1 Iwe, eu ier mürin, lepoputän fansoun leräs, lupwen ekewe king ra feila maun, Tafit a tinala Joap fiti nöün kewe meilap me ekewe sounfiun Israel meinisin. Ra akufu ekewe chon Amon o pwelifeili Rapa fän pisekin maun. Nge Tafit a chök nonom lon Jerusalem. ✡1.Kron 20.1

2 Iwe, a fis lon eu olopalan, lupwen Tafit a pwätä seni an lenien asösö o fetal won imwan imwen king, a küna seni won imwan eman fefin mi tütü. Nge ewe fefin a fokun liöch. 3 Mürin, Tafit a tini eman pwe epwe ais usun ewe fefin. Iwe, eman a üreni, “Pwota, nge Patsipa nöün Eliam we fefin pwülüen Uria ewe re Hit.” 4 Iei mine Tafit a tinala chon künö pwe repwe angei Patsipa. Iwe, neminewe a feito ren Tafit, nge Tafit a kon ren. Lon ewe otun neminewe a kärän wes seni an limelim seni an samaun fefin. Mürin, a liwiniti imwan. 5 Iwe, Patsipa a mefi pwe a pwopwo. A tinala pworaus ren Tafit o üreni, “Ngang üa pwopwo.”

6 Mürin, Tafit a tinala pworaus ren Joap o üra, “Kopwe tinato rei Uria ewe re Hit.” Iei mine Joap a tinala Uria ewe re Hit ren Tafit. 7 Iwe, lupwen Uria a feito ren, Tafit a aisini usun Joap pwal usun ekewe sounfiu, ika ra nonomöch, a pwal ais usun lapalapen ewe maun. 8 Mürin, Tafit a üreni Uria, “Kopwe feila lon imwom o asösö mwo ekis.” Nge lupwen Uria a towu seni ewe imwen king, Tafit a atapwala mürin eu lifang. 9 Nge Uria esap feila lon imwan, pwe a chök annut leasamalapen ewe imwen king fiti nöün ewe king kewe chon angang meinisin. 10 Lupwen ra üreni Tafit pwe Uria esap feila lon imwan, Tafit a aisini Uria, “Ifa usun, kosap liwinto seni eu leni mi toau? Pwota kosap feila lon imwom?” 11 Iwe, Uria a üreni Tafit, “Ewe pworofel pwal chon Israel me chon Juta ra nom lon imw mangaku lon wirasen maun, nge ai samol Joap me noum kewe meilap ra nom lon eu leni mi äsewewetä. Ifa usun ai üpwe feila lon imwei pwe üpwe mongö o ün pwal kon ren pwülüei? Mwo manauom, üsap föri iei usun.” 12 Mürin, Tafit a üreni Uria, “Kopwe nomotiu ikei ikenai, nge lesor üpwe tinukela.” Iei mine Uria a nom lon Jerusalem lon ewe rän tori sorotan. 13 Iwe, Tafit a körato pwe epwe mongö ren o ün, a pwal asakaua. Nge lon ewe kuniolun Uria esap pwal feila lon imwan, pwe a kon lon kian fiti nöün ewe king kewe chon angang.

14 Nge sorotän ewe rän Tafit a makei echö toropwe ngeni Joap o tini ngeni Uria. 15 Iwe, lon ewe toropwe a makei, “Kopwe akomwa Uria me mwen ewe ia ewe maun a kon pöchökül ie. Mürin kopwe kul seni pwe ekewe chon oputemi repwe niela.” 16 Lupwen Joap a pwelifeili ewe telinimw fän pisekin maun, a anomu Uria lon eu leni a silei pwe ekewe ätepwora ra nom ie. 17 Iwe, sounfiun ewe telinimw ra towu o maun ngeni Joap me nöün kewe sounfiu. Nge ekoch me lein nöün Tafit kewe sounfiu ra mäla, pwal Uria ewe re Hit a mäla. 18 Mürin, Joap a tinala eman chon künö ren Tafit pwe epwe apworausa ngeni meinisin usun mine a fis lon ewe maun. 19 Iwe, a aöüröüra ewe chon künö o apasa, “Lupwen kopwe wes le apworausa ngeni ewe king ekewe pworaus meinisin usun ewe maun, 20 mürin are a song o aisininuk, ‘Pwota oua kan ngeni ewe telinimw le maun? Ousap silei pwe repwe likapichitiu me won ewe tit? 21 Iö a niela Apimelek nöün Kition we mwän? Ifa usun, sap eman fefin a aturätiu eu nif seni fau me won ewe tit pwe a mäla lon Tepes? Pwota oua fokun kan ngeni ewe tit?’ Are epwe aisinuk lon ei ititin, kopwe apasa: Noum chon angang Uria ewe re Hit a pwal mäla.” ✡Souk 9.53

22 Iwe, ewe chon künö a feila o apworausa ngeni Tafit meinisin mine Joap a tini ngeni pwe epwe üra. 23 A üreni Tafit, “Ekewe chon oputem ra pöchökül senikem, ra towu pwe repwe maun ngenikem lon ewe mälämäl, nge äm aia tapweriir pwe ra süsefäliti asamalapen ewe telinimw. 24 Mürin, ekewe chon likapich ra likapichikem me won ewe tit. Iwe, ekoch lein noum kewe sounfiu ra mäla, pwal noum chon angang Uria ewe re Hit a mäla.” 25 Iwe, Tafit a üreni ewe chon künö, “Kopwe üreni Joap pwe esap aweiresi won ei mettoch, pun mäla a tongeni küw eman ika pwal eman lon maun. Oupwe chök apöchöküla ewe maun ngeni ewe telinimw o liapeni. Iei usun mine kopwe apöchöküla ngeni leluken Joap.”

26 Iwe, lupwen Patsipa a rong pwe pwülüan a mäla, a kechüeiti pwülüan we fän ngüngüres. 27 Nge lupwen ekewe ränin kechü ra wes, Tafit a titi neminewe o emwenato lon imwan. Iwe, Tafit a pwülüeni, nge Patsipa a nöüni eman ät me won. Nge ewe Samol mi Lapalap a oput ewe föför Tafit a föri.