8
Usun än souläng lifang
8.1-15
Ämi pwiich kana souläng, aia mochen ämi oupwe silei usun mine a fis lon ekewe mwichefel lon Masetonia ren än Kot ümöümöch. Ra küna watten sosot ren ekewe riaföü a toriir. Nge ar pwapwa a fokun lapalap, pwe ra fokun fangafangöch lon ar lifang, inamwo ika ra fokun wöüngau. Üa pwäri ngenikemi, pwe ra lifang won ükükün ar tongeni, nge pwal lap seni ar tongeni. Seni püsin mochenin letiper ra fokun tütüngor ngenikem, pwe repwe pachelong lon ewe angangen alilis fän iten ekewe chon pin lon Jutea. Rom 15.26 Iwe, ei alilis a fen lap seni mine aia tongeni apilükülükü. Akomwan ra fangala püsin manauer ngeni ach Samol, nge mürin ra pwal fangala püsin ir ngenikem ren letipen Kot. Iei mine aia pesei Titus, ätewe mi popuetä ei angang, pwe epwe sopwela o alisikemi, pwe oupwe awesala ei angang mi fis fän tong. Ämi oua fokun pisekisekila lon mettoch meinisin: lon ämi lükü Kraist, lon ämi silei kapas, lon ämi silelap, lon ämi achocho le alilis, pwal lon ämi tongekem. Iei mine sia mochen pwe oupwe pwal fangafangöch lon ei angang mi fis fän tong.
Üsap mochen allük ngenikemi ren ekei kapas. Nge ren ai aiti ngenikemi usun än ekewe pwal ekoch achocho le alilis, üa sotuni ai üpwe küna enletin ämi chen. Pun oua silei ewe ümöümöch än ach Samol Jesus Kraist, inamwo ika a pisekisekila, nge a wöüngauela fän itemi, pwe ämi oupwe pisekisekila ren an wöüngau.
10 Iwe, iei ai öüröür ngenikemi won ei angangen alilis: A mürina ngenikemi, pwe oupwe awesala iei met oua popuetäni lon ewe ier a la. Ousap chök akom le föri ewe alilis, nge oua pwal tipeeu ngeni le föri. 11 Iei mine oupwe sopwela o awesala ewe angang. Oupwe achocho ngeni an epwe wesila, usun oua fen amolätä lon ämi akot. Oupwe lifang won ükükün met mi wor remi. 12 Pun are a wor remi ewe mochen lifang, Kot epwe etiwa ämi lifang won ükükün met oua tongeni, sap won ükükün met ousap tongeni.
13 Ngang üsap mochen pwe ekoch repwe mecheres, nge ämi oupwe weires, nge üa mochen pwe ämi oupwe wewefengen. 14 Pun lon fansoun ikenai somwen wöümi epwe alisi met ra osupwang ren, pwe lupwen epwe tori ämi osupwang, ir repwe alisikemi ren somwen wöür. Iwe, iei usun ämi meinisin oupwe wewefengen. 15 Pun a mak lon ekewe Toropwe mi Pin, “Iö a ioni chomong esap wor somwan, nge iö a ioni kükün esap nafangau.” Eks 16.18
Titus me chienan kana
8.16-24
16 Iwe, aia kilisou ngeni Kot ren an atolonga lon letipen Titus pwe epwe achocho le alisikemi usun chök pwal äm. 17 Titus esap chök etiwa äm tüngor, nge a pwal fokun achocho an epwe alisikemi, pwe a püsin filätä seni mochenin letipan pwe epwe feila remi. 18 Aia pwal tinala eman pwiich pwe epwe eti Titus, i eman mi iteföüla lon ekewe mwichefel meinisin fän iten an angangen afalafala ewe Pworausen Manau. 19 Sap iei chök, nge a pwal fil me ren chon ekewe mwichefel pwe epwe etikem lon äm sai. Epwe alisikem le tümwünü ei alilis aia ionifengeni, pwe ach Samol Jesus Kraist epwe ling ren, epwe pwal pwä pwe aia achocho le alisi ekewe souläng mi osupwang.
20 Äm aia püsin afälikem, pwe esap wor eman epwe tongeni atipisikem ren lapalapen äm tümwünü ei lifang mi watte. 21 Pun aia fokun ekiekin föri met mi pwüng, sap chök me mwen mesen ach Samol, nge pwal me mwen mesen aramas meinisin. SalF 3.4 (LXX)
22 Aia pwal tinala pwiich we pwe epwe etiir. Aia sotuni i fän chomong o küna pwe a fokun achocho le alilis fansoun meinisin. Nge iei a fen alapala an achocho, pun a fokun apilükülükükemi. 23 Iwe, ren Titus, i chiechiei mi etiei lon ai angangen alisikemi. Nge ren pwiich kewe ekoch mi eti Titus, ir ra tupuni ekewe mwichefel o alinga Kraist. 24 Iei mine oupwe pwäri ngeni ekei mwän leten ämi chen, pwe chon ekewe mwichefel meinisin repwe küna o silei pwe a pwüng äm sikäsinikemi.

8:4: Rom 15.26

8:15: Eks 16.18

8:21: SalF 3.4 (LXX)