1 Iwe, Joas a ierini fisu, lupwen a popuetä le nemeni Juta. A nom lon Jerusalem o nemenem lon ükükün faik ier. Iten inan we Sipia seni Persepa. 2 Joas a föri mine a pwüng me fän mesen ewe Samol mi Lapalap lon ükükün ränin manauen ewe souasor Jehoiata. 3 Nge Jehoiata a ngeni Joas ruoman pwülüan. Iwe, a wor nöün mwän me nöün fefin.

4 Ekoch fansoun mürin, Joas a ekiekietä pwe epwe försefäli mine a ta me won imwen ewe Samol mi Lapalap. 5 Iwe, a amwichafengeni ekewe souasor me chon ewe ainangen Lefi o üreniir, “Oupwe feila lon ekewe telinimwen Juta o ioni moni seni ekewe chon Israel meinisin, pwe sipwe försefäli mine a ta me won imwenfelin ach we Kot iteiten ier. Oupwe pi pwe oupwe amüttiri ewe angang.” Nge chon ewe ainangen Lefi resap müttir ngeni ewe angang. 6 Iei mine ewe king a titi ewe souasor mi lap Jehoiata o aisini, “Pwota kosap pesei ngeni chon ewe ainangen Lefi, pwe repwe angei seni ekewe chon Juta me chon Jerusalem ewe takises Moses nöün ewe Samol mi Lapalap we chon angang a apwüngala ngeni ekewe chon Israel fän iten ewe imwenfel seni mangaku, ia ekewe allük ra nom ie?” ✡Eks 30.11-16 7 Pun Atalia ewe fefin mi ngau me nöün kewe mwän ra tomwälilong lon ewe imwenfel. Ra pwal mwo nge aea ekewe pisek mi pin meinisin seni lon imwen ewe Samol mi Lapalap fän iten ar angang ngeni ekewe anü Paal.

8 Iwe, ewe king a allük, pwe ekewe mwän seni ewe ainangen Lefi repwe föri eu pwor o anomu lükün asamalapen imwen ewe Samol mi Lapalap. 9 Mürin, ra arongafeili lemenen Juta me Jerusalem, pwe aramas repwe uwato ewe takises fän iten ewe Samol mi Lapalap, Moses nöün Kot we chon angang a fen akom le angei seni ekewe chon Israel lon ewe fanüapö. 10 Iwe, ekewe souemwen me ekewe aramas meinisin ra uwato ar takises fän pwapwa o uwalong lon ewe pwor tori a urela. 11 Iteiten fansoun, lupwen ra küna pwe a wor chomong moni lon ewe pwor, ekewe mwän seni ewe ainangen Lefi ra uwala ewe pwor ren nöün ewe king kewe meilap. Iwe, nöün ewe king seketeri me ewe mi tupuni ewe souasor mi lap ra feito o apöla ewe pwor, mürin ra aliwinala ngeni lenian. Iei usun ra föri iteiten rän, pwe ra ionifengeni chomong moni. 12 Iwe, ewe king me Jehoiata ra ngeni ätekewe mi nemeni angangen imwen ewe Samol mi Lapalap ewe moni, nge ir ra möni ngeni ekewe chon ses fau me ekewe taikü, ngeni ekewe chon angang ngeni mächä me piras, pwe repwe försefäli mine a ta me won imwen ewe Samol mi Lapalap. 13 Chokewe mi föri ewe angang ra fokun achocho le angang ngeni ewe imwenfel. Ra försefäli mine a ta me won o apöchöküla, pwe a usun chök me mwan. 14 Nge lupwen ra wes le angang, ra uwato lusun ewe moni ren ewe king me Jehoiata. Ren ei moni ra föri pisek fän iten angangen lon imwen ewe Samol mi Lapalap, pwal fän iten ekewe asoren kek. Ra föri sepi me sokopaten pisek seni kolt me silifer. Iwe, ra eäni asoren kek lon imwen ewe Samol mi Lapalap iteiten fansoun lupwen ränin manauen Jehoiata. 15 Nge lupwen Jehoiata a chinlapala o ierini ipükü ilik, a mäla. 16 Iwe, ra peiaseni lon ewe telinimwen Tafit lein ekewe king, pun a föri föför mi mürina ngeni chon Israel, ngeni Kot me ewe imwenfel.

17 Nge mürin än Jehoiata mäla, ekewe samolun Juta ra feito o asamolu ewe king. Mürin, ewe king a aüselinga ar tüngor. 18 Iei mine ekewe aramas ra ükütiu le fel lon imwen ewe Samol mi Lapalap än semelaper we Kot o fel ngeni ekewe uluulun ewe anüfefin Asera me ekewe uluulun anümwäl. Ren ei Kot a song ngeni chon Juta me Jerusalem, pun ra tipis. 19 Inamwo än ewe Samol mi Lapalap tinala soufos leir, pwe repwe fönöör o aliwinisefäliir ngeni i, nge ekewe aramas resap mochen aüselingeer.

20 Mürin, Ngünün Kot a feitiu won Sekaraia nöün ewe souasor Jehoiata we mwän. Ätei a ütä wilitekia seni ekewe aramas o üreniir, “Iei alon Kot: Pwota oua purätiu än ewe Samol mi Lapalap kewe allük? Iei popun ousap tongeni feiöch. Pokiten oua likitala ewe Samol mi Lapalap, i a likitikemiila.” 21 Nge ekewe aramas ra rawangauei Sekaraia. Fän än ewe king allük ra monei ngeni fau lon ewe leni lükün imwen ewe Samol mi Lapalap. 22 Iei usun ewe king Joas esap chechemeni än Jehoiata semen Sekaraia kirikiröch ngeni, nge a niela nöün mwän. Iwe, lupwen än Sekaraia mäla a apasa, “Ewe Samol mi Lapalap a küna ei föför, i epwe ngonuk chappan.” ✡Mat 23.35; Luk 11.51

23 Iwe, lesopolan ewe ier ekewe sounfiun Siria ra feito pwe repwe maun ngeni Joas. Ra tolong lon Juta me Jerusalem o niela samolun ekewe aramas meinisin. Ra pwal angei chomong liaper o tinala ren ewe kingen Tamaskus. 24 Iei mwo chokükünün ewe mwichen sounfiun Siria, nge ewe Samol mi Lapalap a mwüt ngeniir pwe repwe akufu ewe mwichen sounfiun Juta mi chomong, pun ekewe chon Juta ra likitala ewe Samol mi Lapalap än ar kewe lewo we Kot. Iei usun ekewe sounfiun Siria ra apwüngü Joas.

25 Iwe, lupwen ra feil seni Joas, ra likitala lon an kinas mi fokun watte. Nge nöün nöüwis ra rawangauei o niela me won an peet, pun ra ngeni chappen an nimanauei nöün ewe souasor Jehoiata we mwän. Iei usun Joas a mäla. Iwe, ra peiaseni lon ewe telinimwen Tafit, nge resap peiaseni lon peiasen ekewe king. 26 Ätekewe mi rawangauei Joas iter Sapat nöün Simeat we mwän eman fin Amon, me Jehosapat nöün Simrit we mwän eman fin Moap. 27 Iwe, pworausen nöün Joas kewe mwän, ekewe kapasen osuni usun an feiengau, usun an försefäli mine a ta me won ewe imwenfel a makelong lon puken awewen uruwon ekewe king. Iwe, Amasia nöün we mwän a siwili lon wisan wisen king.