1 Iwe, ewe Samol mi Lapalap a pwal kapas ngeniei, 2 “Pwota oua äkeäni ei sokun mwiitun lon ewe fanü Israel,

5 A tongeni fis pwe eman aramas a föföröch, a pwal eäni pwüng me wenechar. 6 Esap mongö föten anü lon ekewe lenien fel won ekewe chuk o fel ngeni än chon Israel kewe uluulun anümwäl. Esap lisowu ngeni pwülüen chon arun ika kon ren eman fefin mi samaun maram. 7 Esap ariaföüü eman, nge a aliwini ngeni ewe chon liwinimang asisilen an pwon, esap pwal solä, nge a fangala anan mongö ngeni chon echik o aüföüfa chon mwelele. 8 Esap awattela winnen nöün moni ika angei manauan. Esap föri mine a pwüngingau, nge a wenechar lon an apwüngü osukosuken lefilen aramas. 9 A apwönüetä ai kewe allük o aleasochisiir fän allükülük. Ei sokun aramas a pwüng, epwe fokun manau,” iei alon Kot ewe Samol mi Lapalap. ✡Lif 18.5

10 “A tongeni fis pwe ei aramas a wor eman nöün mwän mi solä o nimanau. 11 Esap apirü än saman föför, pwe a chök mongö föten anü won ekewe chuk o lisowu ngeni pwülüen chon arun. 12 A ariaföüü chon wöüngau me chon mwelele, a solä, esap aliwini ngeni ewe chon liwinimang asisilen an pwon. A fel ngeni ekewe uluulun anümwäl o föri sokun föför mi anioput. 13 A awattela winnen nöün moni o angei manauan. Ifa usun, ätei epwe manau? Apwi, esap fokun manau. Epwe fokun mäla, pun a föri ekei sokun föför mi anioput meinisin. Iwe, epwe chök angei chappen an föför.

14 A pwal tongeni fis pwe ei chon föföringau a wor eman nöün a küna än saman tipis meinisin, nge esap apirü an kewe föför. 15 Esap mongö föten anü won ekewe chuk o fel ngeni än chon Israel kewe uluulun anümwäl. Esap lisowu ngeni pwülüen chon arun, 16 esap ariaföüü eman, nge a aliwini ngeni ewe chon liwinimang asisilen an pwon. Esap solä, pwe a fangala anan mongö ngeni chon echik o aüföüfa chon mwelele. 17 Esap tipeni mine a pwüngingau, esap awattela winnen nöün moni ika angei manauan, nge a apwönüetä ai kewe allük o aleasochisiir. Ätewe esap mäla pokiten än saman tipis, nge epwe fokun manau. 18 Nge semen ätei epwe fokun mäla pokiten an föföringau, pun a ariaföüü aramas, a soläni pisekin pwin o föri mine a ngau lein aramasan.

19 Nge ämi oua ais, ‘Pwota nöün ewe mwän esap angei liwinin än saman tipis?’ Pokiten nöün a eäni pwüng me wenechar o apwönüetä ai kewe allük meinisin fän allükülük, epwe fokun manau. 20 Ewe aramas mi tipis i chök epwe mäla. Nöün eman sam esap angei liwinin än saman tipis, nge ewe sam esap pwal angei liwinin än nöün tipis. Iwe, ewe chon pwüng epwe angei liwinin an pwüng, nge ewe aramasangau epwe angei liwinin an föföringau.” ✡Tut 24.16

21 “Nge are eman aramasangau a ükütiu le föri tipis, are a apwönüetä ai kewe allük meinisin o eäni pwüng me wenechar, epwe fokun manau, nge esap mäla. 22 Ekewe pupungau meinisin a föriir me mwan üpwe amusala. Epwe manau pokiten an kewe föför mi pwüng.” 23 Iwe, Kot ewe Samol mi Lapalap a ais, “Ifa usun, üpwe pwapwaiti än ewe aramasangau mäla? Ifa usun, üsap tipeni an epwe ükütiu seni an kewe föför mi ngau pwe epwe manau? 24 Nge are eman aramas mi pwüng a kul seni an föför mi pwüng o föri mine a pwüngingau, are a apirü än eman aramasangau föför mi anioput, ifa usun, epwe manau? Apwi! An kewe föför mi pwüng meinisin üsap chüen chechemeniir. Pokiten an pupungau me tipis epwe mäla.

25 Nge oua apasa, ‘Än ewe Samol föför esap pwüng.’ Iwe, oupwe rongorong, ämi chon Israel. Ifa usun, ngang ewe eman esap föri mine a pwüng, nge sap fen ämi? 26 Are eman aramas mi pwüng a kul seni an kewe föför mi pwüng o föri tipis, ätewe epwe mäla. Pokiten an kewe tipis a föri, epwe mäla ren. 27 Nge are eman aramasangau a ükütiu le föföringau o eäni pwüng me wenechar, epwe püsin amanaua manauan. 28 Are a mefi an pupungau o ükütiu le föri tipis, epwe fokun manau, nge esap mäla. 29 Nge ämi chon Israel oua apasa, ‘Än ewe Samol föför esap pwüng.’ Ifa usun, ämi chon Israel, ngang ewe eman esap föri mine a pwüng, nge sap fen ämi?

30 Iei mine ngang Kot ewe Samol mi Lapalap üa apasa: Üpwe apwüngükemi chon Israel, iteiten eman me eman won ükükün an föför. Oupwe ekieksefäl o ükütiu seni ämi föför mi ngau, pwe ämi kewe tipis resap afeiengauakemi. 31 Oupwe pöütala ämi pupungau meinisin oua föriir. Oupwe angei seniei eu leluk mi fö me eman ngün mi fö. Pwota oua mochen mäla, ämi chon Israel? 32 Pun üsap pwapwaiti än eman epwe mäla. Iei mine oupwe ekieksefäl, pwe oupwe manau,” iei alon Kot ewe Samol mi Lapalap.