1 Iwe, Ahas a ierini rüe, lupwen a tolong lon wisan wisen king. A nom lon Jerusalem o nemenem lon ükükün engol me wonu ier. Nge Ahas esap föri mine a pwüng me fän mesen ewe Samol mi Lapalap usun Tafit an we lewo. 2 A apirü än ekewe kingen Israel föför, a pwal föri uluulun ewe anü Paal seni mächä. 3 Iwe, a keni apach mi pwokus lon ewe lemolun Pen-hinom, a pwal mwo nge keni nöün kewe ät pwe an asor ngeni ekewe uluulun anümwäl, usun än chon ekewe mwü föför mi anioput, ekewe mwü ewe Samol mi Lapalap a asürela me mwen ekewe aramasen Israel. 4 Ahas a pwal asor o keni apach mi pwokus lon ekewe lenien fel won ekewe leni tekia, won ekewe chuk, pwal fän iteiten irä mi muresires.

5 Iei mine ewe Samol mi Lapalap an we Kot a mwüt ngeni ewe kingen Siria pwe epwe akufu Ahas. Ätei a pwal liapeni eu mwichemongun aramas seni Juta o emwenirela Tamaskus. Kot a pwal mwüt ngeni Peka nöün Remalia we mwän ewe kingen Israel, pwe epwe akufu Ahas ren eu ninni mi fokun watte. 6 Pun Peka a niela ükükün ipükü rüe ngeröü sounfiun Juta mi fokun pwora lon eu chök rän. Ei a fis pokiten ra likitala ewe Samol mi Lapalap än ar kewe lewo we Kot. ✡2.King 16.5; Ais 7.1 7 Iwe, Sikri eman sounfiu seni Efraim a niela Maseia nöün ewe king mwän me Asrikam ewe meilapen chon tümwünü ewe imwen king, pwal Elkana ewe kisin fän ewe king.

8 Iwe, ekewe sounfiun Israel ra liapeni rüepükü ngeröü aramaser kewe chon Juta, fefin, ät me nengin. Ra pwal angei chomong choon wokur o uwala Samaria. 9 Nge eman nöün ewe Samol mi Lapalap soufos itan Otet a nom lon ewe telinimw Samaria. Ätei a towu lükün ewe telinimw, pwe epwe churi ewe mwichen sounfiu mi liwinla Samaria. Iwe, a üreniir, “Pokiten ewe Samol mi Lapalap än ämi kewe lewo we Kot a song ren chon Juta, iei mine a mwüt ngenikemi pwe oupwe akufuur. Nge ämi oua nirela ren eu ninni mi lapalap, pwe ngauen ewe föför a tori läng. 10 Nge iei oua ekiekin nemenemengau ngeni ekewe mwän me fefin seni Juta me Jerusalem o nöüniir amanau. Ifa usun, ousap silei pwe pwal ämi oua tipis ngeni ewe Samol mi Lapalap ämi we Kot? 11 Iei oupwe aüselingaei. Oupwe aliwinala aramasemi kewe chon Juta oua liapeniir, pun ewe Samol mi Lapalap a fokun lingeringeritikemi.” 12 Mürin, ekoch samol seni ewe ainangen Efraim iter Asaria nöün Johanan we mwän, Perekia nöün Mesilemot we mwän, Jehiskia nöün Salum we mwän me Amasa nöün Hatlai we mwän ra pwal pälüeni ätekewe mi liwinto seni maun 13 o üreniir, “Ousap uwato ekewe chon oola ikei, pun ren ei oua atoto woch tipis ngeni ewe Samol mi Lapalap mi chu ngeni ewe tipis me föföringau sa fen föri. Pun ach tipis a kon watte, pwe Kot a fokun lingeringeriti Israel.” 14 Iei mine ekewe sounfiu ra likitala ekewe chon oola me choon wokur me mwen ekewe samol me unusen ewe mwich. 15 Iwe, ekewe mwän mi fen föü iter ra angei ekewe chon oola o aüföüfa chokewe mi selela me leir ren ekewe üf ra angei lon maun. Ra aüföüfeer o aipweipweer, ra ngeniir ener me ünümer o säfeeni kinaser. Nge chokewe meinisin mi apwangapwang ra amoteer won ekewe aas o uweerela ren aramaser lon Jeriko ewe telinimw, ia a wor ie chomong irä palm. Mürin, ekewe chon Israel ra liwiniti Samaria.

16 Lon ena fansoun ewe king Ahas a titi Tiklat-pileser ewe kingen Asiria pwe epwe alisi. 17 Pun ekewe chon Etom ra tosefälilong lon ewe fanü, ra akufu chon Juta o uwala ekewe aramas mi oola. 18 Pwal ekewe chon Filistia ra tolong lon ekewe telinimw mi nom fäsonun ekewe chuk, pwal lon ewe fanü Nekep lon Juta. Iwe, ra liapeni Pet-semes, Aialon, Keterot, Soko pwal Timna me Kimso fiti wisoposopur. Iwe, ra imweimw ikenan. 19 Iwe, ewe Samol mi Lapalap a asapwilätiu Juta pokiten Ahas ewe kingen Juta, pun a apöchöküla föför mi ngau me lon Juta o fokun tipis ngeni ewe Samol mi Lapalap. 20 Mürin, Tiklat-pileser ewe kingen Asiria a feito ren Ahas, a ü ngeni o aweiresi, nge esap alisi. 21 Iwe, Ahas a angei ekewe pisek aüchea seni imwen ewe Samol mi Lapalap, seni imwen ewe king me imwen ekewe samol o ngeni ewe kingen Asiria. Nge esap wor alilisin me ren.

22 Nge lon an riaföü, ei king Ahas a fen alapala an tipis ngeni ewe Samol mi Lapalap. 23 A asor ngeni ekewe koten Siria mi akufu i o apasa, “Pokiten än ekewe kingen Siria kewe kot ra alisiir, ngang üpwe asor ngeniir pwe repwe pwal alisiei.” Nge ei a chök atoto feiengau won i me chon Israel meinisin. 24 Ahas a achufengeni ekewe sepi seni ewe imwenfel o atatakisiir. A pwal apüngala ekewe asamalapen imwen ewe Samol mi Lapalap o senätä rongen asor lon iteiten pwokukun Jerusalem. 25 Iwe, lon iteiten telinimwen Juta a föri lenien fel won ekewe leni tekia, pwe epwe keni apach mi pwokus ngeni pwal ekoch kot. Ren ei a fis, pwe ewe Samol mi Lapalap än an kewe lewo we Kot a song ngeni. 26 Nge lusun pworausen än Ahas föför seni lepoputan tori lesopolan an nemenem a makelong lon puken uruwon ekewe kingen Juta me Israel. 27 Ahas a mäla, nge ra peiaseni lon ewe telinimw Jerusalem, nge resap peiaseni lon peiasen ekewe kingen Israel. Iwe, Hiskia nöün we mwän a siwili lon wisan wisen king. ✡Ais 14.28