1 Iwe, lupwen Isiposet nöün Saul we mwän a rong pwe Apner a mäla me lon Hepron, esap chüen wor an apilükülük, nge chon Israel meinisin ra rükö. 2 A wor ruoman mwän ren Isiposet, ir meilapen ewe mwichen sounfiu mi kütta liaper, iten eman Paana, iten pwal ewe eman Rekap. Ätekei nöün Rimon mwän ewe re Peniamin seni Perot. Iwe, Perot a nom lon kinikinin ewe fanü Peniamin. 3 Pun ekewe poputän aramasen Perot ra süla Kitaim o chon siamü ikenan tori ikenai.

4 Iwe, Jonatan nöün Saul we mwän a wor eman nöün mwän mi ter pechen itan Mefiposet. Ätei a ier limu, lupwen ewe pworaus usun än Saul me Jonatan mäla a feito seni Jesreel. Iwe, ewe chon tümwünü ewe ät a eki o süla fan. Nge lupwen a müttir le sü fan, ewe ät a turutiu pwe a mwen. ✡2.Sam 9.3

5 Iwe, Rekap me Paana ra feila o tori imwen Isiposet, lupwen a asösö leoloas otun pwichikaren akkar. 6 Ra tolong lukalapen ewe imw itä repwe angang wiich, nge ra posu luken Isiposet o süla. 7 Iei usun mine a fis: Lupwen ar tolong lon ewe imw, Isiposet a möür won an peet lon an rum. Iwe, ra posu o niela Isiposet, ra pwal pöküela üan. Mürin ra angei möküran o feila lon ewe lemolun Jortan lon unusen ewe pwin. 8 Iwe, ra uwala möküren Isiposet ren Tafit lon Hepron o üreni, “Iei möküren Isiposet nöün Saul we mwän ewe chon oputom mi elliapok o mochen niikela. Ikenai ewe Samol mi Lapalap a ngeni Saul me mwirimwirin kana chappen ar föför ngonuk, en äm samol me äm king.” 9 Nge Tafit a pälüeni Rekap me Paana pwin we, “Mwo manauen ewe Samol mi Lapalap mi amanauaei seni lon ai weires meinisin, 10 lupwen eman a feito rei lon Siklak o üreniei pwe Saul a mäla, a ekieki pwe a asileto rei eu pworaus mi mürina. Nge ngang üa turufi o niela. Iei ewe liwin üa ngeni fän iten an uwato ewe pworaus. ✡2.Sam 1.1-16 11 Nge epwe fen ifa usun, lupwen aramas mi ngau ra niela eman mwän mi pwüng me lon püsin imwan, lupwen an möür won an peet? Iei üpwe ngenikemi chappen ämi nimanauei Isiposet o ärikemiila seni won fanüfan.” 12 Mürin, Tafit a allük ngeni nöün kewe sounfiu pwe repwe niela Rekap me Paana. Iwe, ra nirela, ra pöküela pöür me pecher o aitiueretä ünükün ewe nomun Hepron. Nge ra angei möküren Isiposet o peiaseni lon peiasen Apner lon Hepron.