1 Iwe, püsin ngang Paulus üa tüngormau ngenikemi, ngang ätewe aramas ra apasa pwe üa tekison lupwen üa nom remi, nge üa kapas pöchökül lupwen üa toau senikemi. Ren än Kraist tekison me kirikiröch 2 üa tüngor ngenikemi, pwe ousap peseei ai üpwe kapas pöchökül ngenikemi, lupwen üpwe feila remi. Üa silei pwe üpwe tongeni eäni kapas pöchökül ngeni chokewe mi apasa pwe aia chök föri föförün fanüfan. 3 Mi pwüng pwe aia nom lon ei fanüfan, nge aisap maun lon lapalapen fanüfan. 4 Ekewe pisekin maun aia aea le maun sap pisekin ei fanüfan, nge pisekin Kot mi manaman, aia aea le atai ekewe lenien pöchökül. 5 Äm aia awesi ekewe kapas mi mwäl o ataetiu ekewe leni mi tekia meinisin mi epeti än aramas repwe silei Kot. Aia liapeni sokun ekiekin aramas meinisin, pwe repwe aleasochis ngeni Kraist. 6 Nge mürin ämi alletätä unusen ämi aleasochis, äm aia molotä ngeni äm aipwe apwüngü chokewe meinisin mi aleasolap.

7 Ämi oua chök nenengeni met a pwä me lükün. Are mi wor eman a ekieki pwe i nöün Kraist, i epwe ekiekisefäli usun püsin i, pun pwal äm nöün Kraist usun chök i. 8 Pun ngang üsap säw, inamwo ika a kon lap ai aingaing won ewe manaman ach Samol a ngenikem pwe aipwe aea le apöchöküla manauen ämi souläng, nge sap fän iten aipwe aea le atai ämi souläng. 9 Üsap mochen pwe oupwe ekieki pwe üa mochen aniuokusukemi ren nei kewe toropwe. 10 Pun ekoch aramas ra apasa, “Kapasen nöün Paulus kewe toropwe ra ken o pöchökül, nge lupwen a püsin nom rech a apwangapwang o an kewe kapas ra aücheangau.” 11 Ena sokun aramas repwe fokun weweiti pwe esap wor sokofesenin lefilen met aia makkei lon nöüm toropwe lupwen aia toau senikemi me met aia föri lupwen aia nonom remi.

12 Ewer, aisap tongeni püsin atettelikem ika anönnöfengenikem me chokewe mi püsin aitöchüür. A ifan me watten umwesiir! Ra püsin föri och aükük pwe repwe maselong lon, mürin ra püsin aükü manauer ren. 13 Nge me rem, äm aingaing esap lu seni ewe aükük, epwe chök nom won aükükün ewe angang Kot a awisa ngenikem, a pwal pachelong äm angang leimi. 14 Pokiten ämi oua nom lon ei aükük, äm aisap lu seni lupwen aia feila remi o uwato ewe Pworausen Manau usun Kraist. 15 Iei mine aisap aingaing won ewe angang ekewe ekoch aramas ra föri mi lu seni ewe aükük Kot a awisa ngenikem. Nge aia apilükülüköch pwe ämi lükü epwe mämäritä, pwe aipwe tongeni föri lefilemi eu angang mi fokun watte, nge aipwe chök föri lon ewe aükük Kot a awisa ngenikem. 16 Mürin aia tongeni afalafala ewe Pworausen Manau lon pwal ekoch fanü pekilan fanüemi, nge aisap aingaing won och angang eman a fen föri lon ewe leni Kot a awisa ngeni. 17 Iei usun mine a mak lon ekewe Toropwe mi Pin, “Iö a mochen aingaing epwe fokun aingaing won ach Samol.” ✡Jer 9.24 18 Pun esap wor allükülükün än eman püsin aitöchü, nge iö ach Samol a aitöchü, ina i a iteüöch.