18
Paulus a angang ngeni Kot lon Korint
18.1-17
Mürin ei, Paulus a feila seni Aten o feila Korint. Ikenan a churi eman re Juta itan Akwila, ätei a uputiu lon Pontus, nge ekärän chök feito seni Itali me pwülüan we Prisila, pun ewe Sisar Klautius a allük pwe ekewe chon Juta meinisin repwe towu seni Rom. Iwe, Paulus a feila rer, nge pokiten a sile angangen föri imw mangaku usun chök ir, a nonometiu o a angangfengen me ir, pwe epwe wor mine epwe manau seni. Iwe, iteiten ränin sapat Paulus me ekewe aramas ra kakapasfengen lon ewe imwen felikis, o a achocho le elliapa ekewe chon Juta me chon Krik.
Iwe, lupwen Silas me Timoty ra feito seni Masetonia, Paulus a awora unusen an fansoun le afalafala ewe kapas, a pwärätä ngeni ekewe chon Juta pwe Jesus i ewe Kraist. Nge lupwen ekewe chon Juta ra ü ngeni Paulus o apasatä kapas mi ngau usun i, Paulus a pölüeniir ren an wichikala pwülün üfan o üreniir, “Are ämi oua pöütmwälila, püsin tipisimi, nge sap tipisi! Seni ikenai üpwe feila ren ekewe chon lükün Israel.” Mürin Paulus a towu seniir o feila, pwe epwe nonom lon imwen eman chon lükün Israel itan Titius Justus, i eman mi fel ngeni Kot. Iwe, imwan a arap ngeni ewe imwen felikis. Iwe, Krispus samolun ewe imwen felikis a lükü ewe Samol, i me chon an famili meinisin. Pwal chomong chon Korint mi rongorong än Paulus afalafal ra lükü Jesus o papatais.
Lon eu pwin ach Samol a kapas ngeni Paulus lon künaan, “Kosap niuokus, nge kopwe chök sopwela le afalafal. Kosap fangata, 10 pun ngang üpwe etuk. Esap wor eman epwe tongeni afeiengauok, pun a wor chomong nei aramas lon ei telinimw.” 11 Iei mine Paulus a nonom ikenan lon ükükün eu esop ier o asukula ewe Kapasen Kot ngeni ekewe aramas.
12 Iwe, lupwen Kallio a fil pwe epwe kepinan ewe fanü Akaia, ekewe chon Juta ra chufengen, ra turufi Paulus o etekinala lon ewe lenien kapwüng. 13 Ra apasa, “Ei mwän a sotuni an epwe pese ngeni aramas, pwe repwe fel ngeni Kot lon eu lapalap mi ü ngeni äm kewe allük.” 14 Iwe, lon ewe otun Paulus a mochen popuetä le kapas, Kallio a üreni ekewe chon Juta, “Are ämi oupwe uwato och kapasen tipi ngeni usun eu föför esepwüng ika eu föför mi fokun ngau, epwe öch ngeniei ai üpwe aüselingakemi. 15 Nge pokiten iei och anini usun kapas me it me ämi allük, püsin ämi oupwe apwüngala. Ngang üsap mochen soukapwüng won ekei sokun mettoch.” 16 Iwe, a asürewu seni lon ewe lenien kapwüng. 17 Mürin ir meinisin ra turufi Sostenes, ewe samolun imwen felikis, o wichi mwen ewe lenien kapwüng. Nge Kallio esap ekieki usun mine ra föri.
Paulus a liwinsefäliti Antiokia
18.18-23
18 Iwe, Paulus a nonom ren ekewe chon lükü Jesus lon Korint lon chomong rän. Mürin a feila seniir o a sai ngeni Siria, nge Prisila me Akwila ra eti. Me mwen än Paulus epwe sai seni Kenkrea, a reipöpöla möküran pokiten eu pwon a eäni. * wewen än eman reipöpöla möküran, pwe a awesala an pwonen Nasir. Num 6.18 19 Iwe, ra tori Efisos, ikenan Paulus a likiti Prisila me Akwila. Nge i a feila lon ewe imwen felikis o kakapasfengen me ekewe chon Juta. 20 Ir ra tüngor ngeni, pwe epwe nonom rer ekoch fansoun, nge i esap tipeeu ngeni. 21 Nge lupwen a feila seniir, a pwon ngeniir, “Are epwe letipen Kot, üpwe liwinsefälito remi.” Mürin a sai seni Efisos. 22 Iwe, lupwen a tori Seserea, a pwal feila ngeni Jerusalem o kapong ngeni chon ewe mwichefel. Mürin a feila Antiokia. 23 Mürin an nonom ekoch fansoun ikenan, a feila seni Antiokia o fetalfeil lemenen ewe fanü Kalatia me Frikia. Iwe, a apöchöküla ekewe chon lükü Jesus meinisin.
Apollos a angang ngeni Kot lon Efisos me Korint.
18.24-28
24 Lon ewe fansoun eman chon Juta itan Apollos, i a uputiu lon Aleksantria, a tori Efisos. Ätei eman mi silelap le afalafal, a pwal silefichi kapasen lon ekewe Toropwe mi Pin. 25 A fen kaiö usun Alen ach Samol o seni pöchökülen pwapwan letipan a afalafal o aiti ngeni aramas ekewe mettoch mi enlet usun Jesus, nge a chök silei usun än Johannes angangen papatais. 26 Ätei a popuetä le afalafal fän pwora lon ewe imwen felikis. Nge lupwen Prisila me Akwila ra aüseling ngeni, ra uweela lon imwer o awewefichi ngeni ewe Alen ach Samol. 27 Iwe, Apollos a ekiekin sai ngeni Akaia, iei mine ekewe chon lükü Jesus lon Efisos ra alisi ren ar mak toropwe ngeni ekewe chon lükü Jesus mi nom ikenan o tüngor ngeniir pwe repwe etiwa Apollos. Iwe, lupwen Apollos a tori Akaia, a fokun alisi chokewe mi lükü Jesus ren ümöümöchün Kot. 28 Pun fän pwüngün mine a anini won, a akufu ekewe chon Juta lon ar üpölüfengen mwen ekewe aramas ren an alletätä seni lon ekewe Toropwe mi Pin pwe Jesus ewe Kraist.

*18:18: wewen än eman reipöpöla möküran, pwe a awesala an pwonen Nasir.

18:18: Num 6.18