Aruachön nöün Paulus Toropwe ngeni
Timoty
Kapas akom
I. Chon makkei ei toropwe: Ewe soukünö Paulus.
II. A mak ngeni iö me fansoun an mak: Ngeni ewe alüal Timoty, eman chon angangen Kot, eli a mak me lon Rom lefilen ekewe ier 65 me 67 A.D.
III. Itelapemongen ei toropwe: Kapasen öüröür ngeni Timoty pwe epwe likitü lon an angang ngeni Kot.
IV. Kapas aüchean ei toropwe: Kopwe tümwünü ewe kapasen pwärätä, pun iei ach manau seni Kot.
V. Masouen ei toropwe: Aruachön nöün Paulus toropwe ngeni Timoty a eäni kapasen öüröür ngeni, pun i eman chiechian alüal me eman chon alisi. Itelapen ei toropwe: likitü. Paulus a öüröüra Timoty o apöchöküla an epwe sopwela le pwärätä Jesus Kraist fän allükülük, epwe kamwöchünük won an afalafala ewe Pworausen Manau mi let me kapasen ewe Testamentin Lom, epwe pwal föri wisan, wisen sense me chon asoulängala aramas. Epwe föri ekei angang meinisin, inamwo are epwe tolong lon riaföü o aramas repwe ü ngeni.
Paulus a fönöü Timoty pwe epwe tümwünü seni feiengauen an pachelong lon sokun anini mi lomotongau o esap wor mirit lon, esap pwal afeiöchü aramas, nge a chök afeiengaua ir mi aüseling ngeni.
Lon ekei kapas meinisin Paulus a achema ngeni Timoty pwe epwe apirü püsin manauan lon an lükülük, an mosonotam, an echeni aramas, an likitü pwal lon an küna riaföü lon ekewe ninni a tolong lon.
VI. Tettelin masouen ei toropwe:
Kapas akom 1.1-2
Kapasen mwareiti Kot me kapasen pesepes ngeni Timoty 1.3–2.13
Kapasen öüröür me fön 2.14–4.5
Usun nonomun manauen Paulus 4.6-18
Kapasen lesopolan 4.19-22
1
Kapong
1.1-2
1 Ngang Paulus, eman nöün Kraist Jesus soukünö ren letipen Kot, a tiniei pwe üpwe arongafeili ewe manau a pwon ngenikich, sia eäni lon Kraist Jesus, 2 üa kapong ngonuk Timoty nei mi achengicheng: Samach Kot me Kraist Jesus ach Samol epwe ngonuk ümöümöch, chen me kinamwe. ✡Föf 16.1
Kapasen kilisou me kapasen apöchöküla Timoty lon wisan
1.3-18
3 Üa kilisou ngeni Kot, ewe üa angang ngeni ren mwelien letipei mi limöch usun ai kewe lewo ra föri. Üa kilisou ngeni Kot lupwen üa chechemenuk fansoun meinisin lon ai iotek lerän me lepwin. 4 Üa chechemeni om kechü o üa fokun mochen künok, pwe üpwe urela ren pwapwa. 5 Üa chechemeni ewe lükülük mi let ka eäni, ewe sokun lükülük a pwal nom ren inen inom Lois me inom Eunike. Üa fokun lükü pwe a pwal nom reöm. ✡Föf 16.1 6 Iei popun üa achema ngonuk, pwe kopwe alapala le aea än Kot we lifang mi nom reöm ren ai iseis pei womw. 7 Pun ewe Ngünmifel Kot a ngenikich esap afisi ngenikich ach sipwe pireir, nge a ngenikich Ngünün mi aurakich ren pwora, chen me ewe tufichin püsin nemeni inisich.
8 Iei mine kosap säwäsini om kopwe pwärätä ach Samol, kosap pwal säwäsiniei, ngang eman chon fötek fän iten Kraist. Nge kopwe etiei le riaföü fän iten ewe Pworausen Manau ren än Kot manaman. 9 I a amanauakich o körikich pwe sipwe manaueni eu manau mi pin, sap pokiten ach föför, nge pokiten püsin an ekiek me an ümöümöch. A ngenikich ei ümöümöch lon Kraist Jesus mwen fanüfan esamwo wor, 10 nge iei a pwäla ngenikich ren wareton ach chon Amanau Kraist Jesus. I a awesi ewe manamanen mäla o pwärala lon saram ren ewe Pworausen Manau eu sokun manau esap tongeni mäla.
11 Kot a awisaei pwe üpwe eman soukünö me sense, pwe üpwe arongafeili ewe Pworausen Manau. ✡1.Tim 2.7 12 Iei popun üa nom lon ei sokun riaföü, nge üsap säw ren. Pun üa silei iö üa lükü, nge üa alletä pwe a tongeni tümwünü mine a lükü ngeniei tori ewe Ränin lesopolan. 13 Kopwe kamwöchünük won ekewe kapas mi let üa aiti ngonuk, pwe repwe eu lenien apirü ngonuk lon om afalafal. Kopwe apposok lon ewe lükülük me chen mi nom lon Kraist Jesus. 14 Ren manamanen ewe Ngünmifel mi nom loch kopwe tümwünüöchü ewe Pworausen Manau Kot a lükü ngonuk.
15 En ka fen silei pwe ekewe souläng meinisin lon Asia ra sü seniei, pwal Fikelus me Hermokenes. 16 Ach Samol epwe ümöümöch ngeni chon familien Onesiforus, pun i a echipaei fän chomong. Esap säwäsiniei pwe ngang üa nom lon fötek, 17 nge lupwen a tori Rom a achocho le küttaei tori a künaei. 18 Ach Samol epwe ümöümöch ngeni lon ewe Ränin kapwüng! Ka fokun silei usun ükükün an alisiei me lon Efisos.