1 Iwe, Josia a ierini walu, lupwen a tolong lon wisan wisen king. A nom lon Jerusalem o nemeni Juta lon ükükün ilik me eu ier. 2 Josia a föri mine a pwüng me fän mesen ewe Samol mi Lapalap o apirü mine Tafit an we lewo a föri, esap fokun aleasolap ngeni än Kot kewe allük. ✡Jer 3.6

3 Iwe, lon awaluen ierin mwün Josia, lupwen a chüen eman alüalät, a popuetä le fel ngeni än Tafit an we lewo we Kot. Nge lon engol me ruuen ierin mwün a popuetä le atai me lon Juta me Jerusalem ekewe lenien fel won ekewe leni tekia, ekewe uluulun ewe anüfefin Asera me ekewe uluulun anümwäl mi fal pwal ekewe uluulun anümwäl seni mächä. 4 Fän alon Josia ra amökätiu ekewe rongen asor ia aramas ra asor ngeni Paal ie. Ra ataetiu ekewe rongen asoren ötüöt mi nom aser o atatakisi ekewe uluulun ewe anüfefin Asera, ekewe uluulun anümwäl mi fal me ekewe uluulun anümwäl seni mächä. Iwe, ra fokun atatakisiir, pwe ra usun chök pwül moromor, o amorafeili ewe pwül won peiasen chokewe mi asor ngeniir. ✡2.King 21.3; 2.Kron 33.3 5 A pwal kenala chün nöün Paal kewe souasor won ar kewe rongen asor. Ikei mine Josia a limetawu seni Juta me Jerusalem. ✡1.King 13.2 6 Iwe, lon ekewe telinimwen Manasa, Efraim me Simeon pwal tori Naftali, pwal lon ekewe leni mi tala ünükür, 7 Josia a amökätiu ekewe rongen asor o fokun atatakisi ekewe uluulun ewe anüfefin Asera me ekewe uluulun anümwäl, pwe ra wewe ngeni pwül moromor. A pwal ataetiu ekewe rongen asoren ötüöt meinisin lemenen unusen ewe fanü Israel. Mürin, Josia a liwiniti Jerusalem.

8 Iwe, lon ewe engol me waluen ierin mwün Josia, lupwen a wes me limeti ewe fanü me ewe imwenfel, ewe king Josia a tinala Safan nöün Asalia we mwän me Maseia kepinan ewe telinimw Jerusalem, pwal Joa nöün Joahas we mwän ewe soumak, pwe repwe försefäli mine a ta me won imwen ewe Samol mi Lapalap an we Kot. 9 Ra feila ren ewe souasor mi lap Hilkia o ngeni ewe moni aramas ra uwato lon ewe imwenfel. Iei ewe moni ekewe mwän seni ewe ainangen Lefi mi mamasa asamalapen ewe imwenfel ra ionifengeni seni chon ekewe ainangen Manasa me Efraim, seni chokewe meinisin mi chüen manau lon Israel, pwal seni chon ekewe ainangen Juta, Peniamin me chon Jerusalem meinisin. 10 Ei moni ra ngeni ekewe mwän mi emweni angangen imwen ewe Samol mi Lapalap, nge ir ra nöünöü ewe moni ren försefälin me kaüsefälin ewe imwenfel. 11 Ra ngeni ekewe taikü ei moni, pwal ngeni ekewe soukaü imw, pwe repwe kamö fau mi fal me pap fän iten ekewe aföü me ekewe pamping fän iten ekewe imw ekewe kingen Juta ra mwütätä pwe repwe tala. 12 Iwe, ekewe mwän ra angang fän allükülük. Nge Jahat me Opatia ekewe mwän seni ewe ainangen Lefi, ir mwirimwirin Merari, pwal Sekaria me Mesulam, ir mwirimwirin Kohat, ra nemeniir. Iwe, ekewe mwän seni ewe ainangen Lefi meinisin mi sipeöch le ettiki pisekin ettik 13 ra nemeni chokewe mi uwou mettoch mi chou o emweni meinisin mi föri sokopaten angang. Iwe, ekoch me lein ekewe mwän seni ewe ainangen Lefi ra pwal soumak, nöüwis me chon mamasa ekewe asamalap.

14 Iwe, lupwen ra uwawu ewe moni aramas ra uwato ren imwen ewe Samol mi Lapalap, ewe souasor Hilkia a küna ewe puken allük än ewe Samol mi Lapalap, ekewe allük Kot a ngeni Moses. 15 Mürin, Hilkia a üreni ewe seketeri Safan, “Üa küna ewe puken allük me lon imwen ewe Samol mi Lapalap.” Iwe, Hilkia a ngeni Safan ewe puk. 16 Nge Safan a uwala ewe puk ren ewe king o apworausa ngeni, “Noum kewe nöüwis ra föri meinisin mine ka awisa ngeniir. 17 Ra angei unusen ewe moni a nom lon imwen ewe Samol mi Lapalap o ngeni ekewe souemwenin angang me ekewe chon angang.” 18 Mürin, Safan a pwal üreni ewe king, “Ewe souasor Hilkia a ngeniei ei puk.” Iwe, Safan a aleani ewe puk ngeni ewe king.

