söföl me fook, me ekewe sokopaten pisek meinisin. Ekei pisek meinisin Huram a föri seni piras mi misimis fän alon ewe king Salomon fän iten imwen ewe Samol mi Lapalap. 17 Iwe, ewe king a föri ekei pisek me lon ewe lenien ketel me för pisek seni mächä lon paan seni pwülüpar lefilen Sukot me Saretan lon ewe maasies ünükün ewe chanpupu Jortan. 18 Salomon a föri chomong chomong ekei sokopaten pisek meinisin, nge esap wor eman a silei ükükün choun ewe piras a aea.

19 Iwe, Salomon a pwal föri ekewe pisek meinisin mi nom lon ewe imwenfel seni kolt: ewe rongen asor, ekewe chepel fän iten ewe pilawa mi pin, 20 ekewe lenien atittin me ar kewe lamp seni kolt mi mürina, repwe tin me mwen ewe rum mi unusen pin, usun a fen pwüngüla, 21 ekewe uluulun pön irä, ekewe lamp me ekewe achip, 22 ekewe fich, ekewe sepi, pwal ekewe sepi fän iten apach mi pwokus me ekewe sepi fän iten moli. Ekei pisek meinisin ra för seni kolt mi wesewesen mürina. Pwal ekewe asamen ewe rum mi unusen pin me ekewe asamen ewe rum mi pin ra för seni kolt.