1 Mürin ekei mettoch ra fis, ekewe souemwen ra feito o üreniei, “Ekewe aramasen Israel, ekewe souasor me ekewe mwän seni ewe ainangen Lefi resap aimwürela seni aramasen ekewe fanü ünüküür, seni ekewe chon Kanaan, chon Hit, chon Peris, chon Jepus, chon Amon, chon Moap, chon Isip me chon Amor. Ra chök föri ekewe föför mi anioput ir ra föri. 2 Pun ra angei ekoch me lein nöür föpwül o pwülüeniir, ra pwal apwüpwülüeer ngeni nöür mwän. Iei usun ekewe aramas mi pin ra afitiarfengen me aramasen ekewe fanü. Nge ei lapalap mi ngau ekewe nöüwis me ekewe samol ra akom le föri.” 3 Iwe, lupwen üa rongorong ei pworaus, üa kamwei üfei, üa pwal ütti meten mökürei me alüsei o mot fän ai letipeta. 4 Mürin, chokewe meinisin mi chechech ren alon ewe Koten Israel ra mwicheto rei, pokiten ekewe tipis mi ngau ekewe mi liwinto seni ar oola ra föri. Iwe, üa mot fän letipeta tori fansoun asor lekuniol. 5 Nge lupwen a tori fansoun asor lekuniol, üa ütä seni ewe ia üa letipeta ie, üa fotopwäsuk fän üfei mi kam o aitietä pei lon ai iotek ngeni ewe Samol mi Lapalap ai we Kot.

6 Iwe, üa apasa, “Ai Kot, üa fokun säw ai üpwe anetai mesei ngonuk. Pun äm kewe föföringau ra tekia seni mökürem, nge äm kewe tipis ra chukuchukutä tori läng. 7 Seni fansoun äm kewe lewo tori ikenai äm aia föri chomong tipis. Nge pokiten äm kewe föföringau, äm me äm kewe king pwal äm kewe souasor aia sechilong lepöün kingen ekewe fanü. Iwe, aia küna ninni, aia oola, ra soläni pisekim fän pöchökül, aia pwal fokun säw, usun a fis tori ikenai. 8 Nge iei, en Samol mi Lapalap äm Kot, ka ümöümöch ngenikem eu fansoun mochomoch ren om mwüt ngenikem äm ekoch mi chüen manau pwe aipwe liwinto seni äm oola o nonom lon ei leni mi pin fän kinamwe. Ren ei, ka awora ngenikem pöchökül o mwüt ngenikem pwe aipwe ekis ngasala seni än aramas nöünikem amanau. 9 Iei mwo än aramas nöünikem amanau, nge en äm Kot kosap likitikeemila lon äm riaföü. Ka föri pwe ekewe kingen Persia ra eäni kirikiröch ngenikem, pwe ra mwüt ngenikem pwe aipwe manau o aüsefälietä imwomw we imwenfel mi tala, ra pwal mwüt ngenikem pwe aipwe nom lon Juta me Jerusalem fän kinamwe.

10 Nge iei en äm Kot, met aipwe apasa ren ei lapalap mi fis? Pun äm aia aleasolap ngeni om kewe allük, 11 en ka allük ngeni noum kewe chon angang ekewe soufos, lupwen ka apasa, ‘Ewe fanü oua tolong lon pwe oupwe fanüeni, eu fanü mi limengau pokiten aramasen ekewe fanü ra aurala ren ar föför mi fokun anioput seni epek tori epek. 12 Iei mine ousap apwüpwülüa nöümi föpwül ngeni nöür alüal, ousap pwal apwüpwülüa nöümi alüal ngeni nöür föpwül. Ousap kütta ar kinamwe ika ar feiöch, pwe oupwe tongeni pöchökül o mongö uaöchün ewe fanü, oupwe pwal likiti ewe fanü ngeni mwirimwirimi, pwe repwe fanüeni tori feilfeilachök.’ ✡Eks 34.11-16; Tut 7.1-5 13 Iei mwo ekei riaföü ra fis ngenikem pokiten äm kewe föför mi ngau me äm kewe tipis mi chomong, nge äm aia silei pwe om apwüngükem, en äm Kot, a kis seni liwinin äm tipis, ka pwal mwüt ngenikem ekoch mi chüen manau. 14 Ifa usun, aipwe chüen purisefäli om kewe allük o pwüpwülü ngeni ekei aramas mi föri ekewe föför mi anioput? Ifa usun, kosap song ngenikem tori äm aipwe rosola, pwe esap chüen wor eman mi chüen manau ika eman mi tongeni sü? 15 Ai Samol mi Lapalap Koten Israel, en ka pwüng, nge ka mwüt ngenikem pwe aia chüen manau. Äm aia pwärätä äm tipis ngonuk. Esap tufich ngenikem pwe aipwe feito fän mesom.”