19 Nge lupwen ewe king a rong kapasen ewe puken allük, a kamwei üfan fän an letipeta. 20 Mürin, ewe king a allük ngeni Hilkia me Ahikam nöün Safan we mwän, ngeni Apton nöün Mika we mwän, me ewe seketeri Safan, pwal ngeni Asaia nöün ewe king chon angang, 21 “Oupwe feila, oupwe aisini ewe Samol mi Lapalap fän itei, pwal fän iten chokewe mi chüen manau lon Israel me Juta usun ekewe kapas mi mak lon ei puk ra küna. Pun än ewe Samol mi Lapalap song a fokun watte ngenikich, pokiten ach kewe lewo resap aleasochisi alon, pwe repwe föri meinisin mine a mak lon ei puk.”

22 Iei mine Hilkia me chokewe ewe king a titi ra feila ren ewe soufos fefin Hulta mi nom lon aruuen kinikinin ewe telinimw Jerusalem. Pwülüen neminei Salum nöün Tikwa we mwän, nge Tikwa nöün Haras. Salum a wisen tütümwünü üföüfen lon ewe imwenfel. Iwe, ra apworausa ngeni neminewe mine a fis. 23 Nge Hulta a üreniir, “Oupwe liwinla o üreni ewe mwän mi tinikemiito rei, 24 pwe iei alon ewe Samol mi Lapalap ewe Koten Israel, ‘Üpwe awarato feiengau won ei leni, pwal won aramasan, ekewe anümamau meinisin mi mak lon ei puk mi alea ngeni ewe kingen Juta. 25 Pokiten ra likitieila o kenala apach mi pwokus ngeni pwal ekoch kot, ra pwal asongaei ren ar kewe uluulun anümwäl ra püsin föri. Iei mine ai song epwe watte ngeni ei leni, nge esap wesila.’ 26 Nge iei usun mine oupwe üreni ewe kingen Juta mi tinikemiito pwe oupwe aisini ewe Samol mi Lapalap ewe Koten Israel, pwe iei alon, ‘Ka aüselinga ai kewe kapas mi mak lon ewe puk, 27 ka pwal apwetetei lelukom o atekisonok me fän mesei, lupwen ka rongorong ai kei kapasen afeiengau ngeni ei leni me aramasan, ka atekisonok me fän mesei, ka kamwei üfom o kechü me mwei, iei popun ngang üa aüselinga om iotek. 28 Iei mine, lupwen kopwe mäla, kopwe mäla fän kinamwe o peias ren om kewe lewo. Nge kosap küna ewe feiengau üpwe aworato won ei leni pwal won aramasan.’ ” Iwe, ekewe mwän ra liwinla o uwala ekei kapas ren ewe king.

29 Mürin, ewe king Josia a titi ekewe souakomwen Juta me Jerusalem, nge ir meinisin ra mwicheto ren. 30 Iwe, ewe king a feila ren imwen ewe Samol mi Lapalap, nge ekewe souakomwen Juta me ekewe chon Jerusalem meinisin, pwal ekewe souasor me ekewe mwän seni ewe ainangen Lefi, ekewe aramas kis me aramas lap, meinisin ra eti. Ewe king a aleani ngeniir kapasen lon ewe puken pwon meinisin ra küna me lon imwen ewe Samol mi Lapalap. 31 Nge ewe king a ütä lon lenian ren ewe ür o eäni eu pwon me fän mesen ewe Samol mi Lapalap, pwe epwe aleasochis ngeni ewe Samol mi Lapalap o apwönüetä an kewe allük me pwüüng ren unusen lelukan me unusen ngünün. Epwe pwal föri pwüngün kapasen ewe pwon mi mak lon ei puk. 32 Mürin, ewe king a pesei ngeni chokewe mi nom lon Jerusalem me Peniamin, pwe repwe tümwünü ei pwon. Iei mine ekewe chon Jerusalem ra aleasochisi pwüngün ewe pwon ra eäni ngeni än ar kewe lewo we Kot. 33 Iwe, Josia a ataela ekewe uluulun anümwäl mi anioput meinisin mi nom lon fanüen chon Israel o allük, pwe meinisin mi nom lon Israel repwe chök angang ngeni ewe Samol mi Lapalap ar we Kot. Iwe, lon unusen ränin manauen Josia resap tokola seni ar aleasochis ngeni ewe Samol mi Lapalap än ar kewe lewo we Kot.