1 Iwe, lon aruuen ierin mwün Jehoas nöün Jehoahas we ewe kingen Israel, Amasia nöün Joas we a tolong lon wisan wisen king o nemeni Juta, 2 lupwen a ierini rüe me limu. A nom lon Jerusalem o nemenem lon ükükün rüe me tiu ier. Iten inan Jehoatin seni Jerusalem. 3 Iwe, Amasia a föri mine a pwüng me fän mesen ewe Samol mi Lapalap, nge esap usun chök Tafit an we lewo. A chök apirü meinisin mine Joas saman we a föri. 4 Nge ekewe lenien fel won ekewe leni tekia resap katala. Iwe, ekewe aramas ra chök sopwela le eäni ar asor o keni apach mi pwokus wor. 5 Iwe, lon ewe otun, lupwen Amasia a kamwöchüla won unusen nemenemen mwün, a niela ekewe nöüwis mi niela saman we ewe king. 6 Nge esap niela nöür kewe, pwe a föri mine ewe Samol mi Lapalap a allük, usun a mak lon ewe puken allük än Moses, “Sam resap ninnila pokiten än nöür tipis, nge nau resap ninnila pokiten än semer tipis. Nge eman me eman epwe mäla pokiten püsin an tipis.” ✡Tut 24.16

7 Iwe, Amasia a niela engol ngeröü chon Etom me lon ewe Lemolun Salt o liapeni ewe telinimw Sela. Iwe, a aita ngeni ewe telinimw Jokteel, nge a chüen iteni ei it tori ikenai.

8 Mürin, Amasia a tinala chon künö ren Jehoas ewe kingen Israel pwe repwe üreni, “Kopwe feito pwe sipwe künafengenikich.” 9 Nge Jehoas ewe kingen Israel a tinala ei pworaus ren Amasia ewe kingen Juta, “Efoch iräfölüföl mi nom won Lepanon a tiitiila ren efoch setar won Lepanon o apasa, ‘Kopwe mwütätä noum föpwül pwe nei alüal epwe pwülüeni.’ Nge eman manmwacho a pwerela ren o purätiu ewe iräfölüföl. 10 Ka fokun akufu chon Etom, nge iei ka sikesik. Kopwe menemenöch ren om iteföüla o nomotiu lon leniom. Pwota kopwe awarato womw riaföü, pwe ämi me chon Juta oupwe feiengau?”

11 Nge Amasia esap mochen rongorong. Iei mine Jehoas ewe kingen Israel a feila pwe epwe maun ngeni Amasia ewe kingen Juta. Iwe, ra künafengeniir me lon Pet-semes lon ewe fanü Juta. 12 Iwe, chon Juta ra kuf ren chon Israel, pwe eman me eman a süla ngeni lenian. 13 Jehoas ewe kingen Israel a liapeni Amasia ewe kingen Juta arun Pet-semes. Mürin, Jehoas a feila Jerusalem o ataetiu tittin ewe telinimw seni ewe Asamalapen Efraim tori ewe Asamalapen Lepwokuku ükükün wonopükü fiit. 14 Iwe, Jehoas a angei ewe kolt me silifer meinisin, pwal ekewe sepi meinisin mi nom lon imwen ewe Samol mi Lapalap, a pwal angei ekewe pisek aüchea me lon imwen ewe king. A pwal uwala aramas o liwiniti Samaria.

15 Nge lusun pworausen än Jehoas kewe föför meinisin, an pwora me an maun ngeni Amasia ewe kingen Juta a mak lon puken uruwon ekewe kingen Israel. 16 Jehoas a mäla, nge ra peiaseni lon Samaria ren ekewe kingen Israel. Nge Jeropoam nöün we mwän a siwili lon wisan wisen king.

17 Iwe, Amasia ewe kingen Juta a manau lon ükükün engol me limu ier mürin än Jehoas ewe kingen Israel mäla. 18 Nge lusun pworausen än Amasia kewe föför meinisin a mak lon puken uruwon ekewe kingen Juta. 19 Iwe, ekewe chon oputa Amasia ra rawangauei me lon Jerusalem, nge Amasia a süla Lakis. Nge ra attapwa tori Lakis o niela me ikenan. 20 Mürin ra uwala inisin won oris lon Jerusalem o peiaseni ren an kewe lewo lon ewe telinimwen Tafit. 21 Iwe, ekewe aramasen Juta meinisin ra seikätä Ussia, pwe epwe siwili Amasia saman we lon wisan wisen king. Ussia a ierini engol me wonu, lupwen a seikitä. 22 Mürin än saman mäla, Ussia a liapenisefäli ewe telinimw Elat o aüsefälietä.

23 Iwe, lon engol me limuen ierin mwün Amasia nöün Joas we ewe kingen Juta, Jeropoam nöün Jehoas we a tolong lon wisan wisen king o nemeni Israel. A nom lon Samaria o nemenem lon ükükün faik me eu ier. 24 Jeropoam a föri mine a ngau me fän mesen ewe Samol mi Lapalap. Esap likitala ekewe tipis meinisin ewe king Jeropoam nöün Nepat we a föri, lupwen a emweni chon Israel ngeni tipis. 25 Jeropoam a angeesefäli ekewe kinikinin fanü chon Israel ra fanüeni me lom seni ewe al mi ale ngeni Hamat a nom efeng tori ewe Setin Mäla a nom ör, usun ewe Samol mi Lapalap ewe Koten Israel a kapas ngeni nöün we chon angang Sona nöün Amitai we mwän, ewe soufos seni Kat-hefer. ✡Sona 1.1 26 Iwe, ewe Samol mi Lapalap a küna pwe chon Israel meinisin seni ekewe amanau tori ekewe chon ngas ra nom lon riaföü watte, esap wor eman mi alisiir. 27 Nge sap tipen ewe Samol mi Lapalap pwe epwe arosala chon Israel seni won fanüfan. Iei mine a amanaueer ren Jeropoam nöün Jehoas we mwän.

28 Nge lusun pworausen än Jeropoam föför meinisin, an pwora me an maun, pwal usun an aliwinisefäli Tamaskus me Hamat ngeni Israel, a mak lon puken uruwon ekewe kingen Israel. 29 Iwe, Jeropoam a mäla, nge ra peiaseni ren ekewe kingen Israel, nge Sekaria nöün we mwän a siwili lon wisan wisen king.