1 Mürin a föri ewe rongen asoren kek seni ewe irä akasia. Langataman me chölapan ra chök nönnöfengen ükükür fisu esop fiit, nge tekian ükükün rüanü esop fiit. 2 A pwal föri fofoch mächä won ekewe rüanü lepwokukun. Nge ekewe mächä ra chök förunusfengen me ewe rongen asoren kek, a pwal apachätä piras ngeni won unusen ewe rongen asor. 3 A föri pisekin ewe rongen asoren kek meinisin: ekewe nape me söföl, ekewe sepi fän iten chan ekewe mönün asor me chü me sepi fän iten molien lon. Ekewe pisek meinisin a föriir seni piras. 4 Iwe, a föri äpäwunen ewe rongen asoren kek seni piras, nge ewe äpäwun a nom fän aaman seni lukalapan tori fan. 5 Iwe, won ewe äpäwun mi för seni piras a pwal apachätä fofoch ring ngeni pwokukun me rüanü fän iten ekewe ämwär. 6 A pwal falei ekewe ämwär seni ewe irä akasia o apachätä piras wor. 7 Iwe, a sökalong ekewe ämwär lon ekewe ring mi pachetä lepekin ewe rongen asor me rüepek, pwe aramas ra tongeni ämwära. A föri ewe rongen asoren kek seni pap, nge lon a pön.

8 Iwe, ewe lenien töttöl me motongan seni piras a föri seni ekewe kilasen ori seni piras a angei me ren ekewe fefin mi angang leasamalapen ewe imw mangaku ia aramas ra churi Kot ie. ✡Eks 30.18

9 Mürin a föri ewe leni lükün ewe imwenfel seni mangaku. Lepeliörün ewe leni a tit ngeni mangaku mi pwechepwech, langataman ükükün lime iach. 10 Iwe, a wor rüe üran me rüe alongur seni piras, nge ökkükün won ekewe ür pwal mächän lefiler me asan ra för seni silifer. 11 Nge lepeliefengin ewe leni a pwal tit ngeni mangaku langataman ükükün lime iach, a pwal wor rüe üran me rüe alongur seni piras. Iwe, ökkükün won ekewe ür pwal mächän lefiler me asan ra för seni silifer. 12 Iwe, lepelilotoun ewe leni a tit ngeni mangaku, chölapan ükükün rüe me limu iach, a pwal wor engol üran me engol alongur. Nge ökkükün won ekewe ür pwal mächän lefiler me asan ra för seni silifer. 13 Nge fän mesen ewe leni me peliötiuan chölapan ükükün rüe me limu iach. 14 Iwe, lepekin ewe asamalap me epek a tit ngeni mangaku langataman ükükün fisu esop iach, a pwal wor ülüfoch üran me ülüngat alongur. 15 Pwal ina chök usun ewe epek, pun lepekin ewe asamalap me rüepek a tit ngeni mangaku langataman ükükün fisu esop iach, a pwal wor ülüfoch üran me ülüngat alongur. 16 Iwe, unusen pwelin ewe leni lükün ewe imwenfel seni mangaku a tit ngeni mangaku mi pwechepwech. 17 Alongun ekewe ür ra för seni piras, nge ökkükün won ekewe ür me mächän lefiler ra för seni silifer. Asen ekewe ür a pwal pwölüpwöl ngeni silifer, nge mächän lefiler meinisin ra för seni silifer. 18 Iwe, ewe cheech mi chü fän iten asamalapen ewe leni lükün a för seni mangaku mi arauarau me parachol me parapar, pwal seni mangaku mi pwechepwech. Langatamen ewe cheech ükükün engol iach, nge tekian a nönnöfengen chök me mangakun ewe tittin lükün ükükün ruu esop iach. 19 Iwe, mi wor fofoch üren ewe asamalap me rüanü alongur mi för seni piras. Nge ökkükür me pwölüpwölün aser pwal mächän lefiler ra för seni silifer. 20 Nge chüfölün ewe imwenfel seni mangaku meinisin tori chüfölün unusen pwelin ewe leni lükün ra för seni piras.

21 Ikkei iteiten pisekin ewe imwenfel seni mangaku, ewe ia ekewe allük ra nom ie. Ekewe mwän seni ewe ainangen Lefi ra föri ewe angangen alea fän emwenien Itamar nöün ewe souasor Aaron we mwän, usun Moses a allük ngeniir. 22 Iwe, Pesalel nöün Uri we mwän, nge Uri nöün Hur seni ewe ainangen Juta, a föri meinisin mine ewe Samol mi Lapalap a allük ngeni Moses. 23 A pwal wor chienan itan Oholiap nöün Aisamak we mwän seni ewe ainangen Tan. I eman sousilelap le angangen pau me ekiekietä mettoch mi fö, a pwal sile chü mangaku mi arauarau me parachol me parapar, pwal mangaku mi pwechepwech.

24 Iwe, ewe kolt meinisin ra aea ren angangen kaütän ewe imw mi pin ükükün ruungeröü ipükü tiue me limu paun, nge ra för won ewe kilo ra aea le aükük lon ewe imw mi pin. Ei kolt än aramas alilis. 25 Iwe, ewe silifer seni chokewe mi alealong lon iteiten ar we mwich ükükün füngeröü limepükü lime paun, a för won ewe kilo ra aea le aükük lon ewe imw mi pin. 26 Iteiten eman me eman mi alealong lon ewe iteit seni rüe ier feitä a püngütiu eu lelimu aunus silifer a för won ewe kilo ra aea le aükük lon ewe imw mi pin. Iteiter meinisin wonopükü ülüngatngeröü limepükü lime mwän. ✡Eks 30.11-16; Mat 17.24 27 Iwe, ekewe ipükü alongun ewe imw mi pin pwal alongun üren ewe cheech ra för seni füngeröü limepükü paun silifer, pun eu along nge fik me limu paun. 28 Nge seni ekewe lime paun silifer Pesalel a föri ökkükün ekewe ür me pwölüpwölün aser, a pwal föri mächän lefiler seniir. 29 Iwe, fesinien ekewe aramas piras ükükün limungeröü ülüpükü engol paun. 30 Seni ei ükükün piras a föri alongun asamalapen ewe imw mangaku ia aramas ra churi Kot ie, ewe rongen asoren kek me ewe äpäwun, pwal pisekin ewe rongen asoren kek meinisin, 31 a pwal föri alongun unusen pwelin ewe leni lükün, alongun asamalapan me chüfölün ewe imwenfel seni mangaku meinisin, pwal chüfölün pwelin ewe leni lükün.