1 Mürin, ewe Samol mi Lapalap a üreni Moses, “Kopwe feila ren Farao o kapas ngeni, ‘Iei alon ewe Samol mi Lapalap än chon Ipru we Kot, “Kopwe mwüt ngeni nei aramas pwe repwe feila o fel ngeniei. 2 Pun ika kosap mochen mwüt ngeniir pwe repwe feila, nge ka pwal chök amwöchüür, 3 Ngang ewe Samol mi Lapalap üpwe afeiengaua noum man mi nom lemäl ren eu mäfeiengau. Üpwe afeiengaua ekewe oris, ekewe aas, ekewe kamel, ekewe kow me ekewe sip. 4 Nge üpwe aimwü lefilen nöün chon Israel man me nöün chon Isip man, pwe esap wor eman me lein nöün chon Israel man epwe mäla.” ’ ” 5 Iwe, ewe Samol mi Lapalap a filätä eu rän o apasa, “Lesor ngang ewe Samol mi Lapalap üpwe awarato feiengau won ei fanü.” 6 Iwe, sorotän ewe rän, ewe Samol mi Lapalap a awarato ewe feiengau. Ekewe man meinisin nöün chon Isip ra mäla, nge esap wor eman me lein nöün chon Israel man a mäla. 7 Farao a tinala eman pwe epwe sachei, nge a pwä pwe esap wor eman me lein nöün chon Israel man a mäla. Nge Farao a fen tipeföreala, pwe esap mochen mwüt ngeni ekewe aramas pwe repwe feila.

8 Mürin, ewe Samol mi Lapalap a üreni Moses me Aaron, “Oupwe tukei ngeni pöümi falang seni eu lenien um mi watte. Iwe, Moses epwe moneetä läng me fän mesen Farao, 9 nge epwe wiliti pwülümoromor won unusen ewe fanü Isip. Iwe, ewe pwülümoromor epwe afisätä mach mi usun ruup won aramas me man lon unusen ewe fanü Isip.” 10 Iei mine ra tukei falang seni eu lenien um mi watte, ra ütä me fän mesen Farao, nge Moses a moneetä läng. Iwe, a afisätä mach mi usun ruup won aramas me man. ✡Pwär 16.2 11 Ekewe sourong resap tongeni ütä mwen Moses pokiten inisir a kula ren mach, pun ekewe sourong me chon Isip meinisin ra mach. 12 Nge ewe Samol mi Lapalap a atipeföreai Farao pwe esap aüselinga Moses me Aaron, usun mine ewe Samol mi Lapalap a fen üreni Moses.

13 Mürin, ewe Samol mi Lapalap a üreni Moses, “Kopwe pwätä lesosorusich pwe kopwe ütä fän mesen Farao o kapas ngeni, ‘Iei alon ewe Samol mi Lapalap än chon Ipru we Kot, “Kopwe mwüt ngeni nei aramas pwe repwe feila o fel ngeniei. 14 Lon ei fansoun üpwe tinätiu womw pwal won noum kewe nöüwis me noum kewe aramas unusen ai kewe afeiengau meinisin, pwe kopwe silei pwe esap wor eman won unusen fanüfan mi wewe ngeniei. 15 Üa fen tongeni aitiela pei o afeiengauok me noum kewe aramas ren mätter, pwe manauemi epwe müchüla me won fanüfan. 16 Nge üa mwüt ngonuk pwe kopwe manau tori ikenai, pwe üpwe pwäri ngonuk ai manaman, pwe itei epwe föüla won unusen fanüfan. ✡Rom 9.17 17 Pokiten ka chüen lamalamtekia ngeni nei aramas ren om kosap mwüt ngeniir pwe repwe feila, 18 lesor lon ei otun üpwe apüngätiu ütten fau mi chou won ei fanü, esap mwo fis ei sokun fän eu lon Isip seni poputän mwün tori ikenai. 19 Iei mine kopwe titila pwe repwe emwenala noum man lon lenien op, pwal meinisin mine a nom lemäl. Pun aramas me man meinisin mi nom lemäl nge resap op, repwe mäla ren ewe ütten fau epwe püngütiu wor.” ’ ” 20 Iwe, iö mi niueiti alon ewe Samol mi Lapalap me lein nöün Farao kewe nöüwis, a amüttiri le asüelong le imw ekewe aramas a nöüniir amanau me nöün man. 21 Nge iö esap afäli alon ewe Samol mi Lapalap, a chök likitala lemäl ekewe aramas a nöüniir amanau me nöün man.

22 Mürin, ewe Samol mi Lapalap a üreni Moses, “Kopwe aitietä poum läng pwe epwe püngütiu ütten fau won unusen ewe fanü Isip, won aramas me man, pwal won ekewe irän lemäl.” 23 Iwe, lupwen Moses a aitietä wokun läng, ewe Samol mi Lapalap a tinätiu chopulap, ütten fau me fifi mi küri fanü. Iei usun ewe Samol mi Lapalap a apüngätiu ütten fau won ewe fanü Isip. 24 Iwe, ei ütten fau mi püngütiu fiti fifi, eu ütten fau mi fokun chou, esap mwo fis ei sokun fän eu lon Isip seni poputän mwün. ✡Pwär 8.7; 16.21 25 Ei ütten fau a ni aramas me man meinisin mi nom lemäl won unusen ewe fanü Isip, a pwal atai iräkis me irämong meinisin mi nom lemäl. 26 Nge lon chök ewe fanü Kosen, ewe ia ekewe aramasen Israel ra nom ie, esap püngütiu ütten fau.

27 Mürin, Farao a titi Moses me Aaron o üreniir, “Üa tipis lon ei fansoun. Ewe Samol mi Lapalap a pwüng, nge ngang me nei kewe aramas aia mwäl. 28 Oupwe iotekin tüngor ngeni ewe Samol mi Lapalap pwe epwe aükätiu ewe chopulap me ütten fau, pun a kon lapalap. Üpwe mwüt ngenikemi pwe oupwe feila, nge üsap chüen amwöchükemi.” 29 Moses a üreni Farao, “Lon ewe otun üpwe towu seni ei telinimw, üpwe aitietä pei o iotek ngeni ewe Samol mi Lapalap. Iwe, ewe chopulap epwe kaüla, esap pwal chüen püng ütten fau. Ren ei kopwe silei pwe ewe Samol mi Lapalap a fanüeni fanüfan. 30 Nge üa silei pwe en me noum kewe nöüwis ousap mwo niueiti Kot ewe Samol mi Lapalap.” 31 Iwe, ekewe irä iter fläks me parli ra tala, pun ekewe parli ra ua, nge ekewe fläks ra et. 32 Nge ekewe irä iter wiich me spelt resap ta, pun ra pwükümang. 33 Moses a feila seni Farao o towu lükün ewe telinimw, a aitietä pöün o iotek ngeni ewe Samol mi Lapalap. Iwe, ewe chopulap me ütten fau ra kaüla, nge ewe üt ese chüen püngütiu won fanüfan. 34 Nge lupwen Farao a küna pwe ewe üt, ewe ütten fau me ewe chopulap ra kaüla, a pwal tipissefäl. I me nöün kewe nöüwis ra chök tipeförea usun me mwan. 35 Iei usun Farao a chök tipeförea, pwe esap mwüt ngeni ekewe aramas pwe repwe feila, usun mine ewe Samol mi Lapalap a fen kapas ngeni Moses.