15
Än Moses köl
15.1-21
1 Mürin, Moses me ekewe aramasen Israel ra köl ei köl ngeni ewe Samol mi Lapalap,
“Üpwe köl ngeni ewe Samol mi Lapalap, pun an win a fokun amwarar.
A aturalong lon ewe sät ewe oris me ewe mi wisen wawa. ✡Pwär 15.3
2 Ewe Samol mi Laplap ai pöchökül me ai köl,
i a amanauaei.
I ai Kot, üpwe mwareiti,
i än semelapei we Kot, üpwe alinga.
3 Ewe Samol mi Lapalap eman soumaun,
itan Samol mi Lapalap. ✡Kölf 118.14; Ais 12.2
4 A aturalong leset nöün Farao woken me oris, pwal nöün mwicheichen sounfiu.
Nöün meilapen sounfiu mi lipwäköch ra mop lon ewe Setipar.
5 Iwe, lölön lon a pwölürela,
ra kokotiu epin ewe sät usun eföü fau.
6 Ai Samol mi Lapalap, pöüifichum a lingela lon an manaman.
Ai Samol mi Lapalap, pöüifichum a atatakisi chon oputok.
7 Lon unusen om manaman ka aturätiu chokewe mi pälüenuk,
ka tinato om song mi pöchökül, pwe a fisiir usun fetilipwas.
8 Ren enienin lon pwötum ewe sät a chukuchukutä,
ewe lölön lon a ütä usun etip,
epin ewe sät a pöchökülela me lukalapan.
9 Ewe chon oputakem a apasa, ‘Üpwe tapweriir, üpwe liapeniir
o ineti liapei, üpwe ameseikaei wor.
Iwe, üpwe üttawu nei ketilas, pei epwe aroserela.’
10 Nge en ka pönato asepwälum, ewe sät a pwölürela,
ra kokotiu usun pilom lon ewe lölö mi lapalap.
11 Ai Samol mi Lapalap, iö a wewe ngonuk lein ekewe kot?
Iö a wewe ngonuk lon om pin mi tekia,
pwal lon om föför mi ling o eniwokus me lon om föri manaman?
12 Ka aitiewu pöüifichum,
nge fanüfan a oromala chon oputem.
13 Lon om tong ellet ka emweni ekewe aramas ka amanaueer,
ka emwenirela ren om pöchökül ngeni leniom mi pin.
14 Lupwen chon ekewe mwü ra rongorong usun, ra chechech,
niuokus watte a tori ekewe chon Filistia.
15 Ekewe samolun Etom ra fokun niuokus,
ekewe aramas mi pwora seni Moap ra chechech,
nge chokewe ra nonom lon Kanaan ra fokun rükö ren ar niuokus.
16 Niuokus me rükö a feitiu wor.
Ai Samol mi Lapalap, pokiten manamanen poum ir ra chouchoula usun eföü fau,
tori noum aramas ra nuula, tori chokewe ka angaseer ra nuula.
17 Ai Samol mi Lapalap, en kopwe emwenirelong lon ewe fanü
o fotukiretiu won chukum, ewe leni ka püsin föri pwe kopwe nonom lon,
ewe leni mi pin ka afisätä ren poum, ai Samol mi Lapalap.
18 En Samol mi Lapalap kopwe nemenem tori feilfeilachök.”
Än Miriam köl
15.19-21
19 Ekewe aramasen Israel ra fetal won pwasapwasen epin ewe sät. Nge lupwen nöün Farao oris me wan woken pwal nöün sounfiu mi wawa oris ra pwal tolong lon, ewe Samol mi Lapalap a aliwinato lölön ewe sät wor. 20 Iwe, Miriam fefinen Aaron eman soufos fefin a angei an pisekin kaktai, nge ekewe fefin meinisin ra tapwela mürin fän ar pisekin kaktai o pworuk.
21 Miriam a emweniir le köl,
“Sipwe köl ngeni ewe Samol mi Lapalap,
pun an win a fokun amwarar.
A aturalong lon ewe sät ekewe oris me ätekewe mi wisen wawa.”
Ewe koluk mi maras me lon Mara
15.22-27
22 Mürin, Moses a emwenala chon Israel seni ewe Setipar o emwenirelong lon ewe fanüapön Sur. Iwe, ra sai lon ewe fanüapö ükükün ülüngat rän, nge resap künakün koluk. 23 Nge lupwen ra tori Mara, resap tongeni ün kolukun Mara, pun a maras. Iei mine ewe leni a iteni Mara *wewen Mara maras. 24 Iwe, ekewe aramas ra lal ngeni Moses o üreni, “Met aipwe ünümi?” 25 Mürin, Moses a kökköri ewe Samol mi Lapalap, nge ewe Samol mi Lapalap a aiti ngeni efoch irä. Iwe, a aturalong ewe irä lon ewe koluk, mürin ewe koluk a öchün ün. Ikenan ewe Samol mi Lapalap a ngeniir an allük me pwüüng pwe repwe apwönüretä. Ikenan a sotuniir 26 o apasa, “Are oupwe likiitü le aüselinga mweliei ngang ewe Samol mi Lapalap ämi we Kot o föri mine a pwüng me fän mesei, are oupwe aleasochis ngeni ai kewe allük o apwönüetä ai kewe pwüüng meinisin, üsap uwato womi eu lein ekewe samau üa uwato won chon Isip, pun ngang ewe Samol mi Lapalap ämi sousafei.” 27 Mürin ra tori Elim, ia a wor ie engol me ruu chönüttu pwal fik irä palm. Iwe, ra asösö ikenan arun ewe koluk.