1 “Ämi pwii me semei kana, oupwe aüseling ngeniei, pun üpwe püsin peniei mwemi.” 2 Lupwen ar rongorong an kapas ngeniir lon fosun Ipru, ra fokun mosonosonola. Mürin Paulus a sopwela le kapas ngeniir, 3 “Ngang eman re Juta, üa uputiu lon ewe telinimw Tarsus lon Silisia, nge üa mämäritä ikei lon Jerusalem. Üa sukul ren ewe sense Kamaliel, a aiti ngeniei tichikin ekewe allük seni ach kewe lewo pwe üpwe apwönüretä. Üa fangala manauei ngeni Kot usun chök ämi oua föri ikenai. ✡Föf 5.34-39 4 Üa ariaföüü ekewe aramas tori ar mäla, ir chokewe mi fetal won Alen ewe Samol. Üa turufi mwän me fefin o atururelong lon imwen fötek. 5 Ewe Souasor mi Lap me unusen ewe mwichen soupwüng ra tongeni alletätä pwe mine üa apasatä a let. Üa angei seniir ekewe toropwe ra mak ngeni pwiir kewe chon Juta mi nom lon Tamaskus. Iei mine üa feila ikenan pwe üpwe turufi ekei aramas o aliwinisefäliireto ngeni Jerusalem fän föföör, pwe repwe angei liwinin ar föför. ✡Föf 8.3; 26.9-11

6 “Iwe, lupwen ai sai o üa arap ngeni Tamaskus, leoloas a fis pwe a pwäkai ngeniei och saram mi fokun saramaram me läng a feitiu woi. 7 Üa turutiu lepwül o üa rong eu möngüngü a üreniei, ‘Saul, Saul, pwota ka ariaföüüei?’ 8 Nge ngang üa aisini, ‘Samol, en iö?’ Iwe, a pölüeniei, ‘Ngang Jesus seni Nasaret ewe ka ariaföüü.’ 9 Iwe, ekewe mwän mi etiei ra chök küna ewe saram, nge resap rongorong möngüngün ewe eman mi kapas ngeniei. 10 Iwe, üa aisini, ‘Ai Samol, met ka mochen üpwe föri?’ Ewe Samol a üreniei, ‘Kopwe pwätä o feila lon ewe telinimw Tamaskus, ikenan repwe ürenuk meinisin mine Kot a akota pwe kopwe föri.’ 11 Mesei ra chunula pokiten ewe saram, iei mine chiechiei kewe ra amwöchü pei o ra emwenieilong lon Tamaskus.

12 “Lon ena telinimw a wor eman mwän itan Ananias. I eman mwän mi achocho le fel ngeni Kot o aleasochisi ach kewe allük, a pwal watte sufölün me ren ekewe chon Juta meinisin mi nom lon Tamaskus. 13 Ätewe a feito rei, a ütä ünüki o üreniei, ‘Pwii Saul, kopwe künasefäli mwomw!’ Lon ewe chök otun üa künasefäli mwei o newenewen ngeni. 14 Iwe, Ananias a üra, ‘Än ach kewe lewo we Kot a filuketä pwe kopwe silei letipan, kopwe pwal küna nöün we Chon Angang mi pwüng o kopwe rongorong mwelian lupwen a kapas ngonuk. 15 Pun en kopwe eman chon pwärätä fän itan ngeni aramas meinisin ren met ka küna o rong. 16 Nge met ka witiwiti iei? Kopwe ütä o papatais, nge ren om iotek ngeni i om tipis kana repwe musala.’

17 “Iwe, üa liwinsefäliti Jerusalem, nge lupwen ai iotek lon ewe imwenfel a wor künaei. 18 Üa küna ach Samol a kapas ngeniei, ‘Kopwe müttir towu seni Jerusalem iei chök, pun ekewe aramas resap etiwa om pwärätä usi.’ 19 Iwe, üa pölüeni, ‘Ai Samol, ir ra fokun silei pwe ngang üa feila lon ekewe imwen felikis ai üpwe turufi o wichi chokewe mi lükü en. 20 Nge lupwen ar niela noumw chon pwärätä Stefanus, ngang üa nom ikenan o tipeeu ngeni ar niela, üa pwal tümwünü üfen ätekewe mi niela i.’ ✡Föf 7.58 21 Iwe, ach Samol a üreniei, ‘Kopwe feila, pun ngang üpwe tinukela won ekewe fanü toau ren ekewe chon lükün Israel.’ ”

22 Iwe, ekewe aramas ra aüseling ngeni Paulus tori a apasatä ekei kapas. Nge mürin ra popuetä le pupuchör fän mwelier mi leüömong, “Oupwe fokun niela ätei! Esap fokun öch an epwe manau!” 23 Ra pupuchör, ra änipüfetalei üfer kewe o aparasatä pwül läng. 24 Mürin ewe sounemenemen sounfiu a allük ngeni nöün kewe sounfiu pwe repwe etekinalong Paulus lon ewe lenien sounfiu. Iwe, a üreniir pwe repwe wichi o kütta popun än ekewe chon Juta pupuchör ngeni lon ei lapalap. 25 Nge lupwen ar chüen föti an epwe wichiwich, Paulus a üreni eman me lein ekewe meilapen sounfiu mi ü ikenan, “Ifa usun, a pwüng ngenikemi ämi oupwe wichi eman chon Rom, nge esamwo fat lon kapwüng pwe a tipis?” 26 Lupwen ewe meilapen sounfiu a rong ekei kapas, a feila ren ewe sounemenem o aisini, “Met ka föri? Enan mwän i eman chon Rom.” 27 Iei mine ewe sounemenem a feila ren Paulus o a aisini, “Kopwe pwäri ngeniei, ifa usun, en eman chon Rom?” Paulus a pölüeni, “Ewer!” 28 Ewe sounemenem a üra, “Ngang üa wiliti eman chon Rom ren ai mönätiu chomong moni.” Paulus a pölüeni, “Nge ngang eman chon Rom seni chök ai uputiu.” 29 Lon ewe chök otun ekewe mwän repwe atittina Paulus ra timärämär seni. Nge ewe sounemenem a niuokus lupwen a silei pwe Paulus eman chon Rom, nge a fen föti ngeni sein.

30 Iwe, ewe sounemenemen sounfiu a wesewesen mochen küttaöchü met ekewe chon Juta ra atipisi Paulus won. Iei mine sorotän ewe rän a apichi ekewe sein Paulus a föfö ngeni, a pwal allük ngeni ekewe souasor mi lap me unusen ewe mwichen soupwüng pwe repwe mwichfengen. Mürin a angei Paulus o aütai me mwer.