19
Ekewe telinimwen op me kiännin fanü me lom
19.1-14
(Num 35.9-28; Jos 20.1-9)
“Iwe, lupwen ewe Samol mi Lapalap ämi we Kot a arosala chon ekewe mwü o ngenikemi fanüer, nge oua angei seniir fanüer o imweimw lon ar kewe telinimw me imwer kewe, oupwe aimwüela ülüngat telinimw fän itemi lon ewe fanü ewe Samol mi Lapalap ämi we Kot epwe ngenikemi pwe oupwe fanüeni. Iwe, oupwe kinifeseni lon ülüngat kinikin ewe fanü ewe Samol mi Lapalap ämi we Kot epwe ngenikemi pwe oupwe fanüeni o anükünüköchü ekewe al mi ale ngeni ekewe telinimw, pwe iteiten eman mi niela eman aramas epwe tongeni sü ngeniir.
Are eman aramas a niela chon arun fän chechengau, nge esap oput i me mwan, ätewe a tongeni süla lon eu kewe telinimw o amanaua manauan. A tongeni fis ei lapalap, pwe eman mwän me chon arun ra feila lemäl pwe repwe pöküpök irä. Nge lupwen a pöüätä ewe kouk pwe epwe pökü ewe irä, mächän ewe kouk a mwetewu seni pachan o küw ewe chon arun pwe a mäla. Ätewe a tongeni sü ngeni eu me lein ekewe telinimw o amanaua manauan. Iwe, epwe fis pwe ewe chon kütta liwinin chan aramasan epwe tapweri ätewe fän an lingeringer, epwe liapeni o niela, pokiten ewe al ngeni ewe telinimw a kon langatam. Nge pwüngün pwe ätewe esap wisen mäla, pokiten esap oput chon arun me mwan. Iei mine üa allük ngenikemi pwe oupwe aimwüela ülüngat telinimw. Nge lupwen ewe Samol mi Lapalap ämi we Kot epwe awatteela kiännin fanüemi o ngenikemi unusen ewe fanü, usun a fen pwon fän akapel ngeni ämi kewe lewo, mürin oupwe achu pwal ülüngat telinimw ngeni ekei ülüngat. I epwe ngenikemi ei fanü, are oua apwönüetä ekewe allük meinisin üa allük ngenikemi ikenai ren ämi echeni ewe Samol mi Lapalap ämi we Kot o awena manauemi fansoun meinisin ngeni mine a aiti ngenikemi. 10 Ren ei oupwe pinei än chokewe resap tipis repwe ninnila me lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, pwe tipisin niela aramas esap nonom womi.
11 Nge are eman a oput chon arun, are a operi o niela, mürin a süla lon eu lein ekewe telinimw, 12 ekewe souakomwen an telinimw repwe titi seni ikenan. Iwe, repwe atolonga ewe mi niela eman aramas lepöün ätewe mi kütta liwinin chan aramasan, pwe epwe niela. 13 Ousap fokun tongei, nge oupwe alimöchüala ewe fanü seni tipisin nimanauei aramas esap wor ar tipis, pwe oupwe feiöch. Jos 20.1-9
14 Iwe, lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, ousap amwökütü kiän fanüen chon arumi ekewe reikewe ra förätä.” Tut 27.17
Allük usun chon pwärätä
19.15-21
15 “Iwe, eman chök chon pwärätä esap naf an epwe tongeni atipisi eman mwän pwe a föri föförün mwäneson ika sokun föför mi ngau. Nge ren pwärien ruoman ika ülüman chon pwärätä a tongeni fis pwüngün ar atipisi. Num 35.30; Tut 17.6; Mat 18.16; Joh 8.17; 2.Kor 13.1; 1.Tim 5.19; Ipr 10.28 16 Are eman chon pwärätä mi ngau a atipisimwäli eman aramas, 17 ekewe ruu pekin mi aninifengen repwe feito fän mesen ewe Samol mi Lapalap, fän mesen ekewe souasor me ekewe soukapwüng mi wor wiser lon ewe fansoun. 18 Iwe, ekewe soukapwüng repwe ais tichik won ewe föför. Nge are a pwä pwe ewe chon pwärätä a chofana, nge an aturu pwin we esap pwüng, 19 mürin oupwe föri ngeni usun mine a ekiekin föri ngeni pwin we. Iei usun oupwe limetawu ewe mi ngau seni lefilemi. 20 Iwe, ekewe aramas meinisin repwe rong usun o niuokus, pwe resap chüen föri ei sokun föför mi ngau lefilemi. 21 Ousap tongei ei sokun aramas, pun oupwe liwini manau ngeni manau, eföü mas ngeni eföü mas, efoch ngi ngeni efoch ngi, efoch pau ngeni efoch pau, efoch peche ngeni efoch peche.” Eks 21.23-25; Lif 24.19-20; Mat 5.38

19:13: Jos 20.1-9

19:14: Tut 27.17

19:15: Num 35.30; Tut 17.6; Mat 18.16; Joh 8.17; 2.Kor 13.1; 1.Tim 5.19; Ipr 10.28

19:21: Eks 21.23-25; Lif 24.19-20; Mat 5.38